Gamlapi Mual Tungah (The Old Rugged Cross)
(I Peter 2:24)
Agelh ~ Zam Khat Kham
George Bennard (1873-1958)
George Bennard (1873-1958)
La makai khatpeuh in mipite la a teelsak sima kitelden la ahi hi. Hih la a phuakpa George Bennard in 1913 kuma aphuah hi a, 20th century sunga la kiphuak lakah a kideihpen khat ahi hi.
Hih laphuakpa George Bennard bel America gam Youngstown, Ohio-ah 1873 kuma suak ahi hi. A nu leh a pate tawh Albia, Iowa ah kituan uh a, tua panin Lucas khua ah kituah uh hi. Tua khua ah aten sungun Bennard in Zeisu Khazih a Honpa le a Topa in sanga piangthak hi. Kum 16 a phak ma-in a pa in sihsan-a, Salvation Army ah lut hi. Salvation Army sungah Bennard leh a zi masate officer-in om uh hi.
Methodist Episcopal Church sungah ordination kipia-a, a nasepna kithupisan mahmah hi. Kum tampi sung revival cialpi bawl-in kitaaklah mahmah hi. Khatvei, a cialpi bawlna pan Michigan lam zuan-a a ciahna ah haksatna lianpi tuaka, singlamteh khiatna ngiat leh Sawltak Paul in Khazih tawh thuakkhopna a cih banghiam cihte nakpi-in ngaihsun pha hi. Hih thute a lungngaih kawmin singlamteh i cih biakna sunga “lim” (symbol) khatbek hilo a, lungdamna thu laigil ahihna phawk hi. Hih la a phuahna tawh kisai Bennard in hici gen hi.
1913 kum ni khat Albion, Michigan ah ka om laitak hihla kaphuah nopna hongsuak hi. “Gamlapi Mual Tungah” laphuah ka kipan hi. A masa-in a aw kaphuak hi. A lamal kagelh masakte ki cing zo kasa kei hi. A tawpna ah tu-a bangin ka phuak thei-a, ka lungsim tawnga keima’ lunggulhnate tawh kizui-a ka phuah ahi hi. A sawt lo-in, June 7, 1913 ni-in Pokagon, Michigan ah kisa-a akisak masak napen ahi hi. Pawlpi sung ahi lo a pua lama a kizak masak napen bel Pokagon-a Chicago Evangelistic Institute-a a kisakna ahi hi. Mi tampi’ zak-a kisa hi a, tua huna kipan kideih mahmah pah hi.
Hih la a phuah khitphet-in George Bennard in a lamalte Charles Gabriel khak pah hi. Gabriel in a sawtlo-in mikim’ deih la khat hongsuak ding hi, ci-in gena, a genbang teekteekin a kiphuah khit a sawtlo-in mikim’ deih la khat suakpah takpi hi. Hih la aphuah khit kum 40 sung Bennard in a evangelistic nasep zomsuak lai hi. Gospel la dang zong phuak sama, ahi zongin hihla zah-a minthang omlo hi. October 9, 1958 ni, ama’ kum 85 a phak laitakin George Bennard in tua “singlamteh” Pasian’ piak “kham lukhu”-in khek takpi hi. A nuntakna a nunung lamteng Reed City, Michigan pana a gamla lua lo “lampi gei”-a a inn ah teng hi. Tua a tenna inn gei-ah pi 12 a sang singlamteh khat kiphut-a, tua tungah, “Gamlapi Mualtungah Singlamteh Tul Gemgam – hih la a phuak George Bennard’ tenna Inn” ci-in kigelh hi.
Thu um mite in singlamteh a kibia hi lo-in singlamteh tunga si Zeisu Khazih bek a kibia hi, ci-a kigen zong zangei zel ding hi hang. Ahi mah hi, ahi zongin singlamteh ngaihsun lo-in i Topa’ sihna zong kingaihsun thei tuan lo zel hi.
Gamlapi mual tungah, Singlamteh tul gemgam,
Gentheihna maizumna lim ahi, Tua khuampi ka it hi,
leitung buppi tan ding, A ithuai pen pa hong sihna hi.
Tua singlamteh ke’n ngilngei kei ning,
Zawhna minpha ka tutzawh mateng,
Tua singlamteh khahlo lenlen ning,
Khamlukhu ka khekna ni mateng.
Mi in tua singlamteh, a thusimloh hangin,
Ke’n ka phawk tawntung na a thu in,
Pasian tuuno in vantung nopna nusia hi,
Kalani mual ah tua pua dingin.
Ka mawhna hong maisak, hong siangtho sak dingin,
Sisan luangin Zeisu hong si hi.
Pasian tapa sisan siangtho a hong banna,
Tua singlamteh ka velvel nuam hi.
Tua singlamteh khuampi ke’n nusia ngei kei ning,
Taina, zumna ka thuakpih hangin,
Tua hi leh khat vei ciang hong sam ding a inn ah,
Amah tawh a min thangkhawm dingin.
Source:
Christian Hymn-te’ Tangthu (Laibu)
Agelh leh laibu bawl: Zam Khat Kham
Laibu Saal / Zomi eLibrary
