I am the Boss of my family
Agelh ~ Khoi Lam Thang
“Zam i lei leh i tum ding, zi i lei leh i vuak ding” cih paunak ka za ngei hi. Khatvei lai-in ziletate vua ziahziah den napi, danglengte’ mai-ah kamsiam le thusiam a thuah huthut papi khat om hi. A bangkua-ah a thuthu in kigamta kei leh ngoltol den hi.
Nikhat lenglate kiangah,
“Ka zi bang kamsawi khat zong ka pau ngam loh, aktui bang a, ka dop khiankhian…” a cih leh, a paam pan a zi in, nial het loin, “Ka pa uh’ aktui bel, sik aktui hi’n teh” na cihsak hi, kici hi. Hih bang papi tampi ki-om takpi hi.
Zomi sungpan zahtakhuai ka sak nupa tampi lak-ah (Maj Cin Za Pau Retd) Paupi’ nu le Paupi’ pa (Vuandok Tun Thawng-te nupa) zong kihel hi. A mau nupa nuntakzia a cingin ka theih khit loh hangin, khatvei Falam a inn vuah ah ka hawh leh a inn sung kawm tungah a nuaia lai Manglai-in na kisuang hi.
I am the Boss of my family;
whatever my wife says should be done.
Ka bangkua ah kei a lian pen,
Ka zi’ thuthu-in kigamta ding hi
Hih laimal ka ngaihsut kikkik ciangin thupi sa-in ka mangngilh thei kei hi. Innkuan sungah PA lianpen ding a, NU cihcih in kigamta ding, cih pen a picing mahmah nupa kizopna hi, cih hong telsak mahmah hi. Democracy innkuan i cihcih hih bang ding hi mawk lo hiam, ka ci hi.
Ahih hangin, khatvei, Leipi siagam Pasal kipawlnate’ (Men’s Fellowship) makaihna tawh thusinna khat-ah innkuan thu ka hilh a, hih kammal ka gen leh papi khat in;
Eih! Tu’n a bel hong hi kei deuh eih!
hong ci khavat a, ka vekpi un, ka nui zaizai uh hi.
Ei mite sungah a huampi-in, Pasalte in innkuan makaih zaw hi hang. Innkuan sungah kumpi no sem nuam vive hi hang. Zite pen bangkua sung thunei ding le Pasalte sanga thu vaihawm zaw dingin lamen ngei lo hi hang.
Ahi phial zongin: na zi pen nang sangin a niamzaw, a thei lo zaw bangin na ngaihsut leh na zi “Sila bang zi” a suak dinga a pantahtah na hi hi. Na zi sila a suah leh nang a topa na hi hi. Nang na zi’ topa na suah ni in, a meigong na hi hi. Mite in “Educate a woman, educate a nation” ci tanghial hi ven!
--oo--
Source:
Sihna in hong khen mateng
Laibu saaL / zomi elibrary
