Hun Zeeksiam Ding Kisam Hi
Agelh ~ Kap Za Khai
Mi khempeuh in hun zeeksiam ding kisam hi. Banghang hiam cih leh hun zeeksiamna pen nuntakna zeeksiamna ahih man hi. Ahi zongin ei Zomite ahi zongin, mi kim ciat in hun zeeksiam nailo uh hi. Kumpi nasemte in zong hun zeeksiam lo uh hi. Pasian nasemte in zong hun zeeksiam lo uh hi. Mipite in zong hun zeeksiam lo uh hi. Tua hangin Zomite i khantoh zah dingin kikhangto zolo hi. Mi picing I hih zah dingin kipicing zolo hi. Tua ahih manin hun zeeksiamna pen bangzah in thupi ahi hiam?
Hun zeeksiamte pen nuntakna a zunsiamte, a zeeksiamte ahih bangun mi gualzote zong ahi uh hi. Tu laitak in mi pawlkhatte pen gualzawh citak in gualzo, minthan citak in minthang uh hi. Banghang hi ding a hiam? Amaute pen mi dangte sangin pil tuam zaw, thei tuam zaw, hat tuam zaw, thu mu zaw, hun tam nei zaw ahih man uh hiam? Hi tuan lo hi. Ahi zongin amaute in hun a zeeksiam man ahi uh hi. Hun zeeksiamna pen khantohna lampi ah a thupi mahmah siamna ahi hi.
American mi Hugo Ayelbarack pen university zong a kahngei mi hilo na pi-in American Athet-Hluttaw dongah a kahto zo pa ahi hi. Amah’n ni khat in nai khatta pelh loin Congress laibu sal ah laisim den hi. Nasep tam ta leh tawm ta leh nisim a laisim pelhsak ngeilo hi. Kum tampi sungin laibu tampi a simna hangin theihna leh telna tampi hong ngah a, American thukhen mangpi a suak ciangin ama pilnate American gambup in phattuamna leh noptuamna tampi ngah lawh uh hi. Hih in ama hun zeeksiamna hangin a gahkhia gah ahi hi.
John Bunyan zong ama thuhilhnate hangin thong kum (12) sung kia hi. A thongkiat sungin a zi leh a ta (4) te thong sung panmah in anvak lai a, thong sung pan nasep kawmkawmin thu thuk tampi ngaihsun ahihna tawh kizui in laibu minthang mahmah ahi Pilgrim’s Progress hong gelhkhia hi. Hih laibu pen Lai Siangtho khit a kikhawng penpen leh a minthang penpen laibu ahi hi. Adolf Hitler in zong ama tangthubu (Autobiography) hawmkhia a, awn khat val bang khawng hi. Ama tangthubu sung panin thu pawl khatte pen Hitler in thong sungpan a gelh ahi hi. Adoniram Jackson zong kawllai Lai Siangtho a tamzaw pen thong sungpan a letkhiat ahi hi. Hihte pen hun zeeksiamna hang ahi hi. Hun zeeksiamte adingin mun khempeuh pen nasepna mun leh hun khempeuh pen kham sangin a manpha zaw ahi hi.
Leitungah i nuntak sungin mi khempeuh in hun a kikim in i ngah kimciat a, ahi zongin hun zeeksiamna ahih leh mi khempeuh in kingah kimlo bilbel hi. Tua pen theih a kul, sin a kul thu ahi hi. Sangnaupang tektek hun zeek a siamte madawk zaw pah hi. Sangsia tektek hun zeek a siamte mah na tampi semzo hi. Pastor tektek hun a zeeksiamte mah daupai zaw deuh pah hi. I hun in hong panpih i lunggulh leh ei mahmah in i hun neih/ngahte i zeeksiam masak ding kisam hi.
Mi khat in ni khat in nai (7) sung a ihmut den sangin nai (2) khiam in a uk khat peuhpeuh sem leh khangto tuam mahmah ding hi. Nupite in hun-awng ngahsim mi kikaikhawm in mi a gensiatsiat uh sangin tua hun sungin laibu hoih khat peuhpeuh sim le uh kum (3-5) sungin nupi pil tampi hong suak ding uh hi. Hun tawh kisai kikupna neihsim in mi tampi in “man lah lua ing, na sep tam lua, buailua kaih cianga, hun ding om thei mahmah kei,” ci-in paulap nei den uh hi. Ataktak in tua banga paulap a neidente pen amau leh amau a kibuaisak hizaw a, hun ngah lo taktak leh a buai taktak hisam lo hi. Amau pen hun tungah ukna a nei zolo-te, hun ii To ahi zolo-te, leh hun ii salte ahi lel uh hi. Tua bang mite pen cikmah hunin khantohna taktak leh phungcinna taktak ngahzo ngeilo ding hi.
Hun zeeksiam lohna pen siatna bulpi ahih pah loh hangin tua pen a sawtsawt ciang ei leh ei kisuksiatna ahi hi. Nuntakna pen hun tawh a kilam ahih bangin hun itna I neih theih leh I nuntakna a it ihi hi. Hun I zahtak kei leh i nuntakna a zahtak lo ihi hi. Hun zeeksiamna leh khantohna pen kikhen theilo hi. Leitungah mipil i cihcihte, mi khangto i cihcihte, mi gualzo I cihcihte pen nasep tulza tampi a buai kawmkal panin a hun uh a zeeksiamna hang ahi uh hi. Tua ahih manin ei Zomite in zong hun I zeeksiam leh I hamphat nading hi a, I zeeksiam kei leh I hamsiat nading ahih manin I hunte pilvang takin zeeksiam sawmciat ni.
