HANNAH
(A sep ding azo ngiat numei hoih leh
Thupha deih a, angah dong a phu teitei numei)
1 Sam 1; 2:1,21
Agelh ~ Rev. Dr John Thang Hum leh
Dim Lun Zam
Hannah min pen “hehpihna dim” cihna hi. A pasal Elkanah pen Levi mi nam Kohath suante sung pan siampi khat ahi hi. A pasal it mahmah, a pasal maipha mu khat ahi hi. Elkanah in Peninah ki ci zi dang khat zong nei a, ta zong nei hi. Ahi zong Hannah tawh ta nei lo hi. Elkanah in azi Peninah pen Hannah tawh ta aneih loh cianga a neih(zi kik) hi dingin ki ngaihsun thei hi.
A ki upmawhna ah Sarah mah bangin ta aneih theih loh ciangin a nasem nu Hagar a pasal Abraham tungah a piak bangin Elkanah zong Hannah in a pasal tungah pia hi dingin up huai zaw hi. Hih hun lai in ta neihloh, adiak in tapa neihloh pen haksa asak uh thu khat hi. Nuntakna lungmuanna (aamahkhan) omlo bangin a ki ngaihsun hi. Ta neih pen thaltang um sungah thaltang dim tak a neih bang dan in genteh hi (Late 127). Ahang pen galte launa pan lungmuanna hong nei sak cihna hi. Tua ahih manin tapa neite adiak in gualzawhna khat a ki ngaihsun hi.
Tuam bawlna ngah numei
Kumsim in Jerusalem ah biakna pia dingin pai uh hi. Tua lai ah biakna a piak ciangin Elkanah in azi Peninnah leh atate biakpiakna sa (khuthawm), sa-tan pia hi. Ahi zongin Hannah pen azah nih pia den hi.
Elkanah in Hannah a tuam bawl phat diakna Peninah in amuh ciangin haza mahmah hi. Tua ahih manin Hannah gawtbawl den hi. Hih pen Hannah in thuakhak sa mahmah hi. Tapa nei hi leh hih ki sim mawhna bei dingin ngaihsun hi. Zi nih leh thum anei te, a ki aituam bawl, pasal maipha ngah deuh pen a om ding a ngeina hi. Ahang pen a tuamtuam om ding hi. Hi bang dan a om pasal te ahih leh lungnuam ngeilo hi. Hih pen Lai Siangtho lui ah I muh hangin Lai Siangtho thak ahthu-um mite khuan kipia lo hi.
Tapa lunggulh a thungetna
Hannah pen Pasian it mahmah khat ahih manin a pasal sep maban siampi na sem ding khat deih hileh ki lawm hi. Hannah in a lungsim (ta a deihna) a pasal tungah gen zel hi. A tawpna ah a pasal in, “Kei, tapa sawm sangin hoih zaw hilo ka hi hiam?” Ci-in na dawng hi. Ahi zongin Hannah in Pasian in semthei hi cih upna nei ahih manin thu na ngenngen hi.
Upna pen kua mah in khawlsak zolo hi. Upna in bang phukha ding en masa lo a, Pasian sep theihna leh a mong teng mu topah ahih manin lungkiatna nei theilo hi. Hannah in thu anget ciangin, a kam tawh a gingkhia in lokhia theilo a, amuk teng phunphun hi. Ahi zongin a lungtang sungpan a deihna akhauh mahmah na, a kam in gen khia theilo hi. Hih bang dan thungetna pen lungtang kahna kici a, thungetna man leh adik ahi hi. Rom alian 8:26, na ah, “Eite in thunget ding a ki lawm bang I thei kei a, Kha Siangtho in a ki gen theilo tauna tawh thu hong ngetsak,” ci-in gen hi.
Hannah thunget zia pen thunget mawkmawk te tawh ki bang lo hi. Tu hithiat loin ding to hi. Ngen mawk bek hilo in kap khia hi. Ngen ziau loin kamciamna bawl hi. A pasal in tel theilo hi. A kam pan in amal kitel ding a gingkhia lo a, a muk teng bek phunphun ahih manin, siampi pa Eli in amuh ciangin bangtanvei zu kham ding na hi hiam? va cih san mikmek hi. Hannah in, kei zu kham hi peuhmah keng, Pasian tungah thungen hi ingh, ci-in na dawng hi. Siampi Eli in zong atel ciangin thapia a, na thungetna Pasian in hong dawng hi, lungnuam takin ciah in ci in gen hi.
Hannah thungetna ki dawng
Thuhilh sia khat in Hannah thu hi bangin gen hi, “Hannah in ta neilo na pi, Pasian amuang lungtang nei hi,” ci-in gen hi. Pasian in lungtang tamkham a thungetna dawng hi. James in, Elijah thungetna a genna ah, “Elijah zong ei mah bangaa mi khat hi na pi, khauhtak aa thu anget ciangin kum thum leh alang sung guah zulo in, anget kik ciangin zukik hi.” (James 5:18). Hannah in ta nei a, “Pasian kiangah ka nget” cih na Samuel min pia hi.
Hannah in phatna la phuak in sa khia
Hannah lungdam dan ding ih mitkha in ki bawl thei hi. Alian 2 na-ah, a thugetna leh Pasian min phatna a phuah late sungpan ki mu thei hi. Tulai in tapidaw ten midangte’ lasakte i ngai a, zakzop i sa mahmah hi. Youtube sungpan ahi zong, lasa siamte hong pai in stage show hong bawl ciang ahi zong i lawp mahmah a i delh ngeingai hi. Khangno te bangin phone sung pan ipad sung pan music ngai in, lupsa na ngwn in a bil tawh thuah in ngai lai hi.
Pasian in music ngaingai te thupha pia hi zenzen lo a, ama’ tungah phatna lasa te bek thupha apia ahi hi. Paul leh Silas in thong sungah si leh nai tawh a om laitak Pasian phat in lasa uh hi. Kumpi Jehoshaphat in galsim ding a pai lai in Pasian min phat ding lasa te pai sak a, gal kuan hi. Tua pan in Pasian lungdam a, a gal teng khempeuh vat mai hi.
Hannah in Pasian in a thungetna adawn hangin lungdamna leh tha dimna gen hi. Pasian a pil pen ahihna gen hi. A mah a simmawh mite tungah a dawnna ding Pasian in a piakna gen hi. Migilo leh kiphasak te Pasian in thukhen ding ahihna gen hi. Nate ki leh bulhna, aneite tu-in kisam a, azawng ten aneihna gen hi. Pasian in ama’ mite hu ding ahihna gen a, Pasian amah abeel mite lamto a, a langpan te vatmai ahihna gen hi. Leitung khempeuh thukhen a, ama’ tha piakna tawh kumpi ten uk zo ahihna gen hi.
Hi a la phuak ih et ciangin Lai Siangtho sungah aom, Pasian kizeek khiatna (Attributes of God) khempeuh avek in huam kim hi. Alian 2 na teng taang khat khit khat sim pha kik in.
Tate pattah siam
“Pasian aw, tapa nong piak leh nang ading hong pia kik ning” cih dan thungen ki om hi. Ahi zongin thunget ngahna leh Pasian thu sungah pattah theihna pen ki lamdang hi. Pattat nasep pen abaihlo thu ahi hi. Ngim leh tup kician neih ki sam a, lungduai ki sam a, i gen ding Pasian itel mahmah kul a, eimau limhoih tawh i nuntak kul hi. Hannah leh a pasal Elkanah in a tapa Samuel siampi nasem dingin siampi Eli tungah ap hi. Samuel khangto a, Pasian mai leh mite mai ah maipha ngah hi. Samuel in Israel mite kum tampi sung makaih in, a nu lunggulhna tangtung hi.
Thukhupna
Hannah pen deihna kician nei leh, lunggulhna Pasian in hong pia thei cih um a, angah dong lungkialo a, angen, Pasian sungah lungsim khauh anei numei ahi hi. Tua ban ah Topa zong it mahmah a, Pasian nasepna thupi asa numei hi a, ama nuntakna pan i lak theih ding tampi i mu hi.
Dotna
Hannah leh Elkanah kizopna bang ci om hiam?
Tapa a deihna bang hang hiam?
Athunget zia bang ci nget hiam.
I nuntakna ah i lak theih ding bang om hiam
