INNKUAN I CIH: PUMBUK
Agelh ~ Khoi Lam Thang
Innkuan i cih pen "Pumbuk" tawh kibang hi. Siksek pa in sik mawkmawk khat pumbuk ah paipih-in halsan-in a deihdeih in a bawl theih bang ahi hi. A picingsa mihingte nupa suak-in i nuntak khop ciang, khat tung pan khat in thuthak sin-in, i nuntakna a kipuahtoto ahi hi. I sih dong a khangtoto dingte ihi hi.
Naupangte pen bang mah kigelh nailo "laidal" tawh ahi zong, lim a kila nailo maan film tawh ahi zong kibang hi. Innkuan sung pan naupangte gamtat-luhekzia, kampauzia, thungaihsutzia-te kisin hi. Nu kamsiam a neite hong kamsiam pahlel uh-a, pa maitai a neite hong maitai pah uh hi.
Innkuan i cih pen pilna namkim i sin theihna sangpi (University) tawh kibang hi. Innkuan hoih in a hoih a pha tampi phulkhia sak hi. "Luaiciang a vei khut in leitung uk hi" kici hi. Bangkua kipattahzia zui in leitung a uk ding naupang piang thei-a, leitung a giksak lel ding (qefukefajrav;) miginalo zong piangthei hi. Naupangte kisiat theihna a kikan ciangin, "A khankhiatna bangkua (nu le pa) tungah mawhpuak lian pen hi" kici hi. Banghang hiam cih leh naupangte sauvei a omna penna mun in innkuan sung ahi hi.
Innkuan i cih pen khaici kipawina mun (nursery) tawh zong kibang hi. A neu tung-a, a kituh khaicite mang nawnlo a, ni khat ni ciangin tua bang khaici namte mah posak ciatciat hi.
Innkuan sung mah pan i theihlohkal-in mihingte khattang nuntak a pian theihlohzia (No man is an island) a sinsin ihi hi. Naupangte hong khangkhia in guhletang hong picing a, cilesa hong malh-in damdam in hong bucing hi. Maizum mel theilote hong maizum thei in, hilhtawm gentawm kullo-in lawm hong ngai thei uh hi. Koppih ding zi leh pasal hong ngaihsun thei uh a, innkuan a thak hong piangsak uh hi.
Naupang khat a neu lai-in
lampi man tawnsak le cin
a teek dongin
lampial nawnlo dinghi.
Paunak 22:6
Source:
SIHNA IN HONG KHEN MA TENG (Laibu)
Agelh: Khoi Lam Thang
Laigelh siapa in Laibu Saal / Zomi eLibrary ading in phalna ahong piak ahi hi.
cinpuzomi@gmail.com
