JESU THUGENTEHNA (PARABLES)
Agelh ~ Lian Muan Kham Suante
THUPATNA
“Thugentehna” cih kammal pen Mangkam in Parable kici-in, Grik kammal Parabole (noun) pan a kilasawn ahi hi. “Para” cih ciangin “kiangah” (beside) cihna hi-in, “ballo” cih ciang “pai” (throw) cihna ahi hi. Tua ahih leh, Paraballo cih ciangin “thu/van nih (2) tehkak dinga koihkhop” cihna ahi hi.
Ahi zongin, mangkam a Parable cih pen tangthu tom ahi zong a deihna (thuah) nih nei cihna zong hithei hi. Tua tangthu pen mitkha a bawltawm hiam (imaginative), phuaktawm hiam (unreal story) hi loin, tangthu taktak bang mah (life-like story) ahi hi. Gentehna-in, Parable sung a mohte (bread) pen moh taktak mah hi-in, suangte (stones) zong suang taktak mah ahi hi. Parabole cih kammal pen Synoptic Gospels sungah 48 veitak kimu in, a Hebru kammal mashal pen 2 vei bek kimu hi.
1. THUGENTEHNA HILHCIAN DAN TUAMTUAMTE
A hun zui-in thugentehnate hilhcian dan tuamtuam om hi. A vekpi in gen khit dikdek haksa ding ahih manin, tomcik bekin gen ding hi hang.
(a) Mang Khiat (Allegorical Interpretation): Pawlpi masa hun laia-te in Jesu thugentehna te pen mang khiat uh hi. Mang khiat (allegorize) cih ciangin, thugentehna sung a kammal khempeuhin deihna nei ding a tuatna ahi hi. Gentehna-in, Augustine-in “Samaria Mihoih” (Lk. 10:30-37) a mang khiatna sungah, thukham hilh siapa pen Adam hi, ci-in; Jerusalem pen vangam in khia a; Jerikho pen kha (moon), tua in a kisia thei/sithei (mortal) ahihna lakin; gutate pen dawite (devil) ci-in; Samaria mihoihpa pen Jesu Khris hi, ci-in mang khiat gawp hi.
(b) Adolf Jülicher Hun Lai-a Hilhcian Dan (1888-1889): Adolf Jülicher in mang khiat (allegorical interpretation) pen sang thei loin, amah in Jesu thugentehna te pen mite ading a theihnuam leh deihna kician tak nei a kigen ahih manin, a tuam a hilhcian luat zong kisam nawnlo hi, ci-in gen hi. Tua ahih manin, Jesu thugentehna te pen mang khiat ding hilo hi, ci-a a gen pen tuni dong a misiamte san dan zong hipian tek hi.
(c) Adolf Jülicher Zawh-a Mite Hilhcian Dan: C. H. Dodd leh Joachim Jeremias-te in zong Jülicher mah bangin, mang khiat pen sang theilo uh hi. Dodd-in Jesu thugentehnate pen Pasian Ukna hong tun khitna (realized eschatology) lahna hi, tua ahih manin hih leitungah zong vangam nopna pen a vekpi-in (full) ahi kei phial zongin, kiciamkhol thei ta hi, ci-in gen hi.
Tua mah bangin Jeremias-in zong, Jesu hong paina tawh vangam nopna kiciamkhol thei napi (inaugurated eschatology), a kiningcing takin pen vangam bekah kiciam thei ding hi (the consummation is future), ci-in gen hi.
2. JESU THUGENTEHNA IN A DEIHNA
Jesu-in thugentehna a zat ciangin, a deihnapi penin Pasian Ukna tawh kisai thu mite in a telsiam theihna ding (simplify the Kingdom of God) ahi hi. Amah in thugentehna zangin Pasian Ukna thu a tangko ciangin, a thugen a za mite in theihnuam sa in, a deihna a telsiam pah theihna ding leh ciamteh nuam a sak theihna dingin gen hi.
Khatveivei ciangin, mite in Pasian thuman-thutak thei a, a kisik khak ding uh lau ahih manin Jesu in thugentehna zang hi. Gentehna-in, Marka 4:11-12 sungah Jesu in Pasian Ukna tawh kisai thusim mite in a theih khak ding lau ahih manin, thugentehna zangin thu gen hi. Banghanghiam cih leh, thu-umlo mite in Jesu thugentehna in a deihna thei hileh, Jesu thugente a uplohna uh khangzaw semsem dingin tuat ahih manin, thugentehna zangin thu genzaw hi. Tua ahih manin a nungzuite kiang bekah Pasian Ukna thusim pen gen hi.
Ahi zongin Jesu in mite a mawhna panun kisikkik ding a deihlohna hi loin, a zakzak uh hangin tel siamlo, telzolo ding uh hi, cih pen phawk hi. Theisak nuam mah taleh, amaute in telzo loin, a lungsim uh khauh semsemzaw ding, cihna ahi hi.
Jesu thugentehna pawlkhatte pen a deihna kitelcian sitset lo ahih manin, a thugen a za mite pen thu limtak ngaihsunsak hi. Tua bang a thu ngaihsun ding deihna tawh a thugentehna a gen hun zong om hi. Bang hang hiam cih leh, amaute in a ngaihsutna uh tungtawnin Pasian Ukna thu phawkthak zong nei kha thei dingin lametna nei hi. Tua banah, tua bang a thugenna in mite lungsim zong zo thei hi.
Pasian Ukna hong tun khitna thu lak hi. Pasian Ukna (Kingdom of God) tawh kisai thu pen a nuai-ah kigen ding ahih manin, tam i gen kei ding hi. Gentehna khat gen lehang, Matthai 12:28 sungah Jesu in bang ci hiam cih leh: “Pasian’ Kha in dawi hawlkhiatna ding vangliatna kei tungah hong pia ahih manin note lakah Pasian ukna hun hong kipan khin ahihna hong kilang hi” ci-in gen hi.
Jesu thugentehna pawlkhat in Pasian Ukna pen hong tung lai ding ahihna thu lak hi (e.g. Lk. 13: 6-9; 16:19-31). Hih banga a kigen ciangin, mite in nuntak a kidopna ding deihna tawh a kigen hizaw deuh hamtang hi (cf. Mt. 24: 45-51; 25: 1-30; Lk. 12:41-48). Ahi zongin, hong tun hun ding pen kibang loin; pawlkhatte pen hong tung pah ding danin kigenin, pawlkhatte pen a nung deuh ciang a hong tung pan ding danin kigen hi.
Thugentehna pawlkhatte in Jesu nungzui hoih suah ding dan (discipleship) hong sinsak hi. Gentehna-in, Luka 17: 7-10 sung a Nasempa Tavuan Thugentehna panin, nungzuite in thu man ding (obedience) a hihna kimu thei hi. Tua mah bangin, Matthai 21: 28-32 sung a Tapa Nihte Thugentehna panin, Pasian thu man ding ahihna kimu leuleu hi. Jesu thugentehna pawlkhatte in thunget (prayer) a kisapzia zong hong theisak hi (Lk. 18:1-8; 11:5-8). Tua banah, neihsa sum-le-pai zatsiam ding (right use of wealth) ahihna zong thugentehna pawlkhatte ah kimu hi (cf. Lk. 12: 16-21).
THUKHUPNA
Thugentehna te “man mah hi” cih a kitheihna pen, Jesu-in Ama hun lai a Palestine gam a thupiangte leh mite nuntakzia panin thugentehna te na gen hi. Jesu gen bang a thugentehna zanga thugen pen Ama hun ma-in kitam theihlo ahih manin, Jesu pen thugentehna a zang masa pen kici thei ding hi. Thugentehna te pen a kimawk gen hi loin, mite in Jesu thugente ciamteh nuam a sak theihna ding, telnuam a sak theihna ding, lamdang a sakna ding leh deihna kiciantaka, anei vive a kigen ahi hi.
