KHANGNOTE MUN PIA NI
Agelh ~ GSPau
Singapore pen August 9, 1965 ni-in gam khatin hong ding hi. 1965 kum lai-in Singapore gam pen Kawlgam sangin zawng zaw pek a, ngasa ben' tawh nungta uh hi. Lee Kwan Yew in, "I mai ah kal tampi a na pai khinsa Kawlgam, kum (10) sungin i phak zawh nadingin delh ni," ci-in a gam mite hanthawn hi. Tua zawh kum (8) khit 1973 kum ciangin Singapore leh Kawlgam dinmun hong kikim ta hi. 2013 kum ciangin Singapore pen leitung-a gam haupen (10) sungah hong kihel a, Kawlgam leuleu leitung-a gamzawng pen gam (10) sungah i kihel hi. Singapore gam hih danin a khangtosak leh gamhau a suaksak pen Prime Minister Lee Kwan Yew ahi hi. Amah in thumaan tawh na seem a, golhguk deihlo hi. A nihna-ah nasep a siam leh a kiva takpi (qualify) te bek mah seemsak hi. A thumna-ah khangnote laamto a, mun pia hi. Pilna nei khangnote tawh kopin gam khan'toh nading geelkhawm, seem khawm uh hi. Tua teng tawh kum (50) sungin Singapore gam pen mipil misiamte teen'na Technical Center suaksak hi.
Sen gam ah Communist kumpi in a gam uh ukcip ahih manin gamzawng khat hong suak uh a, gam mi lah tam lua mahmah uh ahih manin an kham zolo uh hi. Deng Xiaoping in Sen kumpi hong sep ciangin Singapore-a Lee Kwan Yew kiang hawh a, "Bang cih leng Sen gam khangto-in, an kham ding ka hi uh hiam?" ci-in ngaihsutna va ngen hi. Lee Kwan Yew' ngaihsut piakna bangin kipuahphatna hong bawl takpi hi. A masa-in sumbawlna (Si-pua-zi) hong hong a, gamdang Company te Sen gam ah samin suakta takin Company hongsak hi. Tua hangin gam mite in sumlut hong nei uh hi. A nihna ah khangnote ukcip lo-in, laamto hi. Khangnote' pil nading leh khan'toh nading lampi tuamtuam hon'sak hi. Laisiam khangnote kumpi vaihawmna tawh gamdang ah pilna sinsak hi. Electronic lam leh IT pilna lam sinsak deuh hi. Tua khangnote in a gam uh nuamsa ngiat uh ahih manin sang a man uh ciangin Sen gam mahah hong ciahkik tangtang uh a, gam khan'toh nading na tampi hong seemkhia ziahziah uh hi. A sawt lo-in Sen gam hong khangto a, hong hau hi.
USA a va tung Zomi khangno pawlkhat in President's Education Award khawng hong ngah giapgiap uh hi. Hih pen khangnote a laamto gam hoih ah a om khak man uh ahi hi. Khangnote a laamto leh mun a pia gam khangto hi. Tua mah bangin khangnote a nengniam, a ukcip gam khangto ngeilo hi. Gam makai pawlkhat in khangnote hong pil khak ding uh patau uh ahih manin lampi tuamtuam tawh a maa uh khaksak kawikawi uh hi. Gam sung pilna sinna lam susia uh a, amau' tate teng pen gamdang ah pilna sinsak se uh hi. Hih dan gamte khangto ngeilo uh a, leitung-a gamzawng pente dinmun tung uh hi.
Biakna makai pawlkhat in khangnote laamto uh a, mun zong pia uh hi. Khangnote kiangah, "Mailam ah nomau mah makai ding hi uh teh. Tua ahih manin vision lianpipi hong nei un,” ci-in hanthawn uh hi. Tua bang pawlpi sungah khangnote khuasuak uh a, pawlpi zong khangto hi. Biakna makai pawlkhat leuleu in pawlpi ukcip uh a, khangnote mun pia nuamlo uh hi. Khangnote khuasuak dingin hong kithawi uh ciangin amau' panmun a tuh ding leh a suan' dingin ngaihsun uh ahih manin patau uh a, a maa uh khaksak niloh thei uh hi. "No khangnote in vision neih kul kei, makaite’ cih bangbang a kawi a mam ah hong mang lel un,” ci thei uh hi. Tua bang pawlpi sungah khangnote khuasuak ngeilo uh a, pawlpi zong khangto ngeilo hi. Tua danin a ki-ukcip khangnote khua dang leh pawlpi dang khatpeuh ah a va tun' uh ciangin a nuntakna uh hong kilaamto uh a, mite' suan' leh muan'in hong om thei uh hi.
Tua ahih manin gamvai ah ahi zongin, biakna sungah ahi zongin khangnote laamto-in, mun pia ni.
Laibu Saal / Zomi eLibrary
