Jesu Va Ko Ning (I Must Tell Jesus)
(Hebrews 2:18)
Agelh~Zam Khat Kham
Elisha A. Hoffman (1839-1929)
Elisha A. Hoffman (1839-1929)
Christian hymn-te laka a kideihpen la khat ahi hih la pen Rev. Elisha A. Hoffman’ phuah hi a, amah America gam Orwigsburg, Pennsylvania ah May 7, 1839 ni-a suak ahi hi. Evangelical leh Presbyterian pawlpi tam simsim ah pastor sem hi. Kum 11 sung Cleveland, Ohio a om Evangelical Association Publishing House ah zong sem hi. Music lamah kipattahna kician a neih loh hangin la dawng 2,000 bang phuak hi. A la phuahte a lamal leh a la-aw, a nih-in phuakkhawm denzaw hi. “Tuuno Si Tawh Na Kisawp Nai Hiam?”(Are You Washed in the Blood), “Tawntung Ang Sungah Kei Khawl Ta Ing” (Leaning on the Everlasing Arms), “Is Your All on the Altar?,” “What a Wondeful Savior,” “Glory to His Name” cihte zong ama’ phuah ahi hi.
Laphuakpa Rev. Hoffman in hih la a phuahna thu hici gen hi:
Lebanon, Pennsylvania ah pastor kasep laitak-in Pasian in gimna haksatna tampi thuak dinga aphal nupi khat om hi. Ni khat a inn ah ka vahawh leh tua nu nakpitak-in lungkia-a om kamu hi. A lungsim khempeuh hong suahkhia a, “Brother Hoffman aw, bang cih nawn peuhmah ding ka hi hiam? Bang ci ding ka hi hiam?” ci-in hong thum ngaungau hi. Kei zong Laisiangtho mun pawlkhat tawh tha ka piak khit ciangin, “Na dahna khempeuh Zeisu’kiang nakoh ding simloh thudang omkei. Zeisu ko in” ka ci hi.
Tawlkat sung hong ngaihsun dedu a, thakhatthu-in a mai hong taii-in, “Hi mah ei, Zeisu ka koh ding hi ei. Zeisu va ko ning, Zeisu va ko ning” ci-in hong lungdam lua mahmah hi.
Tua nu’ inn pan ka ciahkhiat ciangin lungdamna a dim tua nu’ maitang ka mitkha ah teng den hi. Ka ciahna lampi tawntungah “Zeisu va ko ning…Zeisu va ko ning” cih kammalte vive ka bilkha-in ka zaza hi.
Inn a tun phet-in Rev. Hoffman in hih kammalte la-in phuak pah ngelhngelh a, leitung mun khempeuh-a a kideihpen la khat hong suak hi. A la-aw min pen “Orwigsburg” kici a, Rev. Hoffman pianna Orwigsburg, Pennsylvania kitamsak ahi hi.
Zeisu va ko ning, ka lungkham lua hi.
Kei guak in ka van, puakhak lua hi.
A man a mite, donkhial ngei lo hi.
Kei zong hong huh nuam, ding ka thei hi.
Zeisu va ko ning, Zeisu va ko ning.
Kei guak in ka van, puakhak lua hi.
Zeisu va ko ning, Zeisu va ko ning.
Kei hong huh zo ding a mah bek hi.
Ka lunggim nate, Zeisu va puak ning.
A mah lo om kei, lawm hongit ding.
A mah ka lungsim teng va ko khin ning.
Ka lunggim na teng, bei pah ding hi.
Zeh et na haksa, van gik hi zah tawh.
ki sam hi veng aw, hongpan pih ding.
Zeisu lo om kei, a dang ka muan zawh.
A man ka van teng hong dawn zo ding.
Source:
Christian Hymn-te’ Tangthu (Laibu)
Agelh leh laibu bawl: Zam Khat Kham
Laibu Saal / Zomi eLibrary
