JESU KHRIS THAWHKIKNA PANIN
(Marka 16:1-14)
Agelh ~ Rev. Dr. J.M. Ngul Khan Pau
I Topa Jesu Khris thawhkikna tawh kisai ngaihsutna tawm Lungdamna Thu Marka gelh panin enkhawm ni. Thawhkikna Thu i gen ciang i phawk ding khat pen: Thawhkikna tawh kisai i ngaihsutna leh i sanzia in i gamtatzia hong hei hamtang ding ahi hi. Tua ahih manin thungetna nei kawmin hih a nuai a thu nam 5-te sim in lungngai khawm ni.
1. Hankong Panin Kua In A Suangpi Hong Likkhiatsak Ding Hiam (Marka 16:3)?
Topa’ thawhkik zingsangin numei thum han ah a luang paknamtui tawh tuam dingin pai uh hi. Amaute’n han omna mun hong tun ding ciangin, “Hankong panin suangpi kua in hong likkhiatsak ding hiam?” cih kikum uh hi. Tua hansuang pen a gol mahmah bek hi loin Rom kumpi in ciamtehna ginatak tawh a koih uh ahi hi. Hih suangtum pen pi 5 leh a langin lian a, a gihna kilogram 1816 kiim pha dingin ki-um hi. Rom galkapte’n tua suangpi a hon ding uh ciangin pasal thahat mahmah mi 20 bang kisam hamtang hi ciin kigen hi. Tua hangin numei thum bekin a hon zawh ding uh hi peuhmah lo hi.
Numeite’n a awlmawh leh a it manun hong pai uh a, tua suangtumpi in amaute khaktan ahih lam phawk uh hi. I Lai Siangtho in a mun a tun uh ciangin suangpi kilikkhia khin mu uh hi, ci hi. Tuni in nang lam panin Topa itna leh upna tawh na gamtat peuh leh na mai a hong dal ding suangpi zong ama’n hong lakkhiatsak ding hi. Na suangpi bang hiam cih ka thei kei a, ahi zongin nang na thei hi. Topa na it mahmah na tawh ama kiang na zuan peuh lecin nangma tha tawh na zawh ngei loh na lianpite zong aman hong zawhpih ding hi. Pastor Max Lucado in, “Na mualpi bang cia a lian hiam cih ngaihsun kenla, tua mualpi a khin theipa’ hopih zaw in,” ci hi.
2. Galilee Gamah Pai Ding Hi Cih Nungzuite Leh Peter Na Hilh Un (Marka 16:7)
Topa Jesu in a thawhkik ni-in, a nungzuite kiangah, “Galilee gamah pai ding a, tua lai-ah na mu ding uh hi,” cih hilh dingin numeite a sawl hi. Bang hangin a nungzuite cih gen khin napi-in, “Peter zong” ci sese hiam? Topa in Peter nungtolh leh lungkia mahmah a om ahih lam thei gige hi. A kimatsak zanin, “Ka thei kei hi,” ci-in thum vei sinsen a nial lamtak thei gige hi. Tua banga nungtolh bek hi loin ama lungsim sungah ama ginat lohna phawk tawntung ahih manin Topa mu dingin Galilee ah nungzui dangte a pai uh hangin amah a pai ngamloh ding dah hi. Tua hangin, “Nungzuite leh Peter kiangah” Topa in ci citciat hi.
Nang zong Topa na nusiatna lianlua, sawtlua, thuklua hi kha thei hi. Ama kiangah na ki-ap kik ding zong maizumhuai, amah phat ding takpi zong nang leh nang kisungsiatna tawh na kidim kha thei hi. Tua hangin “Peter kiangah zong” a ci Topa in nang zong hong sam lai hi. Ama itna in nang zong hong huam lai hi. Bangzah in na nutsiatna a lian zongin tuni in nang hong sam a, Laphuakpa in, “Nong itna bei thei hileh kei hong ban nawn ke’n teh,” a cih mah bangin Ama itna bei thei lo hi; nang zong hong ban lai hi. Tuni’n va zuankik in, ama’n hong ngak lai hi.
3. Thawhkikna Thu A Lamdang Penpen Gen Dingin Numeite Sawl (Marka 16:7-8)
Bangbang i gen zongin numeite mah Peter leh a lawmte sangin kipiazozaw cih i mu hi. Topa in numei pasal deidan lo hi cih i muh theihna dingin thawhkikna thu a pulak dingin a nungzui pasalte zang loin hih numei thumte na zang hi. Leitung mite’ muhna leh ngeina ah numeite neumuhna a om zongin i Topa in neumuh lo hi. Singlamteh tunga a sihna pen a thupit mahmah hangin thokik kei leh bangmah phattuamna omlo suak ding hi. Ama thawhkik tangko dingin numeite na zang hi. Tulaitak leitung bup missionary nasem lakah pasal sangin numei tamzaw dingin ki-um mawh hi. Pawlpi ngeina ah numeite vaipuakna lian i piakloh hangin Topa in ama thu gen dingin thawhkik ni zingsangin na teelkhin zo hi.
Minam khangto ciamtehna pen numei leh naupang i etzia, mun i piakzia, i lapsangzia tawh kithei baih penin kigen hi. Numeite i neu muh laiteng minam khangtolo i hih lam ciamtehna khat hi gige hi. Tua ciangin tanu sangin tapa i pibawl laiteng khantohna kisam mahmah lai cihna hi. Judahte ngeina-ah “teci” dingin numei na deih masa lo uh hi. Tua bang ngeina sungah Topa Jesu in ama thawhkikna “teci” dingin numeite na zang hi. “Kei numei leltak” ci-in kineusak ken, Topa in hong zatnopna om hi.
Tunai in Rev. Dr. Khaizakham in laibu khat, “Neu kisa kei in Topa’n zatnopna hong nei hi” cih gelh hi. Hih laibu sungah hoih ka sak phadiak khat pen - Neu kisa kei inla, kineusak den in cih hi. Pasian in nang leh kei midangte tawh kikim dingin a hong bawl i hi hi. I pilna, neih leh lam; i mel i puam mahmah hangin mite’ hong cih kisam loin i kineumuh khathei hi. Midangte i pimuh a, ei i kineu muh hi. Ahi zongin Topa in nang leh kei hong itna midangte tawh kikim ahih manin kineumuh loh ding thupi hi.
4. A Nungzui Nihte Kiangah Kilang (Marka 16:12)
Hih lai a nungzui nihte Emmaus khua lam zuan a ciah nungzuite ahih lam i thei hi. Topa sihna panin thokik cih a zak uh hangin umlo ahih manun lungkia leh maikhing mahmah kawmin a khua lam uh ah ciah uh hi. Amau kiangah Topa hong pai a, amau tawh Emmaus khua dong a tonkhawm uh hi. Lampi ah paikhawm ahih uh hangin na lungkia mahmah uh hi. Tua lampi ah tonkhawm bek hi loin Pasian thu Moses leh kamsangte gen khempeuh Jesu in na genpih hi.
Tuni nang zong na khualzinna lampi ah lungkiatna, maizumna na tuak kha ding hi! Lungkia kawmkawmin inn lam zuanin a ciah na hi hiam? Nang tawh hong tonkhawm Topa na kiangah om tawntung ahih hangin khattang kisa-in na lungkia hiam? Mite’n Topa’ hoihna gengen napi-in nang gen ding khat zong nei loin na om hiam? Tua bek hiloin hong ompih tawntung cih theihna leh upna bangmah nei loin na om hiam? I Pasian pen nang theihna ah kinga hiloin hong kamciamna ah kinga hi. “Kong nusia ngei kei ding hi,” cih leh “Leitung bei dongin note tawh kong omkhawm ding hi,” hong ci hi (Heb. 13:5, Matt. 28:20). Tua Topa in nisim hong tonpih a, ahi zongin na lungkhamna ama kiangah ko loin na om kha thei hi. “Vangik pua a gim mite aw, kei kiangah hong pai un; tawldamna kong pia ding hi,” a cih hangin na vanpi mah tawh nuntakna lampi ah gim leh tawlin na lampai kha thei hi.
A thokik Topa a um mite i hih hangin i gamtatzia i et ciangin a si suak Topa biate tawh i kilamdang kei uh hi. Amau lungkham bangin i lungkham hi. Thu-um mite leh thu-umlote kilamdang ding i hih hangin i kilamdang zo mahmah kei uh hi. Leitung leh a sunga nate lunggulh kei un a cih hangin thu-um mi Kha sunga kibual i cihte nangawn meetna ding ahih peuh leh phatmawhsak kineilo tawh i kibang uh hi.
5. Ama Nungzuite Tektek-in A Um Kei Uh Hi (Mark 16:11,13-14)
Mary Magdala in Topa thokik a muh khit ciangin nungzuite hilh dingin va pai hi. Topa thokik khin takpi ahihna leh ama kiangah zong kilakzo ahih lam a hilh hangin amau na umlo uh hi. Emmaus khua panin amau kiangah zong Topa hong kilak khin takpi hi cih a lawm nungzuite kiangah a gen uh ciangin zong na um tuanlo uh hi. Tua khit ciangin nungzui sawm leh khatte an a nek laitakun Jesu amau kiangah kilang a, amah a thawhkik khit ciangin a mu mite’ thugen umlo uh ahih uh ciangin amaute uplohna leh lungkhauhna a mawhsak hi.
Topa Jesu in a nungzuite’ kiangah a sih ding thu a gen simin a thawhkik ding tawh kizomsak den hi. Ahih hangin amau thokik takpi dingin na umlo uh hi. Nungzuite kum thum sung a thuhilh hangin upna thu-ah na ziakai mahmah uh a, uplohna lamah na lungkhauh zaw uh hi. Tuni in Topa thokik cih a um mite ahi bek hiloin a thokik Topa hangin nuntakna thak i ngah hangun upna sungah i zia-awl mahmah uh a, up ding mah hi cih thei napi-in i um ngam kei uh hi. Nungzuite mawhsak ding baih kha ding hi. Ahi zongin nang leh kei zong amau sangin i hoihzaw tuan kei uh hi. Topa na kiangah hong ding hi leh, nungzuite a uploh manun a tai bangin nang zong na tai kha ding hi. Um khiallo dingin Topa in thupha hong pia hen. Amen.
* * *
from: Pau Jamang < >
to: cinpuzomi@gmail.com
date: Fri, May 4, 2018 at 9:11 AM
subject: Thului
mailed-by: gmail.com
