INNKUAN PANKHIA: PA PASIAN
Agelh ~ Rev. Khoi Lam Thang
Pasian in numei le pasal bawl a, om khawmsak in, cipha in tampi pha un ci in thupha pia hi. Mipa amah kia a om ding piang thei salo-in a nakguh pan a koppih ding numei bawl hi.
Nupa kitenna pen Pasian' patkhiat ahi hi. Numei le pasal a kiten ciang bek-in a kikhenkhiasa cilesa a kigawmkik ahih manin pumkhat suak-in bukim pan hi. Tua hih manin Lai Siangtho in a kikhaam zolote kipi kiteng hen na ci hi.
Lai Siangtho sungah Pasian leh mihingte' kizopna pen nungak-tangval kingaihna (Gtn: Solomon la) tawh ahi zong, nupa kikal nuntakzia (Gtn: Hosea) tawh ahi zong na genteh hi.
Topa Jesuh in a masapen na lamdang a bawlna pen Kana khua mopawi lai hi a, tui: lenggah tui suaksak hi. Pawlpi pen mothak bangin, Jesuh pen motalpa bangin kigenteh hi. I lametna vangam nuam zong Tuuno mopipawi kici hi. Thu-um mite nuntakzia, sianthozia ding zong lawpna, lametna tawh siangtho sinsen a mopa a ngak monu bangin kigenteh hi.
Pasian leh thu-um mite' kizopna zong Pa-ta bangin kigen-a, Pasian mahmah mi bangin hong pian ciangin Pasian' Tapa i ci hi.
Tua hi a, mihing ngeina ahih man lel-a, a kipi a kitengte hilo hi hang. Cilesa kilunggulh man bek-a nupa suak-te hilo hi hang. A vaihawm Pasian hi a, Pasian vaihawmna sungah eite a kihel ihi zaw hi. Pasian piansak nasepna ah a kihel khawm dingin Pasian thupha piakte ihi hi. Mihing (numei le pasal) a piangsak: Pasian, kigawmsak in thupha a pia: Pasian, suan le khak pia-in innkuan a piangsak: Pasian ahi hi. Tua Pasian in minthanna leh vangliatna ngah tawntung ta hen.
Source:
SIHNA IN HONG KHEN MA TENG (Laibu)
Agelh: Khoi Lam Thang
