INNKUAN I CIH: THONGINN
Agelh ~ Khoi Lam Thang
Inn khat-ah nau kap aw, nuih aw khawng kiza zuaizuai in, lengla lawm le gualte sungtum pusuak in hong om leh innkuan gim hong nam deuh se hi. Ahi zongin tua innkuan sungah lungkhamna omlo, nuihna le maitaina tawh kidim kinken cihna hi khinpah lo hi.
Ahih hangin, zi nei lo, pasal neilo a, a kul a khaat a nuntak sangin zi nei pasal nei in tate tute tawh dah hun, nat hun thuak khawm ziaizuai pen nuam zaw tham lai hi ci in kigen hi.
Innkuan i cih: laigelh siamte' gelh tangthu hoih tawh kibang hi. Tua tangthu sungah nopna leh dahna, khasiatna leh lungkimna, lauhuaina leh lungmuanna, kihtakna le kilawmtatna, lungdamna leh lungkhamnate hel kim uh a, i sim ciangin hong nuisak, hong dahsak, hong dipkuasak hi. Tua bangte laibu hoih kici hi. Kitot hun le kilem hun, kisel hun le kiman hun, kinuak hun le kizol hun … cih bang a kihelh diimdiamna in nuntak bukimna hi zaw hi.
Innkuan i cih pen tuipi tung a paipai tembaw tawh zong kibang hi. Huih nem a nun laitak kilungmuang a, huihpi a nun ciangin, "Kalaisai! Kei aw! ngasa an ding ka hi ta veh maw" cih hun om thei hi. Huih dam hong nun bangin huih sia zong hong nung thei hi.
Innkuan i cih pen thonginnpi khat tawh kibang hi. Tangval suahtakna kikhumcip a, nungak nopsakna kol kibulh hi. Tua thonginn sungah ei mimal kihihsakna khempeuh kihencip hi. Midangte i kigualzawh sakna mun ahih manin i guallelhna mun ahi hi. Ei' deihna nial-in, mi' deihna i sepna mun ahi hi. Utna le deihzia kikumkhawm-a, nopna le haksatna thuakkhopna mun ahi hi.
Hong it lua ing, hong ngai lua ing, nang lo in nungta zo kei ning i kicih itna a gahsuah theih na dingin, "KEI" khempeuh "EI" tawh a kikhekna mun in innkuan ahi hi.
Source:
SIHNA IN HONG KHEN MA TENG (Laibu)
Agelh: Khoi Lam Thang
Laigelh siapa in Laibu Saal / Zomi eLibrary ading in phalna ahong piak ahi hi.
cinpuzomi@gmail.com
