Gensiatna
Agelh ~ LTTuang
1. A diklo, a hoihlote kigen nuam kha thei hi. Tua genna pen i gensiamkei leh, gensiatna dan bang kha thei hi.
Tua ahih manin, ei genna tawh kikhel tuanlo dingte pen genseloh mah ei adingin hoihzaw hi. Deihsak aa gen a kul leh mimalin genpih ding hoihzaw hi. A deihsak lah hituanlo napi, i gen nop leh bel, mi gensia mah kitang ding hi.
Thu khatlai ah, amau kikhel nading a gen hilo aa, a za a ngai kha mite ading lam a pialloh nading uh, a gencian nuam cih bang zongh om thei hi. Tua bang ciang, kammal zat siam huai hi. Tua hikei leh, i gente sang' ei mah hong kitelkhialzaw, hong kineumuhzaw, hai hong kisazaw thei thu hi.
2. I mai aa paite bek kimu, i phak zawhloh, i bat zawhloh, i dem zawhlohte bek kigensia, singkung a gah bek kideng cih dan genna tuamtuam om hi.
Hih bang dan genna tuamtuamte bel pawlkhat tading maan kha ding hi. Pawlkhat tading kihehnepna zongh hi thei lel hi.
A taktakah gen thuak khempeuh a gah cihna hilo hi. I mai aa pai khempeuh zongh ei sang' hoihzaw siamzaw thupizaw cihna hi tuanlo hi.
*Ahi zongin, i phak zawhlohte kigensia cih sangin i gensiatte kipha zolo ka ci nuamzaw hi. I dem zawhlohte kigensia cih sangin i gensiatte kidem zolo ka ci nuamzaw hi.
I gensiat hun laitakin amau hong baan zokei takpi kha mah unteh, ahi zongin hun khat ciang i gensiatte pen i bat zawhloh hong lehsuakzaw kha thei uhhi.
Tua ahih manin hong kigensiat leh, hun khat ciang, amau zahtak, amau hong eng khat a suak ding hizaw ing cih theih huai hi. Mi nungah i om nopkei leh, khangual i bat nop leh kuamah gensiatloh ding mah hoihpen ka sa hi.
3. Pasian nasem min pua limlim bel, khial ta leh khial takei leh, gensiat khak hetloh ding thupi ka sa mahmah hi. Thukhen ding pen ei i hikei aa, Pasian bek ahi hi. Pasian in theihloh neilo ahih manin Pasian tungah ap hithiat lel ding hi.
4. Gamleminam vai ah bel a semte gensiatna tawh kipelhlo ding hi. A uukte in zongh hoihlohna kisapna hawmthawhna cihte atawm atam kipau kha mah ding hi. Ahi zong, atung aa i gensa mah bangin kammal zat siam aa kidawm takin pau theih ding kisam hi. Tua nangawn gen hun ding le genna mun ding khentel theih huai lai hi. Tua in i picinna hong kilangsak ding hi.
5. Mimal vai aa kipan thu khat peuhpeuh ah hong kigensiatpih leh kuppihlo, paupihlo aa om ding hoihzaw hi. Tua mah bangin, ei hong kigensiat leh zongh dawngkiklo, paupihlo aa om ding mah hoihzaw hi.
6. I ngaihsutzia, i deih dan a kibatloh man bekbekin gensiat ding pen dik khin hetlo hi. Unau, nupa kaal nangawn ah ngaihsutnate kibangkimlo hi. Ei hoihsak dan mah a hoihpen cihna zongh hi khin tuanlo ding hi. I sep nop, i thugente a kibatloh ciang ei sang' a haizaw dan, thu ngaihsun theilozaw dan, khuamulozaw dan bang khatin tuat pahpah ding hilo hi.
7. A khialh manin gensia, kosuk pah cih dan zongh dik khin hetlo hi. Mihing pen kicing cih bang omlo hi. A khialh laitakin thapiakna pen gensiatna sang' muibunzaw hi. Ei zongh khiallo ding cih sinsenna thu omlo hi. A semte in a semlote sang' semzaw ahih manun khialzaw kha thei mah hi. Ahi zongin khialh ding lau aa a sem nuamlote zongh a seploh limlim uh pen khialhna na hi thei lai veve hi.
8. Amau tungah kingak kullo, amau huhsa, vaksa aa omlo cih peuh leltak tawh gensiat ding khawng haksa a salo kiom thei hi. Tua pen haina nam khat hi.
8.1 Amau tung pan huhna ngahlo ahih manin gensia cih zongh kiom thei lai hi. Tua pen lungsim hoihlohna hita hi.
8.2 Amau i zahtakloh man, thupi i sakloh man tawh gensia ziauziau cih pen picinlohna hi. Dai khinkhianin om ding hoihzaw thamtham hi.
8.3 Amau tung ah lungkimloh man, heh man khawng aa gensiat zongh, ei mimal vai hi aa, mi lak ah kisamlo hi. Ei tungah a hoihloh hang' mi dang tampite tungah na hoih leh, ei pen gal a kihau semsem kisuak theizaw hi.
8.4 Kipilsak nuam aa mi' mawhna zongzong cih zongh om thei lai hi. Tua pen mite in pilsa nailo ahih man hizaw hi.
9. Hamphatna, lametna, pawl le gaal cihte tawh kisailo aa, mihing khat ahihna tawh zahtak theihna pen khat le khat kizahtakna taktak hi. I neumuh, i zahtak vetloh khat ahi phial zong, i zahtak bawl siam leh, ei pen a zahtak huai kisuak thei pan ding hi.
10. Picing tek lehang, kigensiatna kiam ding hi. Kigensiatna kiam leh ki-itna khang ding hi. Ki-itna khang leh kipumkhatna piang ding hi. Khat le khat kizahtakna pen picinna nam khat hi.
Source:
Laibu Saal / Zomi eLibrary
