Hong Itzaw Ning (More Love to Thee)
(Philippians 1:9, 10)
Agelh~Zam Khat Kham
Elizabeth P. Prentiss (1818-1878)
William H. Doane (1832-1915)
October 26, 1818 ni-a America gam Portland, Maine-a suak Mrs. Elizabeth Payson Prentiss pen anuntak tawntung Khazih ompihna a nuntakpih ngiat misiangtho khat-in kiciamteh hi. A thei mite in, “a mitte te kikkek-a, ciamnuih gen thei laimawkin, milak kihel sangin ama’ inn sung nuam a sazaw nupi neu nu” ci uh hi. A lungsim aliat hangin a pumpi zawngkhal den hi. A nuntak tawntung dam hun cih peuhmah a neingei kiuhkeuh lo mikhat ahi hi.
A neutunga kipan mah-in laigelh siamna leh laphuah siamna nei hi. Kum 16 aphak ciangin khathulam ahi-a laigelhna lamah ahizongin asang mahmah-a kingaihsun Youth’s Companion ah a laigelhte kihelhel ta hi. Massachusetts leh Virginia ah tawlkhat sung sangsia sema, 1845 kumin a nung ciangin Union Theological Seminary-ah professor of Homiletics leh Polity asuak ding Presbyterian minister Dr. George L. Prentiss tawh kiteng uh hi. Mrs. Prentiss in a laigelhte khenkhia-in hawmkhiakhia a, a laibu gelh khat, Stepping Heavenward a cih bang USA bekbekah bu 200,000 kizuak zen hi.
“Hong It Zaw Ning” acih la bel Mrs. Prentiss in dahna lianpi athuak laitaka aphuah ahi hi. 1850 kumte in New York City ah Pasian’ na a sep laitakun a tate khat khuai uh hi. Sawt kihal lo-in a ta neupen in sihsan leuleu hi. Sawtpi sung kihehnem zo hetlo-in om a, a diary sungah, “Ang hawm, gim lua-a paat ngeiigneii pumpi, haksatna tampi ka thuakna hih leitung nusia-a taisat nop luatna lunggulhna” ci-in na gelh hi.
Tua banga dahna lianpi athuak laitakin Mrs. Prentiss in Thuciam Lui sunga Jacob leh Pasian a kimuhna ngaihsun hi. Dahna lianpi thuaka Pasian a kisappen laitakin Pasian in a na dawntuahna ngaihsun hi. Tua bangmah atuah nading thu nakpi-in ngen hi. Sarah Adams’ phuah “Nang Tawh Nai Zaw Nuam Ing” a cih la zong ngaihsunsun hi. Tua banga thungena a ngaihsutsut laitakin Sarah Adams’ a bangmah in Bethel-a Jacob tuahkhak thu tungtawnin ama’ teci panna hih la hong phuak hi. Tua nitak mah in a taang li-in zosiang hi, ahi zong kum 13 sung kuamah lak lo hi. A pasal nangawn lak lo hi.
1869 kumin tua lamal kikhenkhia a, anung ciangin Songs of Devotion labu sungah kihel hi. A sawt lo-in kampau nam tuamtuam-in kiletkhia a, Arabic pau leh Sen pau nangawnin om hi. August 13, 1878 ni-in Dorset, Vermont-a a khuakhal innpi vuah Mrs. Prentiss si hi.
Mrs. Prentiss in haksatna nakpi-a athuak laitakin, “I see now that to live for God, whether one is allowed ability to be actively useful or not, is a great thing, and that it is a wonderful mercy to be allowed even to suffer, if thereby one can glorify God” ci-in na gen ngei -a, khathu-a a picinna kimu thei hi.
Hih la aphuahna tawh kituakin, “To love Christ more is the deepest need, the constant cry of my soul….out in the woods, and on my bed, and out driving, and when I am happy, and busy, and when I am sad and idle, the whisper keeps going up for more love, more love, more love!” ci-in Khazih a itzawk ding a lunggulhna nagen hi.
Hih la aw aphuak William Howard Doane in Mr. Prentiss’ phuah la tawh kituak dingin a la-aw phuahsak hi. Wiiliam H. Doane bel America gam Preston, Connecticut ah February 3, 1832 ni-a suak ahi hi. High School a kah laitakin piangthaka, Baptist pawlpi sungah lawptakin lay-worker sem hi. A khangno lai-a kipanin sing tawh nasepna tuamtuam a bawl J.A. Fay and Company tawh kizom dena, 1860 kumin Cincinnati, Ohio ah a nasep tuah a, tualai ah president sem hi. Tua banga company president a sep lai-in nidanga om nailo vanzat nam 70 val phuanthak hi, ci-in kiciamteh hi. Cincinnati mah ah tengsuaka khuasung tuisung leh pawlpi sungah makaipi khat-in om hi. Kum 25 val sung Mount Auburn Baptist Church ah Sunday school superintendent sem hi. Music zong tampi phuaka, ahi zongin nuntakna-in nei ngeilo hi. La-aw dawng 2,200 val phuaka, labu 40 val kaikhawmin khenkhia hi. Christmas lasaupi catata zong tampi mah phuak hi.
Music lam a hanciamnate pahtawina in Denison University in 1875 kumin pahtawina Doctor of Music Degree pia hi. William Doane in tuni donga kisasa gospel la-aw ngaih tampi phuaka, tuate lakah, “A Sia Ding Honkhia In” (Rescue the Perishing), “Hong Paisan Ke’n, Migi Topa”(Pass Me Not, O Gentle Savior), “Nang A Hi’ng, Topa”(Draw Me Nearer), “Singlamteh Kiang”(Near the Cross), “Pasian’ Min Pha Ta Hen”(To God Be the Glory), “Zeisu Min Manpha Na La In” (Take the Name of Jesus), “Thungetna Hun Pha” (’Tis the Blessed Hour of Prayer), “I Ngak Laitak Hong tuak Diam?” (Will Jesus Find Us Watching?) cihte kihel hi. Elizabeth Prentiss’ phuah hih “Hong Itzaw Ning Topa” (More Love to Thee) la-aw ding aphuah banah, a tamzaw-in Fanny Crosby’ laphuahte a aw phuahsak denzaw hi.
Sum leh paii hau mahmah napi-in kiniamkhiat mahmah a, Pasian’ nasepna ah a hihzawh zah-a Christian lay-worker khat-a pang den mi ahi hi. Pasian’ nasepna adingin sum tampipi piaden hi. Cincinnati YMCA hall a pipe organ zong ama’ piak mah hi a, Chicago-a Moody Bible Institute ah Doane Memorial Music Building a kilam nadinga a kisam sum khempeuh zong ama’ piak mah ahi hi.
December 24, 1915 ni-in South Orange, New Jersey ah Topa’ kiang hong zuatsan ta hi. A nuntak sung tawntung Pasian in nakpi taka a zat mi ahi hi.
Hong it zaw ning Topa, Hong it zaw ning;
Khuk din’ a kong thumna, Nang hong ngai ding.
Hih bang hi kong thumna, Khazih hong it zaw ning,
Hong it zaw ning, hong it zaw ning.
Ni dang leitung nopna ka lunggulh pen,
Tu in kong deih nangmah, a hoih pha pen,
Tu in kong deih nangmah, Khazih hong it zaw ning,
Hong it zaw ning, hong it zaw ning.
Dahna natna thuak hang, phamawh sa lo,
Nangma sawltakte bang, la ka sa zo,
Ka sa khawm anau bang, Khazih hong it zaw ning,
Hong it zaw ning, hong it zaw ning.
Ka sih laitak in ah, nang kong phat ding,
Ka hutawpna in ah, ka vaikhak ding,
Ka ngen lailai hihmah, Khazih hong it zaw ning,
Hong it zaw ning, hong it zaw ning.
Source:
Christian Hymn-te’ Tangthu (Laibu)
Agelh leh laibu bawl: Zam Khat Kham
Laibu Saal / Zomi eLibrary
