KHRISTIAN BIAKNA MEIGONG 3 OMNA INN PAN KIPAN
Agelh ~ Rev. Job Thawngno
Elimelek leh Nomi kiteeng uh a, tapa nih nei uh hi. Tuate in Mahloh leh Khilion ahihi. Tua tapate in zi hong nei tuak uh a, Orpha leh Ruth ahihi. Elimelek leh a tapate nih hong si mawk ahih manin amau innsungah numei 3 meigongin hong om uh hi. Gong thum kigawm innkuan hong suah uh hi. Meigong khat omna bek zong hamsa mahmah, khasiat huai mahmah kawmkal-ah meigong 3 cih pen a lunglen huai, a khasiat huai, a pangpa mahmah hong suak ta hi.
Nomi i thusiamna leh sawlsawlna hangin a monu Orpha a inn lamah ciah kik a, Ruth bel a ciah nawnlo dingin kiciam hi (Ruth 1:16). Tua ciangin Nomi leh Ruth amau mota pen a nualam ahi Bethlehem ah hong ciah kik uh hi. Nomi vaihawm siamna hangin Ruth leh Boaz hong kiteenga amau suan leh khak neih suksukna panin kumpi David hong piangkhia hi. David panin khang kizom suksuk a, Josef te dongin hong piangkhia hi. Josef pen Topa Jesuh pianna ahi Mary i pasal ahih manin Topa Jesuh pen “David suan Jesuh” na kici den hi.
Boaz leh Ruth ta Obed
Obed ta Jessi
Jessi ta David
David suan … Jesuh ahihi. Tua ahih manin Jesuh panin Khristian biakna hong piangkhia hi. Hiteng khempeuh i lungngaih khop ciangin Khristian biakna pen meigong innsungpan kipan khia hi. Topa Jesuh pen meigong innsungpan hong piangkhia hi ci leeng zong a kikhial lo ding ahihi. Meigong khat bek zong hi loin meigong thum kigawmna innsung pan hi lailai hi. Khristian biakna bulpi in meigong thum omna innsungpan kipan khia hi takpi hi. Matt. 1:1-15 sung sim suak le teh na kizom diudeu ding hi.
MATTHAI 1
Jesuh Khrih’ Khang Thu
(Luk 3:23-38)
1Abraham’ suan David, David’ suan Jesuh Khrih’ khang ciaptehna hih bang ahi hi.
2Abraham ta Isaac, Isaac ta Jakob, Jakob ta Judah, le a sanggamte ahi uh hi.
3Judah ta Perez le Zerah hi a, Tamar tawh a neih a ta ahi uh hi. Perez ta Hezron, Hezron ta Ram, 4Ram ta Amminadab, Amminadab ta Nahshon, Nahshon ta Salmon,
5Salmon ta Boaz, Rahab tawh a neih a ta ahi hi. Boaz ta Obed, Ruth tawh a neih a ta ahi hi. Obed ta Jessi,
6Jessi ta kumpi David ahi hi.
David ta Solomon, Uriah’ zi Bathsheba tawh a neih pen ahi hi.
7Solomon ta Rehoboam, Rehoboam ta Abijah, Abijah ta Asa,
8Asa ta Jehoshafat, Jehoshafat ta Joram, Joram ta Uzziah,
9Uzziah ta Jotham, Jotham ta Ahaz, Ahaz ta Hezekiah,
10Hezekiah ta Manasseh, Manasseh ta Amon, Amon ta Josiah,
11Josiah ta Jekhoniah le a sanggamte hi a, Babylon gamah Israel mite salin a kipaipih hun pawlin a suak ahi uh hi.
12Jekhoniah ta Shealtiel, Shealtiel ta Zerubbabel,
13Zerubbabel ta Abiud, Abiud ta Eliakim, Eliakim ta Azor,
14Azor ta Zadok, Zadok ta Akhim, Akhim ta Eliud,
15Eliud ta Eleazer, Eleazer ta Matthan, Matthan ta Jakob,
Source:
Meigongten Pasal mu ta! Tagahten Pa nei ta!
Laibu
Agelh ~ Rev. Job Thawngno
Laibu Saal / Zomi eLibrary
in hanciam in ki khenkik (type/typing) in hong ki suaksak ahi hi.
