LAISIM A MANPHATNA
Agelh ~ Tg. Cin Suum
Laisimsim leng kipilvaáng hi. Pilvaáng cihciang in mite mitheék kithei in, mite omdan kithei in, kuama'n hong khem zolo hi.
Laisimsim na pen khuaksawpna ahi hi. Puansilh nikten te anit ciangin saban tawh ihsawp mahbang in ih khuaksawpna ding pen laisimna ahi hi.
Laisimna pen hauhna ding kal masa hi. Mihau khempeuh in lai asimloh hang in, laisim khempeuh in nopsa zaw veve hi. Tua ahihman in laisim leng hauhna ding lampi honglak thei aa, laisung ah hauhna ding lampi om hi.
Laisimna pen hauhna kipna ahi hi. Sum le paai tampi nei in, ih hauh mahmah hang in pilna ihneih kei le ih hauhna kiptuanlo ding hi. Tua hile hih pilna koipan ngah ding ihihiam cih le laisimna pan in pilna ihngah ding aa, ih hauhna pilna uksak lehang hauhna kip ih neizo bek ding hi.
Laisimna pen thutheihna ahi hi. Ih nuntakna ah thu ih theihkei leh mihai tawh akibang ih hihi. Thu ihtheih ding a kilawm tampi om aa, ih zuih dingzong tampi om hi. Tua hi le thutheihna koipan ngahzo ding ih hiam? Laisimna pan ih ngahzo ding hi. Thutheihna pen vaálkhong cihbang omlo aa akisapna hun om teitei dinghi. Ih theihthu te a kisapna munmun ah ih zattheihna ding in lai tampi simciat ni.
Laisimna pen nunnemna ahi hi. Nunnem cihciang in migi, dik, lawmhuai cihna hi aa, pianpih nunnem zong om hi. Ahi zong in a tamzaw kuamah ki nunnem zolo aa, sintawm ding ahi hi. Tua hile koipan nunnemna kingahzo ding hiam? Laisung ah nunnemna ding lampi tampi om aa ihsim ding, ih sinding ahi hi. Ih pianpih pilna bek tawh ki mazang zolo aa, tampi ih sinbeh ciang in mi picing kici pan hi.
Laisimna pen belna, nasep nopna ahi hi. Lai at khempeuh le laibusung khempeuh ah thadah ding a at kuamah omngeilo aa, bel ding mah limgen pen uhhi. Laisimsim peuh leng ih sungtawng pan in belnopna, nasepnopna lungsim hong omlel ding aa, ih sungtawng aa ihtheih, ihkep laite in nasep hongsawl in, hong omkhongsak lo ding hi.
Laisimsim na pen itna neihna ding kal masa ahi hi. Ih pianpih lungsim pen muhdahna bek tawh kidim hi aa, kigualzo zolo hi. Leitung ih nuntakna ah itna mah a thupi pen hi aa, itna ih neih keile ih nuntakna amawkna ahi hi. Itna ih neihtheihna ding pen hih laisung ah ompah hi. Hih lai nasim le itna nanei thei ding hi.
Laisimna pen thuphanak ahi hi. Thupha cih limlim pen adeih huai le a manpha mahmah ahi hi. Ih pil theihna, ih khantohna khempeuh pen ih laisimna pan aa ih ngah vive hi zaw aa, lai mah pan in akhangto zaw i hihi. Tua ahihman in thupha ih ngah theihna ding in lai mah ih sim masak ding kisam hi. Laisim leng thupha koipan hong pai hi aa, koici bang in ngahthei ding ih hiam cih ihthei theipan ding hi.
Laisimna pen khansauna hi. Leitung ah asibaih nuam kuamah ih omkei aa, a khansau nuam vive ih hihi. Ih khansau theihna ding in lai ihsim ding kisam hi. Laisimsim peuh leng khansauna ding le khansauna ding lampi te ihsim kha teitei ding aa, tua ihsim laite zui in, ciing in, nuntak pih leng ih khansau ding hi.
Laigelh Siapa Tg. Cin Suum in Laibu Saal /Zomi eLibrary pan suahsak dingin ahong khak ahi hi.
Laibu Saal / Zomi eLibrary
