GANDHI LEH PROFESSOR PETERS: PIL KIDEMNA

University College, London ah Mahatma Gandhi in law (sitni) a sin lai-in a professsor khat mikangte Peters kici in a thu leh la om lopi-in mudah mahmah se hi. Tua leh ni khat an nekna dei (dining room0 sungah sunsiah nek hun khatin Gandhi in a an kuang hong tawi lenglengin, Professor Peters kiangah va tu hi. Tua bangin a va tut ciangin Professor Peters in hih bangin ci hi.

"Mr. Gandhi aw, vok leh vasa in an a nek ciangun tu khawm ngei lo hi cih thei lo liang na hi hiam?"

Naupang thumang lo leh phengphi ten a pate a et heihai bangin Gandhi in Professor Peters en a, kam dam in hih bangin dawng hiat hi.

"Sia aw na lunghimawh lua se dah in. Hamsa kei lua e. Na kiang panin manlang takin leng khia ziau lel ning e," ci-in tutna dang khat ah tuankhiatsan ziau hi.

Gandhi vok tawh a tehkah hangin Gandhi in amah vok suaksak ahih manin Professor Peters thangpai mahmah in a mai san velval a, thuk kik ding bek hong ngaihsun ta hi.

A zing ciangin class ah Professor Peters dotna hih bangin hong bawl hi.​​ 

"Mr. Gandhi aw, khua lak-ah va vak lai takin lampi ah van kilom hen/kitun (package) khat mu in la, tua van kitun sungah pilna ip khat leh sum ip khat om leh koi pen na la zaw ding hiam?" ci hi.​​ 

Gandhi in sawt ngaihsun se lo a, thasial se loin, "Sia aw, sum ip pen la zaw ning," ci-in dawng ziau hi.

Professor Peters in hai bawl mahmah kawm leh simmawhna tawh, "Liang aw, kei nang hi leng pilna ip pen teel zaw mah ding hi veng maw," ci-in zahpih kawm in nuihsan heihai hi.

Gandhi in, "Sia aw, nang bel pilna ip pen teel zaw mah ding hi teh. Ahih hangin ken ka neih loh pen teel zaw in, a la zaw ding hi lel veng e," cihsan hi.

Nih vei guallel dimdem khin ahih manin Professor Peters zong a maizum mahmah a, a heh mahmah hangin lah bangmah lawh thei lo ahih manin thuk kik ding hong ngaihsun leuleu nawn hi.

Laivuanna ah dotnate dawn kikna laidalte (answers sheets) hawm khiat hun hong tung ta a, sangnaupangte' answer sheets khat khit khat Professor Peters in hong hawm diamdiam hi. Gandhi' answer sheet a piak in Prof. Peters in Gandhi' answer sheet ah, "KHUAKZANG THEI MEL LO, LUNGMAWK/MIHAI (IDIOT)" cih laimal gol in gelhsak veuvau hi.

Gandhi in zong a exam sheet la-in a tutna ah tu suk a, tom khat dai gige hi. Tua khit ciangin a tutna panin hong ding to vatin, sangnaupang khempeuh zak dingin, "Sia aw, ka answers sheet ah na min "KHUAKZANG THEI MEL LO, LUNGMAWK/MIHAI (IDIOT)" ci-in na gelh hangin ka mark muh zah at ding lam na mangngilh kha hi ci hi.

Moral:​​ 

Mipil khat neu bawl in, na nawknawk hangin na haina nang leh nang mah na kiselpho khia veve ding hi. Mikang ten, "Brevity is the soul of wit," na ci uh hi. Sau loin tom takin dawn kik theihna leh kamtam het lohna pen mipilna pianzia ahi hi. Mipil khat nang poina ding hong bawlsak lo a, om muang hithiat khat na va suksuk khak leh, na haina teng hong pholakkhiat sak zaw ding hi. Na haina bangbangin om khikhe lel in.

A tei: Thang Khan Lian​​ 

Source:

TRUTH OR FICTION "Gandhi and the Professor"