EUNICE LEH LOIS
(Pasian’ zat theih ding ta pattah siam numei)
Sawl 16:1-3; 2 Tim 1:5; 3:14,15;4:5
Agelh ~ Rev. Dr John Thang Hum leh
Dim Lun Zam
Eunice (Eunis) min “zawhna hoih” cihna hi. Nasepna khat peuh hoihtak a zawhna cihna hi. Anu, Lois pen Greek min apuak hangin Pasian zahtak, Jew minam sungpan khang hiding ki um hi. Lois pasal’ min ki gelh lo hi.
Lois leh Eunice te Lystra khua ah teng a, Paul tungtawn in lungdamna thu hong sang uh cih ki mu hi (Sawl 14:6,7). Lois leh Eunice te Pasian zahtak leh Lai Siangtho lui thu nakpitak atel mite cih ki mu hi. Thuhilh kikna 6:7 sungah akigen, Israel mi ten atu leh atate tung uhah Pasian theihna hilh sawn ding acih thu, hih Lois leh Eunice in nak pom mahmah uh hi. Eunice pen anu Lois in Pasian thu sungah nak pattah mahmah cih ki ngaihsun thei hi. Paul in Timothy a laikhak na-ah, “na upna pen na pi Lois leh na nu Eunice tungpan na ngah hi,” ci-in gen hi. Lois in Eunice tungah ahih bangin Eunice in zong Timothy tungah zangh kik hi.
Lois min pen Greek min hi zaw hi. A pasal min a kigen loh hang, Jew mi sung pan a hihlohna ki thei hi. Eunice zong a pasal Greek mi ahihna Luke in a laigelhna ah hong gen hi. A pasalte uh milim mai-ah kun te zong hithei kha ding hi. Summet bawl zong hithei kha ding hi. Numeite nuntakna pen thuhaksa mahmah kawmkal ah om den hi. Abelh ding uh, mi muanhuai kisam ahih manun, a kinaipih pen pasal khat tawh ki teng hi thei hamtang hi. Cihnopna bulpi ah, itna in minam kibanglo nih zong pumkhat suak sak thei hi. Ahi zongin athupi ah, numei in a pasal ukna nuai ah om in, thumang ding cih minam khempeuh i zuih leh bullet khat ahi hi. Lois pasal in zong azi pen ama’ biakna (JWH) Pasian khat upna tunpih zo ahih manin a etteh huai mahmah khat ahi hi.
Paunak khat ah “nauluai avei khut in leitung uk” cih om hi. Lois and Eunice in nauluai avei na pan Pasian’ mizat khat hong piang khia sak hi. Tangek ih neih ciangin pate sangin nute gim zaw hi. Ihmut theihloh hun tampi om aa, ankam limloh hun tampi om hi. Himah taleh thuak keiikai in lametna tawh nungta hi. Pattah nasepna ah, I theihthu gen khiat ciangbek kicinglo a, limpha suahna thupi hi. Eunice leh Lois te in, limpha tawh a tapa uh Timothy na makaih ahihna kimu hi. Tua ban ah, a maban ding zong leidawh kholh sak uh hi. Khatbek ka neih ka ta uh, sum zong sakin, ko hong vak kik ding hi, cilo in, sangpen pa’ nasem dingin Paul tungah ap uh hi. Makaihna ah “Leidawh nasepna” athupi mahmah khat ahi hi. Leidawhna omkei leh kuamah maban ki pai theilo hi.
Timothy leh Paul hong ki muh ciangin, khat leh khat ki ngaihna hong om hi. Paul in Pasian nasem ding pattah nuam hi. Anu phalna omlo in, hitheilo ding ahihna zong Paul in thei hi. Timothy tawh khual azin ding ciangin aphal nading a khuan ngen hi. Eunice in tapa khat bek aneih ahihleh amah bek mah avak kik ding zong hi thei kha mai tak hi. Ahi zongin tuate ngaihsun loin, atapa Timothy anungta Pasian’ na asem dingin phal hi.
Thukhupna
Lai Siangtho ah Lois leh Eunice te’ min khatvei bek mah na kigen napi, ih theihpih khakloh nasep lianpi nasem uh hi. A nasep uh pen nasep thupi tuamtuam omte lakah amanpha mahmah, pattah, leidawh, nasep nam ahi hi.
Mihing pattah nasep pen a haksa mahmah nasep khat ahi hi. Upna, lametna leh lungduaina te kisam hi. Galkapmang khatin, galkap sawm uk sangin bawng 100 cing nuam zaw ingh, ci ngei hel hi. Tua zah dongin mihing pattah nasep ahak sa mahmah ahi hi. Lois leh Eunice in haksatna teng kantan in, a tupa, a tapa uh Timothy Ephet pawlpi kem ding, Pasian sila muanhuai asuak thei dingin na bawl in, sawltak Pawllu tungah na ap thei hi.
Mi khat a cingtak hong suah theih nadingin, midang nih leh thum nasepna kisam hi. Lois, Eunice leh Paul te in Timothy mi cingtak asuah nading mapang khawm uh hi. Tua teng tungah nute lungtang a tawphah hi a, Eunice in nasep lianpi azo ahi hi.
Dotna:
Eunice leh Lois innkuan tangthu bangci gen hiam?
Aman bangci bang upna nei a, bang ci kep hiam?
Lungdamna thu bangci zak hiam?
Biakna sungah a tapa Timothy bangci khan suah hiam?
Paul in Eunice thu bangci gen hiam?
Pasian a-it numei khatin Eunice bangci bangin a etteh thei ding hiam?
