Hong Paisan Ke’n, Migi Topa (Pass Me Not, O Gentle Savior)
(Luke 18:35-43)
Agelh~Zam Khat Kham
Fanny J. Crosby (1820-1915)
William H. Doane (1831-1915)
Hih la zong Fanny J. Crosby’ phuah la ngaih mahmah khatmah hi zel-a, hih laibu sungah ama’ phuah la tampi kihel khin ahihman in, ‘Pha zo ta’ ci-a hel ka sawm nawnloh hi napi-in hihla kihel lo-in hih laibu kicing theikei leh kilawm kasa-a konghel hi.
Hih la aphuak Fanny Jane Crosby pen America gam Southeast, New York ah March 24, 1823 ni-in suak hi. Kha khat leh alang (nipi kal 6) a phak ciangin a mitna-a, zatui kinuh khial ahih manin amit taw-a, akhan tawntung mit khua mulo-in om hi. A sih dongin New York City a St. John’s Methodist Episcopal Church ah pawlpi mi citak mahmah khat-in omden hi. A neutunga kipanin a Pi in thu le la kici khempeuh ah pantah hi. New York School for the Blind kici mit khua mulote’ sangah pilna sin hi. 1847 kum panin 1858 kum dong tua sang mah ah sangsia sem hi. 1958 kumin tua sang mah-a sem mite’ zahtak mahmah music sia Alexander Van Alstyne tawh kiteng uh hi.
A neu tunga kipan in laphuah lam a kivak hi a, ahi zongin a la phuahte leitung la pian vive hizaw hi. Kum 8 a phak laitakin a mit in khua a muhloh hangin a lungkimna hih bangin poem naphuak hi:
Oh, what a happy soul I am!
Although I cannot see,
I am resolved that in this world
Contented I will be.
How many blessings I enjoy?
That other people don’t;
To weep and sigh because I am blind,
I cannot, and I won’t.
A poem phuahte lakah, “Rosalie, the Prairie Flower” kici la aphuahna hangin $3,000 ngah a, tuahun adingin tawm hetlo hi. Church music lam-a minthang mahmah William B. Bradbury’ thuzawhna tungtawnin kum 40 aphaka kipanin gospel lamal bek hongphuak ta a, ama’ genna ah “tua gam sunga a lungnuampen mi” hongsuak hi. Fanny Crosby in la aphuah ciangin khukdin-in thungen-a Pasian’ makaihna zong masalo peuhmah-in la phuak ngeilo hi. A Laisiangtho sungah American lan (flag) khat tep liklek den se hi. Ama’ hun-a gospel laphuak minthang mahmah Ira D. Sankey, William H. Doane, John R. Sweney, George C. Stebbins, George F. Root, William J. Kirkpatrick, leh adang tuamtuamte tawh kithuah-in la tampi phuak hi. A khan sunga a laphuah pongpong dawng 8,000 val hi, ci-in kiciamteh hi. February 12, 1915 ni, ama’ kum 95 a phak laitakin i Topa’ kiang hong zuatsan hi.
Fanny Crosby’ phuah late lakah hihla “Hong Paisan Ke’n, Migi Topa” (Pass Me Not, O Gentle Savior) banah “Lungmuanna Thupha” (Blessed Assurance), “Amah Thei Ning” (My Savior First of All/I Shall Know Him), “A Sia Ding Honkhia In” (Rescue the Perishing), “Lam Tawntung A Hong Paipih Hi” (All the Way My Savior Leads Me), “Pasian Min Pha Ta Hen” (To God Be the Glory) cih langaihte kihel hi.
1868 kumin New York-a thonginn khat-ah Fanny J. Crosby hawh hi. Thongkiate’ tungah lungdamna thu va gena, Zeisu Khazih a san nadingun hanthawn hi. Thu a gengen laitakin thongkiate khat in, “Topa aw, kei hong paisan kei in!” ci-in hong kikokhia-a, a thugen bang zom theipaklo zawzen hi. Hih la a aw aphuakpa Wiliam H. Doane in “Pass Me Not, O Gentle Savior” kici thulu tawh la khat aphuah nadingin ngen hi. Fanny Crosby in zong tuabang la khat phuahding lunggulh mahmah-a alungsim tawngah thungen hi. Amah mahmah zong mit khuamulo ahih manin mit khuamulo mite khuamial gam sunga a nuntakzia uh tel mahmah hi. Jericho khua gei-a mittawpa phawk hi. Tua mittawpa khutdawhngen-in lamgei-ah tu hi. Mi honpite in nawk uh a, mite’ husa leh kheging za hi. Banghanga tua banga mi honpite in nawk-a, tua lampi ah kua paiding hiam cih adot ciangin, “Nazareth mi Jesu in hongnawk laitak hi” (Luke 18:37- ZIV) ci-in kigen hi. Nakpi-in kiko-a ahehpih ding ngenpah hi. I Topa’ kiang a kipaipih mateng kuama’ khoh zawh-in omlo hi. Hih laphuaknu in tua mittawpa in khua amuhtheih mahbangin kha lam-a mittawte in zong Pasian’ hehpihna hangin khua mu kikthei hi, cih la-a aphuah ahi hi.
Hih la a aw a phuakpa William H. Doane pen America gam Preston, Connecticut ah February 3, 1832 ni-in suak hi. Mihau mahmah khat hi a, factory president khat ahi hi. A om ngeinailo van-zat thak nam 70 phuankhia hi, kici hi. Music lam a uk mahmah hangin nasep-a neibel hilo hi. Tua hunlai-a gospel musician minthang mahmah khat ahi hi. A nuntak sung buppi Mount Auburn Baptist Church of Cincinnati, Ohio ah pawlpi mi-in om den-a, kum tampi sung Sunday School superintendent leh choir leader sem hi.
A la-aw a phuah gospel la dawng 2,000 val hi. Tuate lakah hih la, “Hong Paisan Ke’n Migi Topa” (Pass Me Not, O Gentle Savior) banah, “A Sia Ding Honkhia In” (Rescue the Perishing), “Nang A Hi’ng, Topa”(Draw Me Nearer), “Singlamteh Kiang”(Near the Cross), “Pasian’ Min Pha Ta Hen”(To God Be the Glory), “Zeisu Min Manpha Na La In” (Take the Name of Jesus) cihte kihel a, a tamzaw-in Fanny Crosby’ laphuahte a aw phuahsak denzaw hi.
Source:
Christian Hymn-te’ Tangthu (Laibu)
Agelh leh laibu bawl: Zam Khat Kham
Laibu Saal / Zomi eLibrary
