JESU THAWHKIKNA (THE RESURRECTION)
Agelh ~ Lian Muan Kham Suante
THUPATNA
Jesu thawhkikna tawh kisai-in gen ding tampi om kha ding hi. Lungdamna thu bute sungah zong gen dan kibang kim loin, “thokik taktaklo hi,” a cipawl zong om uh hi. Lai Siangtho sung tektek ah, Jesu pumpi pen kigukhia hi, ci-in hancingte in thu zasak uh hi (cf. Mt. 28: 13). Hih laibu neucik sungah, Jesu thawhkikna tawh kisai a kim takin gen ding haksa ding ahih manin, theih ding a kilawm ciang leh a manphatna tawmno i gen nuam hi.
LUNGDAMNA THU BUTE GENDAN KIBANGLO
Jesu thawhkikna tawh kisai-in phawk masak ding thu pawlkhat om hi. A masa penin, lungdamna thu bute gen dan kibang kimlo hi. Gentehna-in, Matthai/Luka sung en lehang, han (tomb) hawh numeite pen 2 pha in, Johan sungah 1 bek pha hi. Marka sung a “puanpak a silh tangval khat” (16:5) pen, Matthai sungah “vantungmi” (28:2, 5) kici hi. Tua banah, Matthai/Marka-in tangval khat tuak bek kilangin; Luka in tangval 2 kilang (24:4), ci-in gen hi. Bang hangin a tung a kibatlohnate om thei hi ding hiam? Lai Siangtho kigelh hun lai-in lai gelhna om nai loin, tangthu bang a kigensawn ahih manin, Evangelist-te theih dan kibang kimlo zong hithei hi. Tua banah, a sim ding mite (addressees) ngaihsun kawmin Evangelist-te in tangthu pawlkhat pen bawlphat nei uh hileh kilawm hi.
A mantakin cilehang, lungdamna thu bu 4-te lakah, Johan ngaihsutna (theology) pen tuamkai diak peuhpeuh hi. Synoptic Gospels in Jesu pen a thawhkikna hangin minthanna (glory) a nei danin genin; ahi zongin, Johan in Jesu pen a thawhkik ma nangawnin zong minthanna a ngah khin danin gen hi. Tua ahih manin Johan sungah, Jesu pen a thawhkik khit bek ciang hi loin, Ama nuntakna leh gamtatna mahmahin tua vangliatnate a lak khin ahihna thu kimu hi. Johan in Jesu pen sihna panin a thokik khinsa danin mu cihna ahi hi. Hih a kibatlohna tuamtuamte pen i gensawm pen hilo ahih manin, sau gen ding kisam lo hi. I gen nop zawk ahih leh Jesu pen “thokik taktak hi” cih thu ahi hi.
2. JESU THOKIK A HIHNA A KITELNA
(a) Judahte pen Zomite mah bangin Pasalte vaihawmna (patriarchal society) a zui mite ahi uh hi. Tua ahih manin, numeite pen thupisim khol loin, “teci” pang ding (witness) bangin pen a muan ngeingei loh uh leh a thugen uh zong a ngaih phat nop melloh uh ahi hi. Ahi zongin, Pasian in Jesu thawhkikna thu tangko dingin numeite na zang citciat se hi. Amaute in hangsan tak leh thumang takin (Mt. 28:8) vantung mite sawlna bangin Jesu thawhkikna thu pen tangko uh hi. Lai Siangtho siamte in zong, numeite in Jesu thawhkikna thu hangsan tak a teci a pan ngamna hangun Jesu pen “thokik taktak hi” cih pen kithei thei hi, ci-in gen uh hi. Jesu pen thokik taktak lo hileh, a thawhkikna thu pen tangko ngamlo ding uh hi. Pasian pen deidan a neilo Pasian ahihna thu numeite a kizatna tung panin kithei thei hi. Mite thusim loh leh muhdah mite zong Pasian in ama nasem dingin zang nuam veve hi, cih kimu hi.
(b) Hankhuk hawmna hangin Jesu pen “thokik takpi hi” cih kimu hi. Tua mah bangin, Matthai 28:6 sungah, “Hih lai-ah Amah om nawnlo hi. A gensa bangin thokik khinta hi. Hong pai un la, amah a kisialna mun hong en un” (cf. Mk. 16:6; Lk. 24:12) ci-in kigen hi. A kisialna munah Jesu a kimuh nawnloh ciang, Amah in Amah a that nuam mite leh Amah a siasak nuam mite tungah gualzo ahihna kilangsak hi.
(c) A thawhkik khit ciang a mite tunga a kilatna panin Jesu pen “thokik takpi hi,” cih pen kithei thei hi. Matthai-in, numeite tungah a kilat nungin (28:9-10), nungzui 11-te kiangah kilang leuleu hi (28: 16-20), ci-in gen hi. Luka-in zong Kleopas-te lawmta tung (24:13-35) leh Jerusalem-a a nungzuite kiangah a kilatna thu gen hi (24:36-49).
Mi khat tung bekah kilang hileh pen, Jesu thawhkikna a sang zolo om kha ding hi. Ahi zongin, Amah pen mi tampi kiangah kilang ahih manin, “thokik taktak” ahihna pen muanlah ding hilo hi.
3. THAWHKIKNA IN A DEIHNA PAWLKHATTE
(a) Upna thak hong guan hi. Mangkang-te in muanlahna genna dingin “Doubting Thomas” cih kammal nei uh hi. Bang hang hiam cih leh, nungzuite in Jesu thawhkikna thu a gen pen Thomas in a uplohna pan a kammal hong piang ahi hi. Ama kiang tektek-ah Jesu a kilat tak ciangin, Thomas in umzo panin: “ka Topa leh ka Pasian” (Jn. 20:28) ci-in Jesu bia hi.
Thomas bang a eima mittang tektek tawh Jesu muh a sawm laite ihih khak ding lauhuai hi. Mu lo a, a umte thupha ngah ahi uh hi, ci-in Lai Siangtho in gen hi (Jn. 20:29b). Nungzui dangte khempeuhin Jesu a muh ban uhah, amaute in Jesu thawhkikna pen zum loin tangko kawikawi uh hi. Banghanghiam cih leh, amaute in a si Pasian bia loin, a nungta Pasian bia ahih lam uh kithei uh hi.
(b) Jesu thawhkikna pen a lamdang thawhkikna hi. Lazarus thawhkikna tawh kibang loin, hih bang a thawhkikna a nei masa pen ahi hi (1 Kor. 15:20). Amah um a, a muang mite khempeuhin Jesu thawhkik bangin thokik in, sihna thuak ngei nawnlo ding uh hi. Tua lametna in Khristian-te nisimin tha khauhsak hi. Jesu in lau leh ling-a a om numeite (Mk. 16:8) tungah lametna thak a piak banah, Amah a zui mite in launa a thuak nawnlohna ding thu na ciam hi (cf. Mk. 16:7). Sihna guam thukpen nangawn-ah zong hong tonpih ding, cihna ahi hi (cf. Ps. 23).
(c) Thawhkikna in lungdamna thu tangko ding ahihna thu hong phawksak hi. thawhkikna leh Mission pen kikhen thei lo hi. Jesu in van a kah ding ciangin nungzuite kiangah “…pai un la, midang khempeuh, Pa min, Tapa min, leh Kha siangtho min tawh tui sungah na phum un” (Mt. 28:19) ci-in vaikhak hi.
Hih nasep pen Ama hong paikik matengin sep ding hi-in, tua bang a i sepna-ah Amah in a tawp dong a hong ompih ding thu zong hong ciam hi (Mt. 28:20). Hong ompih hun sung ding pen nikhat bek ci loin, kumkhat bek zong cilo a; “a tawp dongin” ci ahih manin, i lungkham masak ding omlo hileh kilawm hi. A thuciam a khello Pasian muangte ihih manin, Ama hong sawlna (commission) pen hahkatin i sep ding ahi hi.
(d) Jesu Thawhkikna in “hotkhiat tate” ihihna thu zong hong phawksak hi. A sihna hangin a thokik thei hi bek ahih manin, sihna leh thawhkikna pen kikhen thei ngeingei lo hi. Ama hoihna leh itna hangin, mimawh kimlai dik hong tangsakin, hoihna khat beek zong a neilo mite adingin, vantung kong hong honsak hi. Tua ahih manin, Amah pen eite omna ding mun a bawlkhol dingin pai masa in, thawhkik ni ciangin tua mun a zuan thei dingin i kithawi ciat ding ahi hi.
(e) Jesu thawhkikna in Pasian Tapa ahih lamtak zong hong lak hi (confessional). Tua mah bangin, Pasian Tapa ahihna thu pen Matthai-in limgen mahmah hi (cf. 4:1-11; 14:33; 16:16).
THUKHUPNA
Jesu pen thokik takpi-in, Ama thawhkikna pen zuau thu hilo hi. Johan-in, Jesu kitunna puan pen hoihtakin kikhep hi (20:7), ci-in gen hi. Jesu pumpi pen a kigukhia hileh, a kitunna puan hoihtaka a kikhep dingin lamet huai lo hi. Tua ahih manin, Jesu thawhkikna pen tangthu bawltawm leh phuaktawm hilo hi. A thokik Jesu in Kha pumpi nei a, khatvei leh mang in (immaterial body), khatvei leh kilang zel hi (corporeal; Lk. 24:31; Mk. 16: 9-14), ci-in Lai Siangtho in gen hi. Nungzui masate in Jesu thawhkikna thu a gen cim theihloh mah bangun, eite in zong cim hetlo-a i gen ding ahi hi.
