Kampau Khiatsa Kivalhkik Thei Lo
Agelh ~ En Khat Thang
Hun khat lai-in lokho papi khat in, a lo vengpa tungah lungkim lohna thu khat hong nei kha ahih manin, nasiatakin vatawng gawp, va kogawp kha hi. A vengpa thu a ngaihsut khak simin lungkim zo peuhmah lo ahih manin, mi a kihopih khempeuh tungah a vengpa hoih lohna thu genin daisak dikdek hi.
Hun hong sawttoh sim khit ciangin, lokhopa zong hong kisuang thei bilbel hi ding hiven, a vengpa elzena a gensiat, a daisakna teng hong kisik petpet ta hi. Bang cih leng ka thugensate lakik in, mai mang sak thei dinga, ka vengpa lungkim sakkik zo ding ka hiam? ci-in a Siapa khat va dong khiankhian hi. Tua leh, a siapa in zong vasa mul ip khat kaikhawm sakin, tua vasa mul khempeuh lo zau sungtengah vawh sak hi.
Lokhopa zong lawp simtham depin, a Siapa sawl bangin vasa mul tampitak lo zau tengah a vawh khit ciangin, “Sia aw, vasa mul lo zau sungah ka vawh khin ta hi” ci-in hong kokik hi. A Siapa'n zong "Aw himaw? Tua na vasa mul khempeuh a vekpi-in va tawmkik in la hong ciahpih in" ci-in sawlkik hi. Ahi zongin, vasa multe huihin na len mangkhinin a tun, a banna kithei zo nawn lo ahih manin lokhopa cimawhin a Siapa kiangah hong guak ciahkik hi
A Siapa in thudamin hopih a, "lokhopa aw! huih in lenkhin a na muhkik zawh nawn loh vasa multe pen na thugen khiatsa kammalte tawh kibangin kitawmkik thei lo aa, kikhelkik thei nawn lo hi. A hoih dingin zong kilehkaih thei nawn lo hi. Tua ahih manin thu na gen simin hoih takin ngaihsun masa in na kidop ding mailam ah kong deihsak hi" ci-in thuhilh hi.
I kampaute pen vasa mul bangmahin zang peuhmahin genkhiat ding ol kisa thei hi. Ahi zongin, i gensa thu pen kidokkik themthum thei lo hi. Tuhun diak ciang video record khawng peuh na om pahpah lai hi. Lo zau sungah vasa mul vawh pen ol mahmah napi, vasa mul topkik ding pen ahi zolo thu ahi hi. Tua ahih ciangin i thugen sim, i kampau simin, a za, a ngai dingte thuak lah ding, na a sak ding peuhun i pau bapbap khak loh ding kidop huai peuhmah hi. "Kam siam sial lei sang, kam sia sial liau" cih paunak om mah bangin i kampauna tungpanin supna, liauna na ngawn kithuak lawh thei hi.
Tua ahihmanin kong it laisim sanggam aw, tomkal leitung nuntak hun sungin, midangte a ding pukna ahi lo, midangte a ding kilam behna, thathak a guan kammal hoihte zangin i kimlepam a nop semsem ding, a etlawm semsem dingin hanciam ciat ding i lunggulhna hi sak tek ni.
Khuaizu banga khum kammal om a, thaltang bangin hong dawt lum thei kammal zong om hi. Temta hiam bangin mihingte sih theihna ding a piang sak thei kammal zong om hi. I kammalte hangin mi khat peuh nuntakna kisiat lawh thei zen hi. Mi khat peuh na hamsiat khak bangin a tangtung thei khawng om zen hi. Tua ahih teh, hipa kampau, hi nu kampau le hipa, hinute kikal a kampau, kampau kici khempeuh ah khinkhai-in, kidawmin, itna tawh kidim kammalte gingkhia sak ding hi hang.
Source:
James 3:1-13, Ecclesiastes 10:12-14, Proverbs 15:1, 2,
Proverbs 21:23, Proverbs 17:27, 28
Hih Thute Manpha Sa Lua Ni Teh (Laibu)
Laibu Saal / Zomi eLibrary
