HAGAR
(Hawl khiatna athuak numei)
Pian 16:, 21:9-17;25-12; Galati 4:24,25
Agelh ~ Rev. Dr John Thang Hum leh
Dim Lun Zam
Lai Siangtho sungah ci-leh-sa tawh nuntakna in hamsiatna hong tun ahihna Hagar nuntakna tawh na genteh hi. Hagar pen Egypt mi hi a, Sarah nasem ahi hi. Sarah in Hagar sila in a neih theihna ahang hi dan ahi hi. Abraham in Kanan gam ah kial a tun ciangin azi tawh Egypt ah tai suk hi. A tuntun na ah, miten azi asuh ding lau ahih manin; ka zi ci ngamlo in, ka sanggamnu hi ci-in gen hi. Alau mah bangin miten deih gawh hi. Egypt kumpi pa’n na laksak takpi hi. Ahi zongin Pasian in kumpi pa mang sungah Abraham’ zi ahihna leh, a sukkhak loh ding na gen hi. Kumpi pa’n hih thu atheih ciangin laulua a, azi (sarah) Abraham tungah pia kik in, a nasem dingin zong Hagar napia hi. Hi pen ahi thei ding thu ahi hi.
Pasian in Abraham tungah, ta kong pia ding hi, acih pen thakhat thu in piangpah lo (kum 25 khit teh tangtung pan) ahih manin hong lunghiang hi. Sarah mahmah in, “Pasian in ta hong pia ning acih pen kei tungtawn hi kei kha in teh”, cih upna nei ahih manin a nasem nu Hagar a pasal tungah pia hi. Tanglai hunin hi bang dan (sila nu pasal tungah pia in ta neisak) nasep ki zangh mahmah hi. Abraham in Hagar tawh ta hong nei a, amin Ishmel a phuak hi. Tua teng khit ciangin Sarah in zong tapa hong nei a amin Isek pia hi. Ishmel leh Isek hong khang khawm a, ahi zongin Ishmel in Isek zawhthawh bawl hi. Hih simmawh bawlna Sarah in amuh ciangin Ishmel leh anu (Hagar) pai khiat sak ding vai hawm hi. Abraham in ahih leh ama’ ta mah ahih ciangin nak it mahmah hi. Ahi zongin Pasian in kipsak a, azi’ thu angaih ding gen hi. Tua pan kipan Ishmel leh Hagar a sawl khiat ahi hi.
A tangthu i sim ciangn lungneu huai mahmah hi. Abraham in Hagar leh atapa tui um dim khat tawh sehnel gamlak ah sawlkhia hi. A tui puak hong bei ciangin naupang si dek ta a, Hagar hong kap ngeungau hi. Tua laitak Pasian in hopih a, “Hagar aw, lungkia ken, na tapa suante mi namlian suak ding hi” ci-in gen hi. Pasian in a mit hon sak a, tui omna lak in, tua pan tui dim kik in maban zom suak hi. Tuni in Pasian kamciamna tawh hih Ishmel suante minam lian hong suak uh hi. Tuni a Arab mi ci-a I theih mite Ishmel suan te hi a, leitungah mihau, zinan pianna gam te, minam lian a ki ngaihsun ahi hi.
Hagar ki phatsakna
Hagar agai ciangin kiphat sakna lut a, a tonu Sarah simmawh bawl hi. Hih thu Sarah in thuak zolo ahih manin a pasal tungah gen hi. Abraham in, na ut bangin bawlin acih ciangin Sarah in zong Hagar thunei theilo dingin koih hi. Hagar in Abraham Sarah khut sungah a om lam theilo hi. Tua ciangin Hagar zong inn pan tai khia hi. Lampi ah, vantungmi in na hopih a, ciah kik in, a tonu tungah a ki ap ding gen hi. (Hagar nih vei pai khia a, hih pen a naupaai laitak a, amasa a pai khiatna hi).
Thu-um mite Kha nuntakna lim
Hih Hagar tangthu in tulai Khristian te khalam nuntak zia lim hong lak hi. Sarah pen Kha Siangtho etsakna hi a, Hagar pen ci leh sa etsakna hi. Ci leh sa in Pasian gam luah zolo ding ci hi (1 Cor 15:50). Vantungmi in Hagar kiangah, ciah kik inla na tonu kiangah ki-ap in, ci hi. I pumpi leh ci leh sa in Kha Siangtho vangliatna leh makaihna nuai ah ki-ap in thu man’ ding ahihi. Tuni in I omzia te Kha Siangtho makaihna nuai ah I om kei leh buaina om den ding hi.
Thukhupna
Hagar pen a tonu ading nasem a citak, thuman nasem khat ahi hi. A tonu thu aman loh man leh, nasep a thadah manin hawlkhia ding cih kimu lo hi. Ahi zongin a theihloh thu pen, kiphatsakna in pukna piangsak thei cih pen thei khalo hi. A tonu zong a pasal Abraham in ama pumpi zah a, a-it ahih lam tel lo hi. Tua ahih manin a tonu lutungah, a khe nganuam kha hi.
Ahi zongin Pasian in mihing mawhna amai sak Pasian ahi hi. Ishmel ading a khual Pasian ahih manin, thupha pia veve hi. Tua ban ah Ishmel pen Abraham ci leh sa mah ahih manin Pasian in nusia lo hi. Hagar in a tapa mun khat ah nusia cip ningin pasal dang khat zong ning ci hetlo in, a tapa mailam ding nak khual mahmah hi. Hagar pen leitung thugen in ci leeng, numei thupi khat ahi hi.
Dotna
Hagar koi pan hong pai a, Sarah tawh bangci ki zop theih kha hiam?
Hagar hoihna leh thanemna gen kak in
Hagar in thu-um mite kha nuntakna bangci lim hong mu sak hiam?
