Khuaimeivak Li
Agelh ~ En Khat Thang
Khuaimeivak li kigualin innsung khat ah kivak khawm hi. Tua Khuaimei kivakte in thu gen thei ciat uh hi.
Khat in thu hong gen masa a, "kei pen Neih le lam huahna ka hi hi, mikim in kei hong deih uh a, ka omna mun ding hong zong tawntung uh hi. Ken zong mite kisapna te kahuh thei zel hi. Pawl khat in ahih leh, kei pen a thupi masa hikei teh hong cih ponguh hangin, mikim phial in hong deih mahmah khat ka hi hi." ci-in a gen khit teh thakhatin huih hong nung vat ahih manin tua khuaimei vak hong mit hi.
Khuaimeivak dang khat hong pau leuleu a, "kei ka min Itna hi. Khat veivei hong kimangngilh theih zel hangin, kei ka om lohna munte ah hong kilunggulh thei mahmah hi. Bangbang a hizongin ken mihingte khat le khat a kilemna ding, a kipumkhat na dinguh a piang sak den ka hi hi" ci-in hong kipulak khitteh, huih hong nung vat zel ahih manin hong mit hi.
Khuaimeivak dang khat hong pau zel a, "kei ka hih leh Kilemna ka hi hi. Na khempeuh a hoihthei pen dingin a kemcing tawntung ka hi hi. Kei vangin mihingte ki-it in nungta khawm liailiai thei uh hi. Kei bel mikim kisap den khat hi veng ee" a cih khitphetin, huih hong nung zel ahih manin hong mit zel hi.
Tua laitakin, Innsung ah tangvalno khat hong lut a, khuaimei mit thum teng a muh ciangin dahin hong kap hi. A cihna ding dang theituan lo-in, a mah kia phun kawmkawmin "bang cih peuhmah ding ka hia leh?" a cih lai tak, khuaimeivak khat a om lai pen hong pau in tangvalpa hong hopih hi.
"Tangvalpa aw! bangmah lung himawh peuhmah kei in! hih a mitsa khuaimei teng kei mah in, a taangkik dingin kong vak sakkik thei hi. Kei ka min Lametna kici hi. Lemetna na lungsim takpi tawh nong neih nak a leh, Neih le lam hauhna, Itna, Kilemna a vekpi in hong piakik thei kha ding ka hi aw!" ci-in hopih hi.
Hih i thu gelh in, Lametna kician i neih nak leh na khempeuh a nei thei ding i hih lamtak hong phawk sak banah supna, baina i thuak khak hangin lungkia lo-in, Lametna khat teitei tawh kalsuan ding a kisapna hong phawk sak hi. Job 14:7
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
