Hailing Good Friday & Easter Sunday.
Rev. Suan Za Khup
Sihna leh Thawhkikna:
The first three centuries, Emperor Constantine hunma Christians te in Zeisu sihna leh thawhkina te pawikham khol lo uh hih tuak hi. Emperor Constantine hun khit tak ciang in, Christian (khazih thu zui) ih cih te pen galtai te bek hong hinawn lo in, a gam gam in pawlpi hong dingta a hih man in, ngeina, doctrine, bylaws, constitution te hong nei ta uh hi. Tua mah tawh kizu in, leitungbup mi khempeuh te zuih theih ding in pawi tuamtuam hong puahpha toto uh a, laisiangtho sung a, a hun a ki tel lian lo te na ngawn hong puah phapha to uh hi. A deihkaih uh zongh om, a bawlphat uh zong om, aman zongh om, a laih uh zong hong om toto ta hi.
Friday ni in Zeisu si:
Zeisu luang pen sawtvei ki koih thei lo ding hi, bang hang hiam cih leh a zingciang in Sabath ni a hih man in Judah te upna tawh kituak thei lo hi (cf, Mk. 15:42), cih kisik san a hih man in Friday ni in Zeisu si ding hi ci in a hilhcian om hi. Ngaihsut ding in, paisan pawi pen khamasa hun hi a, ni 14 sung pawikham zel uh hi, a 15 ni pen Sabath pi ni zong ki ci a, Sabath cih ciang in tawlngak ni hi in, nipi kalkhat sung a, ni 6 ni lo a dang sabaths nam tampi Israel mi te in zeh dan in tang (rest) uh hi. Zeisu in a genna ah, mihing tapa pen Jonah Ngapi gilsung ah sunthum leh zanthum a om mah bang in omding a, a ni thum ni in thokik ding cih zongh gen hi. Friday ni in si hi leh sun thum leh zan thum bang ci cin ding hiam major believer te ading in dotna bawlsak hang.
Wednesday ni in Zeisu si:
Hih upna a nei mi te in hih a nuai a bang in hilhcian uh hi. Jonah pen sun 3 leh zan sung Ngapi gilsungah a om mah bangin mihing tapa (Zeisu) zongh tuabang lian a hih theihna ding in Wednesday ni in sikha ding hi ci uh hi. Nithum leh zan 3 pen 24 hrs x 3 = 72hrs. Friday ni in si leh pen 72 hours cing thei ngeingei lo a, tua a hih man in Wednesday, Thursday (somewhere), and Friday te ah Zeisu si ding hi cih theologians honkhat te in buaipih uh hi.
Ni leh kha te sang in hong Gupkhiatna thupi zaw hi:
Zeisu sihni or thawhkikni pen tu a ih zatni lian zongh hilian kha lomai thei hi. A hizong in, tuani or tua hun in si hi cih a thupitna sang in, kei mawhna tang in Zeisu si hi, gualzawhna tawh a nithum ni in khansung pan in thokik khinta hi cih ih upna, tha ih laktheihna thupi zaw hi. Friday ni in Zeisu si hi a ci te a ding in tawm genbeh sak lai ni, nithum cing veve thei hi:
Ni 1 ni: Zeisu si 3pm, a sisa mikhat a ding in leisung hipah hi (Sheol):- Friday.
Ni 2 ni: Nitumma in kivuikhin, Joseph leh Nicodemas ten vui :-Saturday.
Ni 3 ni: Nisuahma bang hunhiam khat a, thokhinta, khanhawh ten munawnlo:- Sunday
Leisung ah zanthum mah cingveve thei a, sunthum zong mukha veve hi. Sun thum leh zanthum pen kampau zatzia leh, a laigelhziate uh et kik huai hi:
Judahte calendar: nikhat pen 6pm (nitum) hun pan in kipan a, a zingciang 6pm dong nikhat a hihi.
Rome te calendar simdan: Zan 12midnight pan in nikhat kipan a, a zing zankik 12midnight (24 hrs) nikhat a hi hi.
Latin te Calendar: 6am (nisuak) pan in nikhat kipan in, nitumciangdong nikhat a hi hi (hih mite a ding in 24 hrs ki limzat khollo in, sun khat leh zankhat ci in kisim toto lel hi).
Phawkding:
Laisiangtho a kigelhciang in, mitampi takte in a mau suahtakna, amau siamdannam, leh a mau hun a thupiang te tawh kizui in ih Laisiangtho hong at uh hi. Tua a hih man in, tradition tawh kisai a,hong at na mun uh zong om (eg., ngeina tuamtuam te, pawikhamdan namte), a hunzui kampau tawh lai hong gelh uh (eg., nitum, nisuak, khade: ataktak in ni paingeilo hi napi in, ih kampau dan a hi hi, scientific kam kizangh ngeilo hi. Scientist te in LST manlo hi, banghang hiam cih leh ni hongsuak in ni tum a, ni masa a hi hi [Gen] ci uh hi. A hizong in Scientist laphuak siam te in mangla tawh la hongphuah uhciang in, "when the sun goes down" hong ci veve uh a, la leh pau te pen scientific tawh a ki pelh a omngeina ahi hi). Tua a hih man in, Johnah Ngapi gilsung ah sun3 leh zan 3 om cih pen 72 hours linlian a genna hituanlo kha thei ding hi, leitung kampau tawh a kigen hi a, sunthum leh zanthum pen hitak pi ding a, a hizong in a hun lian 72 hrs gen lianlian cih hamtang ding kisam lo hi. Zeisu zongh sunthum leh zanthum sung leisung ah om a, a nithum ni in gualzawhna tawh hong tho kik hi (friday to sunday).
Thukhupna:
Mawhna neilo pi Singlamteh tung ah nang leh kei tang ding in khaina, satna, cilphihna, simmawh bawlsiatna namkimte leh khailupna nangawn hong thuak Vantung Pasian, nang leh kei Pasian, Zeisu hong itna mimal khat tung ah hong omden ta hen. Laisiangtho in a gen mah bnag in, gualzawhna tawh a nithum ni in hong thokhin zo ta, tua in ih upna leh lametna te hong nungta sak hi (cf. 15:1-4). Sihna' gu khempeuh a zozo hi. Thawhkikna thupha te nang leh kei a ding in thupha lianpi hi a, eite tung ah a hong piazo hi. Amen.
