JOHN CALVIN (1509-1564)
(Mimal Tangthu Tomno)
John Calvin pen France gam Noyon kici khua-ah July 10,1509 ni in suak hi Innkuan cithei mawhlo pana khangkhia hi. Laipil mahmah hi. Akim apaam mite sia mahmah napi amah pen biaknathu tawh ki pantah ahih manin gamtat hoih hi. Lai hanciam sangnaupang te bek tawh ki thuah hi. Hebrew, Greek, leh Latin laite siam mahmah hi. Kum 23 a phak in ‘Seneca’s De Clementia’ hilhcianna bu gelh hi. Upadi pilna zong sin hi. Kum 26 aphak ciangin tuni donga biakna laibu minthang pen khat ahi, ‘The Institutes of the Christian Relation’ cih laibu Basel khua panin gelh hi. Latin lai-in gelh masa a, tua khitteh French in tei kik hi. Khenli suaha, akhen masa pen Pasian vangliatna leh nasepna, khennihna pen Khazih hong gupkhiatna, khenthumna pen Khasiangtho thu leh khenlina pen pawlpi leh kumpi kizop zia tawh kisai hi.
Pawlpi puahphate lakah Calvin in tapidaw upna laigil cianmuh pen hi. Mihing tavuan lam sangin Pasian thuneihna lam bulphuh hi. Piangthak thu-umte lei pianma a teelsa ihih lam hong telkheh hi. Mite ateelna ah zong mihing lam pana kilawm man hilo in Pasian in ateel nopte ateel ahihna pigen hi. Zeisu i uptheih pahphot pen ei ut thu a um cih bang hilo in Khasiangtho in i lungtangah na hong sep ciang bek-a ki-um thei hi ci hi. Tua Khasiangtho nasepna hong tung peuh leh ei pumpi nialzawh ding zong hilo hi ci lai hi. Ei hoih na tawh gupna kingah ahihloh zah khat in ei hoihlohna tawh zong kitaankik ding ahih lohna zong nak gen hi. Thu-um piangthakte suakta takin Pasian kiangah zuan thei ihihna zong gen hi. Thungetna thupina zong hilh hi. Zeksak namnih, tui kiphumna leh nekkhawm bek sang hi. Bishop, Elder, Pastor te a kibang ahihna zong na gen hi. Biakna lam pilna zong thupi sa hi. Calvin a pianna France gam hinapi upna thu hangin France ah sauvei om theilo ahih manin anasepna atamzaw Switzerland gam Geneva khuapi pan a hi hi. I gensa mah bangin Calvin pen Laisiangtho thuthuk ahih banga telmuhpen khat ahi hi. 1564 Kum asih ciangin Calvin phuat Reformed pawlpite Switzerland gam bek hilo in Europe gam dongah kizel hi.
Source:
John Calvin Biography,
Taitampi
Laibu Saal / Zomi eLibrary
