LAMETNA
Agelh ~ CK Khai
Pitek khat kum tamsim pian, ciangkhut tawh, a tuan nading cycle cih te neilo a, ama tha mah zangh in khetawh khuapi sunglam hong zuan hi. Thungip sungah van puak khat nei in a kiat suah ding leh a man sak ding lau lua ahihmanin a khut tawh hum tinten in sai om na lam hong zuan hi.
A lunggulhna sai hong tun ciang, thungip sung pan, phone lui khat hong lakhia in ka phone a siat zawh sawt lua ta hi napi, ka sum neih loh man in tun a puahsak dingin hong puak zo pan ing ci-in phone sai pa khut sungah a phone ap hi.
Pitek nu in a lungsim tawng pan, “Ka phone bawlna bangzah a bei tam maw, ka sum puak teng a cing zo mawk diam” ci-in lung himawh mahmah sa-in sai sungah tutna kiu khatah, a tut khinkhian laitak, phone bawl pa in, "Pi aw na phone ki siatna om lo pi bang hang a hong paipih na hiam? Ciahpih kik in na phone a hoih mah hi" ci-in pia kik hi. “Na phone hoih hi, a siatna om lo hi” cih kammal Pitek nu in a zak ciangin a khitui te hong tak keuhkeuh in a ciangkhut tawh sai sung pan hong pu suak khia hi. Phone bawl saineipa in Pitek nu khitui luang sa in a ciah khiat hong muh teh, a um lo, a khasia a hih khak leh ci-in hong nung delh in, "Pi aw um lo na hiam na phone hoih mah hi kei phone tawh sam leng lut a, nang phone tawh zong kei phone ki sam thei hi" cih tawh heh nem hi.
Pitek nu a khitui luangkawm sa in, phone sai neipa maitang mitsuan in, khasiat huai tak in khat vei huih hong diik in phone sai neipa kiangah hong gen thu in, "Bawi aw ken ka phone a hoih lo sa in kum tampi na kem ing, ka tapa gam dang khual zin a pai khit, khat vei bek hong hopih hi, phone hong pai ngei nawn lo ahihman in, ken phone sia a sa kha kahi hi, ka tapa in a nu cikteh hong hopih kik zen tam maw...ka phone a siat loh lam ka tapa tungtawn in thei nuam mah sing” ci-in kap ngeungau mawk hi.
Phone sia hilo a, a tapa in phone hopih ngei lo na hizaw hi. Phone sai nei pa in hehpih lua in a mah zong pasal a hih hang in Pitek nu thu hong zak teh a mit sungah a khitui hong laam in, "Pi aw, phone hoih zaw khat letsong in hong pia ning" a cih leh, pitek nu in, "Tua hileh ka tapa in hong hopih pah ding maw" ci-in dawng kik hi.
A gam la-ah na om teh phone tawh na hopih ding na nu leh pa in hong lamen den hi. A gei-ah na om ciangin na phone, Facebook, online tuamtuam leh video et teng tawh man lah lua-in nagei a hong tu na nu leh pa na manghilh kha hiam? Na hopih siausiau ding hong lamen den uh cih phawk tawntung in.
Nu leh pa lungdamna khawng pen bawng leh sial gawh na bek hituan lo hi, na nu leh pa kiangah nu aw pa aw no bang nu leh pa kong neih hampha lua ing, no hangin kei hiciang hong tung ing lung dam lua ing, hong ngai lua ing, cici leteh na nu leh pa mit sung pan in khitui hong tak keuhkeuh dinga, tua in na khan sau nading na nopsak nading lampi a sial khitui te hong hidinga, na kammal khum te-in na nu leh pa hong lungnuam in hong khansau tuam ding hi.
Nu leh pa ten lametna lianpi tate tungah hong nei den a, tua hong lamet den uh i sep ding pen ei sep zawh loh ding a hamsa pi sum leh paai tengh tampi cihte i piak ding hong lamen hilo a, maitai takin awkhum pen tawh hopih in zahtak bawlin simmawh kha lo-in i vak kik ding hong lamen den hi zaw uh hi.
Kolose 3:20 sungah na nu leh pa zahtak in lungkim sakin tua-in Pasian deihna hi, na ci hi. Tua a hihman in na nu leh pa lametna om mah bangin zahtak bawlin lungkim sakin, na nuntak leh na nu leh pa na lungkim sak na-in nu leh pa hong pia Pasian na lungkim sakna hi a, Pasian deihna a sem kha na hihman in thupha na ngah loh phamawh hi.
Hih lai na sim khit phetin lungngai in:
Na nu leh pa na hopih loh zawh bangtan vei sawt ta hiam?
Nu le pa in hong lamet dan na bang kei kha hiam?
Nu leh pa in tate hong lamen hong mitsuan gige hi cih phawk huai hi.
Na aw khum mahmah zak ding kal, na nu leh pa bil in ngak ngiungeu hi.
Pianna nu leh pa ten tate tungah lametna
Thu mang dingin hong lamen hi
Zahtak dingin hong lamen hi
A simmawh lo dingin hong lamen hi
A vak a tah kik dingin hong lamen hi
Khasiatna khitui luangsak lo dingin hong lamen hi
Zu le sa tawh kisialo dingin hong lamen hi.
Lamet nu lamet pa na hihi,
Hong ki muang cihna hi,
Lamet bang pah in, muan bang pah in
Lametna na hi.
Tuni na nu leh pa na bawl dan in na tate in hong bawl kik teh na lungkim ding hiam?
Nu leh pa zahtakna pen a mau pilna siam na tung kinga hilo in hong itna uh na thukkik theihna pen hi zaw hi.
Nu leh Pa sangin na-it zawk ding Pasian bek hi a, Pasian na it taktak leh nu leh pa muhdah kei niteh.
"Na pianna nu leh pa na simmawh
nop leh, na pianna nu leh pa sangin hong it zaw na muh teh simmawh in"
Laibu Saal / Zomi eLibrary
