JEZEBEL NIHNA
(Pasian pawlpi suksiat nading a hanciam
Satan zat kamsang numei)
Mangmuhna 2: 18-28
Agelh ~ Rev. Dr John Thang Hum leh
Dim Lun Zam
Mangmuhna alian nih leh thum sungah pawlpi sagih te omzia Johan tungah ki lak hi. Hih pawlpi sagih te Asia Minor, tulaitak a Turkey gam sung ahi hi. Pawlpi sagih te dinmun in pawlpi dinmun leh mimal dinmun hong lahna ahi hi. Alian 2:18 pan, Thyatira khua pawlpi te thu agen na-ah, adang te tawh kilam dang khat hong om hi. Hih pawlpi in gamtatna pha nei in thuakzawhna leh, upna khauh cih te zong nei napi, a lelhkhak khat uh na om hi. Tua pen amaute lak ah kamsang kici numei Jezebel makaihna in pawlpi sung ninsak napi, niallo ahih man hi.
Hih Jezebel pen ami taktak hilo dinga, ama’ nasepna min (club) kitamsak hi dingin pawlkhat in um hi. A tunga igen, Jezebel masa mah banga, Pasian gam leh a minamte suksiat theih nading asung tawngah lut a, nasem hidingin ki ummawh hi. Min khat pen mi tampi in neithei ahih manin hih numei nu min mah hipah lel kha dingin zong ki um mawh hi.
Bangbang hi leh, hih numei in dawimangpa’ ngiankawi zangin, asunglam ngia hi napi tumul puan silh in, Pasian pawlpi susia ngiat dinga om ahi hi. Pawlpi ki suksiat dan namnih om akhat pen apua lam pan thatang hatna tawh pai in thu-um mite bawlsiatna hi a, akhat pen thu-um mite lakah, thu-um mah kineih in damdam in upzia, sanzia diklo, thuhilhna manlo guan simna ahi hi.
ANASEP TE
Milim mai ah kipia sate nek ding zol
Hih milim mai-a kipia sate nek ding leh nek loh ding pawlpi masate hunlai a buaipih uh thu khat ahi hi. Korintu pawlpite sungah hi cidan buaina na omngei hi. Paul in agen na-ah, “Milim pen nuntakna nei hilo a, milim kipia sate nekna hangin zong siatna om pahlo hi. Ahi zong lungsim ki zolo mite sia-leh-pha theihna na khual un. Tuate apuk ding leh, na ne kei un”, cih nagen hi (I Kor 8 leh Rom 14:2). Sawltak te thu kikupna ah Khristian ten milim biakna aa, kinei sa te nek loh ding vaikhak (thukham) pia hi (Sawl 15:29). Jezebel in midangte khuallo in milim biakna sate ne in midang ten zong anek ding sawl hiding in ki um hi.
Nu leh pa angkawm ding thapia
Hih numei in Pawlpi sungah numei leh pasal angkawm ding vahilh hi. Amah mah in tua bangin hih hi. Miten tua bang mawhna a bawl ngam na ding thuhilhna nei hi. Bang ci bangin thuhilh cih I theih loh hang, hih hun pawl a upna pawlkhat in, pumpi mawhna in kha sukhalo, kha ah suahtak theih nading in taksa a ut bangbang in om thei hi cih kihilhna om hi. Hi bang dan nam upna te zong hi kha thei ding hi. Kamsan theihna nei ahih manin mite huup a, ama gen peuhpeuh man ding sakha uh hi ding hi. A ma’ lampi a zui te ahi a, amah tawh amawh mite ahi zongin kisik kik ding Pasian in hun pia a, a kisik kik kei leh ka vat ding ci hi.
Lai Siangtho in kitenna (nupa hihna) pualam ah numei leh pasal omkhopna pen manlo ahihna gen hi. Banghang hiam cih leh tua in abawl Pasian thukhun palsat in Pasian lungtang na sak hi. Tua ban ah mihing te zong lungtang nasak in, natna zong piangsak hi. Korin pawlpite sungah zong thu-umlo mite lak nagawn ah a kiza ngeilo, apa zikik tawh mawh cih thu om hi. Tua pen khial zong kisa lo in, ki pak mahmah lai ci-in gen hi (1 Korin 5:1-2). Tua bang mite a pumpi Satan in a bawlsiat dingin na pia un, ci-in Pawl in gen hi.
Lai Siangtho lui ah zong Jacob’ tapa uu pen, Reuben in, apa’ omloh kal in, Jacob zite khat va mawhpih kha hi. Hih thu Jacob in atheih ciangin, na sa mahmah a, a sih kuan in a tate thupha apiak ciangin, Reuben hamsiat hi (Pian 49:3-4). Israel te tangthu kigelhna laibu khat ah, Reuben in a gamtatna ki naksik mahmah a, a tate tungah a tua cih khak loh ding thuhilhna nei hi, cih kigen hi.
Thyatira pawlpite in hih numei nasepna awlmawh lo in, en hithiat lel hi. Siatna ahihlam theilo uh maw, ahih kei leh thukhual lua maw, ahih kei leh genngam lo uh maw? cih ki theilo hi. Bangbang hi leh hunkhatlai a, Pasian mi (Israel) teltuamte milim biakna tawh a susia nuam numei Jezebel hih pawlpi sungah hong pai kik hi. Siatna khat peuh hong lut ciang khauhtaka anial aom kei leh ki zomzom ding a, midangte zong siatna sung tun ding hi. Hih numei a kisik kik kei leh, amah leh ama’ mawhpih te kavat ding ci-in Topa’n zasak hi.
Thukhupna
Hih Mangmuhna in agen Jezebel numei gamtatna bangdan tulai in pawlpi sungah hong om thei zelzel hi. Hih bang dan gamtatna aom leh pawlpi in pilvang takin i kidal ding thupi hi. Lai Siangtho in upna neute na mang un, ci bek a, thu-um mite puksak ding akilawh thei thuhilhna leh gamtatna te nial ding hong gen hi.
Dawimangpa pen akimu thei, akihtak huai, kii nei ahatu adawk viavua, khutcin sau vemvam a, hongpai ding hilo in, vantungmi mel pua in ki neih in, a it huai, adeih huai, a iplah huai mahmah-a hong pai ding ahi hi. Kha khentel theihna nei a, i nial ding kisam hi. Tua bang danin Jesu Khris pawlpi i kem ding hi
Dotna:
Jezebel a mimal in a om hiam? Ahih kei leh ana sepzia min pua a kipia hiam? Na ngaihsutna gen in.
Pawlpi sungah Jezebel bang mi hong om leh bang ci theih ding a, bangci sep ding ih hiam?
Pasian in banghang kisikkik hun ding pia hiam?
Bang cidan nam gamtatna leh thuhilhna ten pawlpi susia thei hiam?
