ELIZABETH
(Khris Paina Ding Lam Sial Ding
Kamsang Johan a pianna nu)
Luka 1:5-80
Agelh ~ Rev. Dr. John Thang Hum leh
Dim Lun Zam
Elizabeth a khiatna in “Pasian in kei hong kamciam PA” cihna hi. Amah pen Aaron suan, siampi namte ahi hi (Paikhiatna 6:23). A pasal Zakariah pen siampi nam, Abia suan, biakinn sungah kalkhat tawntung biakpiak nasep semte ahi hi (1 Khang 24:10). Ama lampan hita leh apasal lampan hita leh siampi suan leh khak te ahi uhhi. Siampite ahih leh Pasian a zahtak, a siangtho numei tenpih ding kiphal hi (Siam 21:7). Elizabeth pen ateek nung cianga ta nei, Jesu Khris lamsialpa, Johan pianna nu hong suak hi.
Pasian zahtak numei
Elizabeth leh Zechariah pen Pasian zahtak leh Pasian’ deihna bang aa, anungta nupate ahi hi. A kum uh tamta a, nau neilo uh hi. Tanglai in suan leh khak neih loh pen hamsiatna in ki ngaihsun hi. Zechariah in ama siampi sep hun hongtung ahih manin biakinn ah pai in, paknamtui hal biakna bawl hi. Tua laitakin vantungmi Gabriel in hopih a, tapa aneih ding gen hi. Zechariah in umlo ahih manin, ‘na uploh manin tawlkhat sung pau theilo in na om ding hi,’ ci-in vantung mi’n gen hi.
Tua bang teng leh Zechariah biakinn sung pan hong pusuak pak theilo a, apualam ah mipi thungente in lamdangsa hi. Biakinn sungpan hong pusuak ciangin a pautheilo sa in hong pusuak ahih manin mipi te in zong hih siampi pa Pasian tawh kimu hi ngel ei, cih tel pah uh hi.
Asawtlo in, Elizabeth in naupaai hi. Vantungmi in nau’min ding zong Johan ci-in pia pah hi. Elizabeth agai kha thum a phak laitakin, Mary a kiangah va hawh hi. Amau te nih anu tuak uh unau ahi hi. Mary in, gai in gumpa Messiah a suah nading vantungmi in genkhin ahih manin lamdangsa lua a, tua thu agen dingin Elizabeth kiangah avahawh ahi hi. Mary in Elizabeth tawh kimu a, ahopih ciangin Elizabeth sungah nau pen nuamlua in diang hi.
Elizabeth thupha ngahna
Israel miten amau ading gumpa hong piang ding cihpen kamsangte khat khit khat in agen uh ahi hi. Hih pen pawlkhat ten ci leh sa gumpa (Rom kumpi khut sungpan galkap thahatna tawh hong hon ding) cihna dan in sang uh a, ahi zongin thuman thutak zongte in a kha uh suahtak na’ng gumpa dingin sang uh hi. Zekhariah leh Elizabeth zong kha lam thu tawh asang te ahi uh hi.
Tanglai in kamsang dingte ki teelzia pen mihing deihna banga kiteel hilo hi. Pasian seh tuam vilvel hi a, kuamah in ama’ uttawm thu tawh a ngahtheih hilo hi. Tua mah bangin azuihding thu zong kipia hi. Mi nautang tawh ki banglo dingin ki tuamkoih hi. Tua bang teeltuam ngah mite in anu gil sungpan kiteel ahihlam uh tel khin uh hi. Cih nopna ah amah Pasian sapna ah tangtak a paisuak theih nading anung pan a tawsawn mi kisam a; tua mi pen anute hi hamtang hi. Tua ahih manin Johan hong suah matham in anu gil sungah a om a kipan tavuan lian mahmah hi. Agil sunga a-om- aa- kipan don cihtak don ding kisam ahi hi. Lungsim lam siamte in, naungek khat hong gol ciangin anu lungsim puakzia atamzaw hong keng hi cih gen uh hi. Tua ahih manin Elizabeth pen thungetna, Pasian kammal lungngaihna leh, nek leh dawn te a kipan kidawm ding cih kitel thei mahmah hi. Nau pang hong khantoh ciangin Pasian sapna nei ahihlam atel nading humuan den dinga, a kiteelna mun atun theih nading thuhilhna neiden ding hi. Hih pen pattah, nasepna lian pen ahi hi.
Elizabeth pen Kha Siangtho aw za thei mahmah khat ahi hi. Mary ahawh ciangin asunga om nau in lungdam in diang hi. Tuaciangin athu khempeuh tel pah hi. Pasian nasep ahihlam leh Pasian geelna sungah a omlam telpah hi. Mary tungah “Nang in ka Topa hong pianna NU” na hihi, ci in gen khia hi. Ama’ pulak na tung tawn in Mary in a lungdamna leh Pasian a pahtawina la phuak hi (Luka 1:46-56 etkak 1 Sam 2:1-10).
Thukhupna
Elizabeth in a pasal Zakariah nasep a telpih leh ahuh numei khat ahi hi. Pasian nasemte zite pen cim thei, lungleng thei mahmah uh hi. Ahi zong Elizabeth in a cimna leh ta aneih lohna te bangmah phun hetlo hi.
Pasian a-it ban ah, lungsim citak mi ahihna zong ki thei hi. Pasian kamsangte hong pian theih na ding innkuan hoih, Pasian thu tawh a khang ahih ding kisam hi. Johan in Pasian teel ahih mah bangin, a pantah ding leh, thuman alak ding nu leh pa kisam hi. Elizabeth leh a pasal in Johan Pasian thu sungah pantah in, Pasian sapna ah tang taka, apai vilvel na ding hilh in, don in khan suah hi.
Dotna:
Elizabeth bang cidan innkuan sung pan hong piang hiam?
Siampi khat I zi a suah theih na’ng bangci nam numei hi ding hiam?
Mary tawh bang ci ki nai hiam?
Johan agil sungah a paai lai tak bang ci kep ding cih nangaihsun thei hiam?
Mary tungah a gen kammal bang hiam?
Mary la phuah te bang thupan hong piang hiam?
Nang bang hamphatna na la thei hiam?
