ETTEH TAAK MEIGONGTE
Agelh ~ Rev. Job Thawngno
(a) Thunget hanta
Mate Maku sungah meigong thu tam khollo hi napi Lika in na pakta mahmah in meigong thu mun nih mun thum ah na at hi. Luka 2 sungah Anna ahi zongin Luka 18:1-5 sungah meigong lungkia lo a thukhen mangpa kianga thukhensak dinga ngen thu ahi zongin na at hi. Numeite limlim pen a thuum thuum, a tautau thei, a kiniamkhiat zaw deuh namte ahih manin pasalte sangin ngetna thuumna lamah ngah zo zaw uh hi. U Lian khat kiangah i pai nop leh a zi tawh kimu phot leeng olzaw hi. Nget ding thuum ding khat pen numeite ngensak thuum sak leeng kingah zaw hi. Mihing gen thadah Topa Jesuh nangawn in zong numeite anaa in na pia hi. Mi tampite in Jesuh phukha nawk kha napi a vaang paikhia cih gen lo a, siluang a vei numeinu lawn khak phutkhakna ah ka vaang paikhia hi, ci hi. Jesuh kianga huhna ngen numei a damlo a ngah lo a lehkik tamlo hi.
Hih meigongnu in zong thukhenmangpa kiang ah a thu a khensakna dingin na ngenngen a, a sawtsawt ciangin thukhen mangpa in khen sak nuam hetlo hi napi na khensak veve hi. Tua banga lungkia ngeilo a thunget tawntung ding deihna tawh Topa Jesuh mahmah in Luka 18:1 na ah thugentehna in na gen hi. Meigongte in thunget a hatte ahihi.
(b) Piakkhiat hanta
Maku 12: 41-44, Luka 21:1-4 sung i etteh meigongnu khat in Jerusalem biakinn sungah dangka pai nih a khiatna i mu hi. Meigong ahih manin kikhualna mel nei loin a neih khempeuh a pia hi cih huai phial hi. Ahi zongin ama piakkhiatna pen leitung mit muh in tawmno cik hi mah ta se leh Topa Jesuh mahmah in a tam pen a pia hi, na ci hi. Mihaute leh Pharisaite in bawngleeng tawh pua in sumpi pia ta leh a tam pen na ci tuanlo hi. Hih meigongnu in aneih khempeuh a vekpi-in na pia hi. Tua manin a tam pen piakna ngah hi. Topa Jesuh in sumpi piakna ah bang teng en hiam cih leh:
Bangzah pia hiam cih en loin bangzah lak pan bangzah pia hiam cih en hi. Za lak ah bangzah (%) en hi. Tua manin hih meigongnu in 100/100 (%) pia ahih manin a hat pen ngah hi.
A piak bek en loin inn a om lai zong en hi. A piak a tam leh inn a tawm a, inn a atam leh a piak tam hi. Midangten tampi a piak hangin inn ah atamzaw na om lai a, meigongnu in tawm a piak hangin inn ah om nawnlo ahih manin a piak tam suak hi.
Piakna bek hi loin a lungsim mahmah en lai hi. Midangten kisialhna leh kiphatsakna tawh a piak lai-in meigongnu in muh ding zong maizum in pia khiankhian hi. Lungsim takpi tawh a piakna hangin phatna ngah hi.
Hih meigongnu piakkhiatna pen leitung bei dongin a kiciamteh ding a kimangngilh ngeilo ding piakkhiatna hi. Tamna hang hi loin lungsim takpi tawh piakna leh kiphalna tawh kipiakbupna hang mah ahihi. Piakkhiatna lak ah a neih khempeuh pia ngam hi meigongnu bekbek mah ahihi. Tua manin etteh taak piakkhiatna a hat meigongte hi.
(c) Zindo siamna
I Kum 17: 8-15 sung i et ciangin zindo a siam mahmah Zarefath khuami meigongnu i mu hi. A zindo siamna leh a piakkhiat phalna pen lamdang mahmah hi. Elijah tungah a tano tawh khat vei bek a nek ding anpia khia ngam hi. Tua an zong ei’ ante bang hi loin moneu kan khat bek ahihi. Tua a nek khit uh ciangin a si ding uh ahihi. Hi bangdinmun ah ding ciat hile hang amah bangin i piakhia ngam diam? ngaihsut hak mahmah hi. Hi nu i zindo a siam zia pen a nuai abanghi.
A kam a muk zangsiam in sawl manna tawh zindo hi.
A tano tawh khatvei bek a nek ding moh kan khat a zinpa piakhia ngam hi.
Kamsangte Pasian nasemte zahtak in amau tungah cingh a, zahtakna leh itna nei-in a nget bangin piakhia ngam hi.
Hi banga a siamna hangin tuni dongin hih meigongnu siamna kigengen a, khatvei bek piakna hi napi kum 31/2 tawntung thuhkikna lianpi ngah hi. Khatvei piakna a zah tul tampi in ngah kik a, mundangah a ngah hi loin ama innsung teekteek, ama beelsung teekteek leh a piakkhiatna mun pan in ngah kik se hi. A lamdang etteh taak meigong thusiamnu ahihi.
(d) Lungdam thugenna
Luka 2:36-38 sungah Asher minamte sungpan Fanuel tanu ahi Anna meigongnu i mu hi. Ama nuntakzia tungtawnin etteh taak tampi om hi.
Pasal a neih zawh kum 7 teh meigonga, a meigon’ zawh kum 84 pha ahih manin (84+7=91) kum 91 sung pasal a neih a cingta ahihi. Meigong ahihna hoihtak kem a, Pasian zah takin hitanvei meigong siangtho in om ahih manin a meigon’ kum mahmah zong zahtak huai, a pahtak huai mahmah suak hi.
Biakinn nusia loin biakinn ah om den hi. A meigon kihehnepna pen Pasian leh a biakinn hisak hi. Pasian a lungsim khempeuh pia khin ahih manin biakinn nusia nuam lo hi. Late 84: 10 ah mundangah ni tulkhat om sangin Nangma huangsung ah nikhat om hoih zaw hi, gitlohna innsungah ka teen sangin ka Pasian inn kong cingpa ka hi nuam zaw hi,’ a cih bang lian mah ahihi.
A sun a zan in Pasian bia hi. Khami mahmah cih ding hi. Kamsang hi-in Pasian tawh kiho den hi.
Antangin thungen hi. Thunget mawkmawk hi loin antang den hi.
Lungdamna koden hi. Lungdamna a kozo den mite pen a khami mahmah leh Pasian deih a sem taktakte hi. Phi 4:4-6; IThes 5:16-18 sungah Topa tungah lungdamna koh den ding pen sawlna lianpi hi.
A pualamah lungdamna thu genkhia hi. Jesuh thu imlo hi. Kei meigong numei hing ci loin Judah mite lamet ahi Messiah Jesuh apiankhiatna thu tangko hi. Jesuh Jerusalam biakinn sungah a ki-ap laitakin hih meigongnu zong aom ahihi. Tua akipanin a pua lamah tangko khia genkhia hi. Etteh taak meigongnu ahihi.
(c) Ki-itna neihna
Ruth leh Nomite pen meigong tuaktua ahihi. Meigong tuaktuak kilem het kei leh kilawm mahmah hi. Banghang hiam cih leh khangluite in “Meigong lung leh sa zanta” na ci uh a, lungton hehbaih, gilo a cihna na hihi. Ahi zongin hih meigongte gel pen ki nak it lua mahmah uh a, a ki itzia, akikhualzia, a kinek ngaihzia, thupha akipiakzai… cihte akipan amaute gel tungpan in sin theih ding leh etteh theih ding nak tam lua mahmah hi. A diakdiakin tuhun innkuan sung nuntakna ah numei nih leh thum omkhawm theilo i hih manin hih mutate pen a etteh taak mahmah ahihi. Aman ki-itna tungtawnin thupha a sanzia uh leh Jesuh pianna bulpi a suahna pen mangngilh huai lo hi. Etteh taak meigongte ahihi.
(f) Pattah siamna
Timoty pen tagah mahmah khat ahihi. A pa leh a pu si a, a Nu leh a pi kepna tawh Pasian mizat suak hi. Paul bangin alamdang kikhel na neilo hi. A neutunga a pi Lois leh a Nu Eunike in limtakin pantah uh hi. Lungsim hoihna, upna kipna cihte khempeuh a pi leh a Nu tungpan in a neulai akipan a sinkhin ahihi. ITim 1:5, 3: 15 sungte i et ciangin hoihna phatna bek zong hi loin Lai Siangtho mahmah zong a neutunga kipan a thei a sin kihilh den ahihna kimu thei hi. Pasian na a sep tungin naupang mahmaha, lauthawng mahmah hi. Paul in “Khangno na hihna thu hangin kuamah kisimmawhsak kei-in…” na ci hi (ITim 4:12). Tua manin hih meigong mutate zong a etteh taak ta pattah siamte mah ahihi.
Hi bangin Lai Siangtho sungah a etteh taak meigong tampi om hi. Amau etteh taakna a tuamtuam ciat ahihi. A diakdiakin Pasain tawh kisai ah meigongte a thanemna, a ginatlohna lam tam hetlo hi. A pahtak huaina, a hoihna leh a phatna lam vive genna hi den hi. Tua manin ah meigong hing cihna tawh kithanemsak ding hi peuhmah lo hi. Lai Siangtho sunga a etteh taak meigongte nuntakzia leh Pasian tawh a kizopziate uh en in ciinga tua banga nuntak pah ding ahihi. Numei hoihlo, meigong ginalo tampi a om teei hangin a hioh mahmah a etteh taak mahmah tampi mah om hi cih theih huai hi. Tua banga hoih tak a omte Pasian in zong thupha pia in kem a, a nuntakna ding bek hi loin kha thupha tampi zong piathuah lai hi. Tuni dongin a kigengen meigong minthang tamp i Lai Siangtho in ciamteh khial lo hi.
Source:
Meigongten Pasal mu ta! Tagahten Pa nei ta!
Laibu
Agelh ~ Rev. Job Thawngno
Laibu Saal / Zomi eLibrary
in hanciam in ki khenkik (type/typing) in hong ki suaksak ahi hi.
