KHANGTHAKTE LEH SEX.
Agelh ~ Tg. Samuel Nas
Tutungin sex tawh kisai tamlo kikum vat dih ni. Ahizongin sex pen greek pau in bang hi a, latin kam panin koi ci danin kilasawn hiam? cih lam hong hilo ding hi. Sex tawh kisai Pasian geelna leh koppih I neih masiah pen kikep siangtho a hoihna khawng hong hi pen ding hi.
Tuhun leitung khangto ah media huih in naakpi in hong nawksuk hong nawkto a, sex lam nga vive video leh TV program tuamtuam te ah tampi I mumu hi. Nisim a I zat namtui (perfume) leh haza (toothpaste) ciang dong phatna (advertise) dingin kizang ta mawk hi. Tua manin adiakin tuhun khangnote adingin ze-etna tuipi bang lian a, sex tawh kisai kithuhilhna maan a om kei leh hih ze-etna tuipi ah I kiat khit ding lauhuai hi.
Na nu leh pate tung panin sex tawh kisai genpihna na ngah ngei kei kha ding hi. Na lawmte tung pan hiam akl. magazine gina hetlo khawng panin thuhilhna manlo tampi hong kihilh ding a, "sex khawng bangmapi a ngaihsut ding hilo pi" cih khawngin zolna hong om thei ding hi. "Pasal na hihna langsak ve", "it takpi hi teh cih na lahna aive", "ciinglo hi teh cih na prove nadingin hoih" cih khawng, tua ciang "sex zatloh pen mi batlohna hi", "ki-it a kingai takpi I hih leh sex zat khawng bang phamawh se a hia?" ci a ong nawk pawlpawl zong om ding hi.
Bek thamlo in, koppih ding zi/pasal neih masiah bel kikem siangtho ning na cih leh, "tulai vai lo" akl. "kipiangthak sak" "ki Pasian thu um sak" cih khawnga nawkna zong na lawhtak hi thei hi. Hiteng khempeuh pen taksang ding hilo a, a thupi in ngaihsut ding hilo hi. A thupi pen zaw in ahihleh - Pasian ading, na koppih ading leh na mailam adingin na kikep siangthona pen hi zaw hi.
SEX PEN
Zac Poonen in, “Sex zat ding I lunggulhna pen ann leh tawldam ding I lunggulhna mah tawh kibang a, ahizongin hih lunggulhna pen a bawlpa in ama deihna bang taka zat dingin bel geelna na nei hi” na ci hi.
Sex pen numei leh pasal a kiten khit uh cianga zat dingin Pasian in a bawl hi a, Pasian geelna bang taka zatna pen hoihin manpha ahihlai takin, a geelna omsa peel a zatna in I nuntakna a siat nading kipatna bulpi hi thei hi.
Sex pen ‘Eden Bawhsiatna’ a omma peka Pasian in ana bawl khit ahihmanin sex limlim pen bel a sia hi zenzen lo hi. Siangtho hi. A bawlpa Pasian hi. Zatkhialh mana a sia suak bek hi zaw.
Tua ciang sex pen nupa kikalah zatlohin pen a khiatna omlo hi. Nupa kiteng khinsate in pen a koppih kiangah a itna a lahna ding, akizopna uh kipin akho semsem nading leh Pasian thusuak om mah bangin tu leh tate nei in a kikhah sawn nadingin zang zel uh hi. Siangtho in, zong manpha hi. Kitenna pua lamah ahihleh bel nuamtal nading ciang bek hi a, Pasian deihna tawh kituaklo hi. Mawhna hi. Nungzui hoihlo tampi zong nei hi cih i tel ding kisam.
ITNA LEH SEX
Tangval tampi in nungakte a khemna uh pen, “Kei nong it taktak leh kei adingin na kiphal kul, I lupkhop kul…” cih hi. Hih pen nungak tampi in na taksang kha in a sianthona uh manpha tak na tanlawh khin uh a, poi mahmah hi.
Itna leh sex pen akizom banga ngaihsut theih ahih laitakin atuam tuak ahihlam I theih kisam hi. Nupa kikalah ki-itna a sangpen kilahna in sex hi a, ahizongin itna pa hetlo in zong zattheih veve hi.
Sex zat ding lunggulhna lungsim pen pumpi ci leh sa ki-iplahna pana hong piang hi lel a, sauvei kimanglo in beipah hi. Itna maan in ahihleh kiten hun ngakzo a, zuau thu tawh luppih hong sawmlo ding hi. "I kiten dong ngak zo kei ning" hong kicih leh a ngak nuamlo, ngakzawh a sawmlo cihna hi zaw hi. Hi bang a ama nopsak nadingin vatzat a hong zat sawmte pen bel pel zaw lecin na mailam ding hizaw hi.
"Ki-itna –> Kitenna -> Sex" cih pen tuni dongin Pasian deihdan hi lai a, I lehbulh khakloh ding thupi hi. Pasian deihdan I zuihna in nungzui nei a, tuate in – akip akho ki-itna leh kingaihna, lungdamna, lungkimna leh thupha tampi ahi hi. A langkhat lamah, I lehbulh khak leh zong tua in nungzui mah na nei a, tuate in – kisikna, mindaina, lungkhamna leh thusia tampi ahi hi.
Koppih Ding Ka Neih Masiah Bang Hangin Kikem Siangtho Ding Ka Hiam?
1) Pasian Deihna Ahihmanin – Kitenna huang sung lo a sex zat pen Pasian deihna tawh kituaklo hi. (Exo 2:14) Hih pen Pasian in I suahtakna hong gaksak nop man hilo a, nung ciangin I nupa kal anop zawk nading hi. Nungak tangval lai in sex ana zang ngiengei khinte in pen a kiten khit uh ciangin a koppihte uh muanlahna tawh kidim den uh kici hi.
2) Kisikna, Minsiatna, Lungkhamna Leh Thusia Tampi Tawh Na Kipelh Nading - Kiginni zana tomvei sung I nopsakna pen nipi khawvak (monday) ciangin pen I kisik mahmah na leh I lungkham kipatna hong suak thei hi. Tua manin ahi thei tanah kidek teta phot pen hoihpen hilo hiam? Nuam sa hilhial in na khangno hun na zat ding pen Pasian hong deihsakna hi. Ngaihsun dih in, na sianthona leh na vang neihna pen kidek zawhlohna tawh khek ding pen pammaih lua hilo hiam?
Tua leh mite in nang pen a ‘easy’ mahmah dana hong kigen ding pen zong na lua hi. Pasian lim le mel sun a hong kibawl a, ganhing dana a ta mawkmawk ding I hi kei hi. Na sungah ki-ukzawhna leh kidekzawhnate zong kicing takin om cih phawk gige in.
3) Hong it man hilo in, ama nopsak nadingin vatzat in hong zang hi cih na phawk ciang a lungsim nat mahmah na tawh na kipelh theih nadingin.
4) Sex zatna hangin nungakte pen naupai vat thei dinmun ah ding gige na hih manun : Naupai kidalna ding zatui leh condom I cihte pawl pen 100% in muanhuai lo hi. Sex zatloh phot pen kidalna dingin hoihpen hi lai phot hi tuciang ah!
5) Pasian in nang adingin hong geelsaksa na koppih ding lian mah tawh na kiten theih nadingin.
6) Sex thanghuai taka zat man a natna lauhuai tuamtuam na ngah khakloh nadingin : Sexually Transmitted Disease (STD) nam tampi in om a, lauhuai kim mahmah hi. AIDS I cihte khawng bang zong tutan in a zatui ding kimukhia nailo cih I theih tek sa hi.
7) Na mailam ding (na future) na suksiat loh nadingin : Khangno tampi takin sex zatkhialhna hangin a mailam ding uh tampi siasak khin uh hi. Kidop kankan omlo.
8) Na it pen mah tawh na damsungin a nuam thei bang pen in sex na zatkhop theih nadingun!
9) Nang hong deihsakte in khangkhat na nuntak sung kisik om hetlo in nuam takin na zat ding kong deihsak manun!
HAKSA LUA LO DING MAW? BANG CIH DING?
Haksa kha mah in teh, ahizongin hih pen fight taak hi. Pasian kiang panin huhna ngen ila, nang mahmah in zong na lungsim ah kiten masiah a kikem siangtho dingin khensatna kiptak bawl in. Tua leh,
1) Nungak tangval lai a kikep siangtho a hoihna thu 9 ( a tunga te) phawk tawntung in.
2) TV, Internet leh video khawngah sex lam a nga thute panin kidawm in.
3) Guihtheih khamtheih tawh kisukha kei in. B’am cih leh mi in kham a neih ciangin a ngaihsutna khuak ciim nawnlo hi.
4) Lawmngaih na neih leh zong kuama omlohna lam vive ci kei in. Gamdaihna munah ze-etna hat diak hi. Peel in.
5) Zuau thu tawh hong kizolzol thei ding a, akl. neihsa lamsa sum leh pai khawng tawh zong e. Tua hun ciangin bangci kikep ding cih na lungsim ah geelkholhsa in nei in.
Pasalte In Nungakte A Zol Zel Dan Uh A Tangpi :
1) Lumkhawm le hang I ki-itna khang semsem ding – Ee maw... Hong zolna bangin na na luppih ziauziau takpi leh hong pi muh lua nawn khollo ding hi. Zong hong zahtak nawnlo ding hi. B’am cih leh numei ‘cheap & easy’ luate kuaman pi muhin zahtaklo pi uh e… thusim khat ong imkhia pak hing ei. 😉
2) Nong ngaih takpi leh lumkhawm ding hi hang – Hih kammal hangin nungak tampi a siatlawh khin tam hi. Hi bangin hong kicih ciangin “Nong it takpi leh I kitenni zan dong ngak ni. Itna taktak in ngakzo (true love waits) ci uh hilo hiam?” ci inla, hong hehsan leh zong phamawh sa kei in. Lungkimlo suakin hong khen leh zong phamawh sa kei in. Hong it taktak lo a, luppih ding bekin hong deih cihna hi lel hi. Hi bang mite adingin na neih manpha pen na sianthona pia phal ding na hiam?
3) Khatvei bek, tutung bek! – Khatvei na piak leh a nihveina in hong zom ngeigei hi. Khatvei bek tawh a lungkim takpi dingin ngaihsun kha kei in.
4) I kiphawk tawntung nadingin e – Natna lauhuai AIDS khawng akl. nau khawng ong paisak le bel kinawh phawk bilbel mah ding nai ve vua. Ahihhang hi banga kiphawkna pen a deihhuai pen hiam cih bel ngaihsuthuai.
5) Na ut kei leh midang zong ding hing – Halleluiah…Amen! Pheisalawt… Zong sak lel in. Hi bang mi, ama angsung bek a theite tawh na nuntak hun sung teng na zat khop ding pen nang leh nang vangik a kisuan hi lel ding hi teh. Paisak lel in.. midang va zong lel hen. Topa in a hoihzaw hong pia na ve.
6) Mite’n zong hih khin lel e - Zuau bulomtang hi ei hih thu bel! Zi/pasal neih masiah siangtho taka akikem dinga akiciam leh akikem takpi mi tampi om hi. Tam lua mai!
7) Lungkham kei in. Condom zang ding I vele, bangmah ci kei ni teh! – Bangmah ci kei kha mah ni uh teh, tu leh tu in bel. Ahizongin nung ciangin na lungsim nopmawhna leh mawh na kisakna vangikte hong theihpih nawnlo ding a, zong hong thuakpih nawnlo ding hi. Tua manin za-ah-za kidalna hoih pen leh a muantak penin sex zat nailoh pen mah hi phot hi.
8) Tu panin I kisinna kawmin na zang khawl leng, I kiten khit ciang nuam ding – Hih thu tawh kisai in bel kithukhual saka na mabuai keei kullo hi. Kiten khit ciang sin nading hun tam lel, siamloh nading mahmah omlo hi. Lungkham sih in!
MAWH KHIN KHIAL KHA KHIN NA HIH KHAK LEH
Koppih ding zi/pasal nei nailo pi in sex ana zang kha khin na hi thei hi. Kamsiatna hangin akl. theihloh manin zong hi thei… tua manin haksa sapi in ana nungta den zong na hi thei hi. Phamawh kei. Nuntakna thak tu-in na nei thei lai hi. Mawh khin khial khin na hih hangin Pasian in hong it lai veve hi. (Rom 5:8)
Kisik in, na mawhnate pulak in, Topa kiang lam na zuat naak leh amah in hong maisak ding a, hong hencip thangkhaute hong suut sakin, nuntakna thak suahtakna tawh hong pia khawm ding hi. Lai Siangtho in, mi khat peuh Khris tawh a kipawl ciangin mi lui ngeinate bei in mi thak suak khinta na ci hiven mate… (II Korin 5:17) Tun bel ka siangthona a hi thei tanah kikem ta ning na cih theih ding hong thupi ta hi. Tua dingin Topa’n thupha hong pia ta hen.
BONUS :
PORN (XXX lim hoihlo) et a hoihlohna –
1) I ngaihsutna siangtho takte hong nil khiatsak in, a thanghuai pipi tawh hong laihsak hi.
2) Masturbation hong uang sak hi.
3) Numei/pasal I muhdan hong siasak (nawngkaisak) hi.
4) Mite pen tua limah I muh bangin a huk takpi ding banga ngaihsutna manlo hong nei sak hi.
5) Hi bang zongsatna hoihlo in na nuntakna tampi in nawngkai sakin lam hong khialsak thei hi.
Source :
Tg. Samuel Nas || © thu hoih la hoih.
