JOKHEBED (MOSES NU).
(Haksat pen hun laitak
Israel te’ makai ding, upnatawh a pantah khia numei)
Pai1; 2:1-11; 6:20; Gam 26:59; Heb11:23
Agelh ~ Rev. Dr John Thang Hum leh
Dim Lun Zam
Lai Siangtho sungah mi pawlkhat amin khatvei lian hong dawk a, nasep lian pipi sem in tuakhit teh amin dawk kik nawnlo pawlkhat om a, tuate lak ah, hih Moses pianna nu Jokhebed zong khat ahi hi.
Jokhebed pasal pen Amram hi a, Levi suan sung pan ahi hi. A mahmah zong Levi suan hi aa, a pasal Amram pen a-pano ahi hi. Hih nupa te sungpan Aron- siampi makai pa, Miriam, Laphuak siam leh Moses, Israel mite’ saltanna pan hon khia pa hong piang hi.
Paunak khat ah, “Nauluai avei khut in leitung uk hi,” cih om a, hih pen Jokhebed tawh ki bulh thei hi. Amram leh azi Jokhebed te Izip gamah sal in om uh a, nuntakzia haksa mahmah hi. Pharoah in Israel naungek pasal peuhmah a suah ciangin nausuaksak siama te’n a thah lup ding gen hi. Hih Moses pen nausuak siama te suaksak kullo in, anu in nasuak khin hi. Ahi zongin asuah khit teh a kep zia ding thuhaksa mahmah khat ahi hi. Ahang pen inn ah kem in mi khat peuhin thei leh naungek kilak sak ding aa, nu leh pa in haksatna thuak ding ahi hi. Ahi zongin Pasian in vai khempeuh tavuan la pa hi a, Amahmah in ahoih pen dingin sem hi.
Moses Ki selna
Anu leh apa in, Moses naupang thupi khat suak ding cih upna nei a, Pharoah thupiakna kihta lo in, kha thum sung sel hi. Hih pen upna mawkmawk hilo in, mailam thu piangding muhkholh theihna special upna ahi hi (Hebia 11:23). Ahi zongin kha thum khit ciangin, naungek zong kap thei ta ahih manin patau uh a, bangci kep ding cih a-innkuanpihte lungkham hi. A kep zia dinguh ki nak kup mahmah kha ding uh hi. Ahoih thei pen dinga a ngaihsut uh ahi, kuama pai mengmeng lohna Nal gun kiang, phaikung lakah sel ding ahi hi. Innkuan thukim na tawh, nauluai kikhuh thei pumpeeng tawh bawlin, Nal gunpiau, phaikung lakah sel in, a u-nu Miriam in ekcik dingin geel hi.
Anu, amah kem a suahna
Mihing in zingciangin i tungah bang piang ding i theikei hi. Ahi zongin amah muang a, a vai a ap mite tungah mihing sep theih loh na lamdang sem tawntung hi.
Moses, a innkuanpih ten Nal gun, pumpeng lakah nauluai tawh koih in, a u-nu Miriam in encik hi. Tua ni lian mah in, Pharoah tanu kisil ding a pai leh va mukha a, hoihsa in a nasemte kiangah a kep ding gen hi. Miriam in thakhat thu in vadelh pah a, naucing a kisap leh a ngahsak na ding gen hi. Kumpi nu thukim a, naungek anu Jokhebed kiangah va puak hi. Tu’n ahih leh lungmuang tak in anu kepna leh donna ngah hi.
Jokhebed in Pasian ngimna Moses hilh
Amram leh Jokhebed in upna leh lametna tawh a tapa Pasian piak vision nakpi tak gen pih hi. Nikhat ni Pharoah tanu in ama kiangah la kik dinga, tua hun teh kimu thei nawnlo ding thei ahih manin, tuama in Moses tungah asep ding khempeuh sem khin hi. Moses, Pharoah kumpi nu in a lak kik hun in mailam ah bang teng sem ding cih, anu leh pa makaihna pan in thei khin hi.
Tua bangin Jokhebed in upna, leh cihtakna tawh a tapa Moses khansuah hi. Hebia mite cihtakna leh lungtang phatna, Paul in agen na ah, “Israel miten Pasian upna lamah lungsim lian nei “(Rom 10:2) ci-in gen hi.
Hebia numeite cihtakna in a tate uh zong mi thupi suah uh hi. Adiak in pattah na lamah etteh huai mahmah uh hi. Naupang Timothy in Pasian lamah lungsim picing aneihna pen api, Lois leh anu tung pan angah ci-in gen hi. A tawpna ah, Moses a mite sal suahna pan honkhia ding, itna, veina leh upna aneih pen anu Jokhebed hang hi cih teltak ih thei hi.
Moses tangthu acing-a i theih na dingin Lai Siangtho lui sim ni. Hih sinna pen anu, Johebed tangthu ahih manin tu-a ciang gen ding hi hangh. Jokhebed min Lai Siangtho sungah hong kilawh kik nawnloh hangin a nasepna thupi leh ciapteh huai, etteh huai khat I tel hi.
Thukhhupna
Hih Jokhebed nuntakna in etteh ding thugil hong lak hi. Tulai in khangthakte sungah, Jokhebed bang mi ding muhhak mahmah hi. Pattah nasep pen a baihlo nasepna, a kiman thei ngeilo, thuakzawhna, belna a kisam mahmah ahi hi.
Hih ih sin Jokhebed nuntakna, a-ta Moses, Miriam leh Aaron te kep leh don nate I muh ciang etteh huai, thangah huai mahmah ahihna I mu hi. Hih zah ciang a, a sep zawh na uh pen Hebia laikhak ah agen bangin Pasian aw zakna nei in upna tawh haksatna a putngamna hang ahi hi.
Dotna
Jokhebed innkuan thu na theih bangin gen in.
Lai Siangtho ah Jokhebed bangci mi ci-in ciam teh hiam?
Jokhebed leh numei na tehpih theih a om hiam?
Tulai khangthak ten hih Jokhebed nuntak zia bangci etteh thei ding I hiam?