EITE IN ZONG I SEP KUL HI -I
Agelh ~ Kap Za Khai (Photoh)
‘A hunhoih hong tungta a, Pasian’ uk ding hun hong kipanta hi.
Na mawhna uh kisikkik un la, hih lungdamna thuthak um un.’
Marka 1:15
Nuntakna thak i ngah nadingin Pasian in ama lampang panin kicingtakin hong sepsak dikdek khin a, tu-in eite lampang panin zong i sephuai teng i sep kulta hi. I sephuai teng sem ding cih ciangin mihing hih theihna thalegal tawh sem ding cihna hi lo a, Pasian hong tatkhiatna sungah kihel kul cihna hizaw hi. Tua hi leh eite in bang sem ding ihi hiam? Nuntakna thak sungah i lut theih nadingin Jesuh in kisikkikna leh upna hongkal hi.[41] Hih in Topa’ lungdamna thu i ngah nadingin a kisam thu leh Pasian leh eite hong kizomsak in Jesuh Khrih theihna leh tatkhiatna i ngah nading ahi hi.[42] Mihing lampan sep dingte in:
a. Kisikkik ding
b. Upna nei ding
Hih kammal nih pen Thuciam Thak sungah a kigen mun mahmah leh a thupi mahmah thunih ahi hi. A tunga Marka 1:15 sunga Jesuh’ kammal in zong Pasian ukna gam sungah lut theih nadingin kisikkikna leh upna neih ding hong pulaakkhia hi. Luka 13:3 sungah zong “Ke’n kong cihin-ah, na mawhna panun na kisik kei uh leh amaute mah bangin note zong na si ding uh hi,” cih leh Luka 5:32 sungah Jesuh hong paina pen “mite in a pampaih mite a kisik nadingun a sam dingin a hong pai ka hi hi,” a ci hi.[43] Jesuh Khrih, Tuiphumpa Johan, Peter leh Paul-te in zong kisikkikna leh upna pen gupna ngah nadingin a kisam mahmah thu laigil ahihna hong hilh den hi. Paul in Efesa 2:8 sungah “Note’ upna hangin Pasian’ hong hehpihna tawh hotkhiatna a ngah na hi uh hi,” hong ci hi.[44] Ataktak in kisikkikna leh upna neihna cih pen thunih in khentuam ding hi lo a, thu khat in a luangkhawm thu ahi hi. Hih thunih pen Jesuh Khrih’ sungah i lut ciangin thakhat in a piang khawm thu hi. Ahi zongin hih mun-ah upna leh kisikkikna thu-te kitelsak nuam i hih manin a tuamin khen in kikumkhawm ding hihang.
Upna (Faith)
Khristian nuntakna-ah upna pen i neih loh a phamawh thu ahi hi. Marka 16:16 sungah lungdamna thu a umte bek-in hotkhiatna ngah ding ahihna, mihing citna (merit) tawh a kingah theihlohna honglak hi. “Lungdamna Thu umin tui a kiphum mi peuhpeuh in hotkhiatna ngah ding a, a um lo mi peuhpeuh in mawhsakna thuak ding uh hi.” A puksa mihing dinmun sungah Jesuh Khrih hong kumsuk in hong tankhia a, tua thupha pen upna bek tawh kingah thei hi.[45]
Judah mite adingin upna cih pen Thukham zuihna tungah kinga a, ahi zongin Gentile mite adingin bel Ama Tapa neihsun nangawn hong piak dong a hong it-in, tatkhiatna hong pia Pasian sungah kikhelna ahi hi. Tua pen ei leh Khrih aituam kizopna hi (Rom 10:9; Gal. 2:20; Phil. 1:9; I Pet. 1:8), lungdamna thu sanna (Sawl. 20:21), leh Khrih sungah upna khang semsemna hi (1 Kor. 2:5). Upna sungah up/muang gige na (believing), thumang gigena (obeying), muan gigena (trusting), lamet nei denna (hoping), leh cihtak gigena (being faithful) teng kihel a, tua pen thanemta leh thahatta leh a khangtoto ding thu ahi hi (Rom 12:3; 14:1). Upna in thuakzawhna nei ding hi (Kol. 1:23), kicingna nei hi (Sawl. 6:5). Sepkhiatna nei hi (1Thesa. 1:3), kipumkhatna zong nei hi (Efe. 4:13). Upna sungah thukimna leh kipulaakkhiatna (confession) leh thumanna (obedience) kihel a, tua pen upna kipulaakkhiatna leh a pulaak bangin nuntak pihna ahi hi. Mi khat peuh in upna nei thei hi (Rom 14:22), tua sungah om thei hi (2Kor. 13:5), leh tua tungah ding thei hi (1 Kor. 16:13; cf. 1 Thess. 3:8; Rom 5:2).[46]
Khristian nuntakna khempeuh ah upna pen a bulpi ahi hi. “Upna lo tawh kuamah in Pasian lungkimsak zo lo hi. Pasian kiang a zuan mi peuhmah in Pasian a om takpi ahihna thu le amah a zongte Pasian in thaman pia hi, ci-in a up ding kisam hi (Hebru 11:6).” Thuciam Thak sungah upna nungthu dingin Jesuh Khrih mahmah in hong sepsakna om hi. Khrih mahmah pen eite’ upna leh muanna ahi hi. “Pasian in leitung mite hong it mahmah ahimanin ama Tapa a um mi khempeuh si nawn loin a hin tawntung theih nadingun a Tapa neihsun a hong piak dongin a hong itna a hong lak hi (Johan 3:16).” Upna-ah maingatna, dinna leh muanna khat neih kul hi. Upna cih pen ei leh Khrih hong kizomsak na ahi hi. Tatkhiatna pen mihing’ sepna tawh hi loin upna bek tawh a kingah hi. “Ahi zongin Pasian maipha ngah nadingin nasepna suang loin upna a suang mipa pen Pasian in mimawh kimlai midik hi, ci-in sang ahih manin, amah tawh a kipawl theih nadingin Pasian in tua mipa upna thupi san hi (Rom 4:5).”[47]
Upna Neihna Ding Lampi
Upna neih theih nading lampi nih Paul in hong lak hi. khatna pen kantelna, sittelna, entelna hi. Thesalonika Masa 5:21 sungah, “Thu khempeuh entel pha unla, a hoihte kemin,” ci-in Paul in hilh hi. “Entelna om lo nuntakna pen a nuntak huai lo nuntakna hi,” ci-in Greek mipil khat in na genkhia ngei a, eite in i nuntakna hoihtak entel/ sittel lehang bek nuntak manpha ding hi cihna hi. Thu khat peuhpeuh zak phet in up pahpah ding hi lo hi. Hoihtak kantel masak ding kisam hi. Sik huan khat in zong a sikte ahoih le ahoihloh pen mei tawh tamveipi mah a sittel kul hi. Sikte a kizat khit ciangin a sit sawm leh tua pen zekai luata hi. Tua mah bangin upna thu ah zong i zak khitciang hoihtak mah i sittel ding hi a, hun thupi a tun ciang bek i ngaihsut pan leh kikhial gawp ding hi.
A nihna ah Jesuh pen Lai Siangtho sunga kigelh mi khat bang lel hi loin Paul in a nuntakna ngiat tawh Jesuh a muhna hi. Jesuh tawh Paul nisim kizom ahimanin Jesuh in zong Paul nuntak pihden hi. Thahatna pia den hi. 2 Timoti 1:12 sungah Paul in, “Ken bang um ka hiam?” ci lo hi. “Ka up pa ka thei hi,” a cih ngiatna pen a nuntakna mahmah tawh Jesuh Khrih a theihna hong pulak ahi hi. Eite in zong Jesuh Khrih tawh kimu thei hihang. Jesuh Khrih tawh i kimuh ciang bek-in i nuntakna lungmuan om pan ding ahi hi.[48] Tua ahimanin Upna cih thu sungah sittelna leh theihngiatna thu ci-in thunih kihel ahihna Paul nuntakna tungtawn in kimu thei hi.
Upna in Telcianna Hong Kal
Upna pen sangziauhna bek tham loin muanna leh nuntakpih ngiatna hi. Upna sungah lunggulhna, utna, deihnate a kihel mah bangin theihteelna zong kihel hi.[49] Cihnopna ah Khristiante in i up pa leh i upna ahang i theihteel kul hi. Banghang hiam cih leh i biak Pasian hihna pen mihing theihna le muhna sangin lianzaw ahihman hi. I upna in theihna sungah a lut semsem ding kisam hi. Khristian upna in dotna (question) tawh kidim den thei ding a, tua pen kiciat lohna hi loin Pasian sungah thuklut semsemna hizaw ding hi. Tua ahimanin Khristian upna cih pen mittaw upna (blind faith) hi lo a, theihteelna (understanding) tungah a kinga hizaw ding hi. Paul in “Ahi zongin ka up pa ka thei hi (2 Tim. 1:12),” ci ngiat hi. Hih thu tungtawnin upna in theihteelna hongkal hi cih ding hi (Faith always seeks understanding). Bangmah thei lo pi-in up pongpongna pen i Khristian nuntakna sungah paikhialhna leh teelkhialhna, neih khialhna leh mawkmaina, lungbuaina leh pukbaihna hong piangsak thei hi. Tua ahih manin Rev. Dr. Chin Do Kham in a thungetna-ah “Ka upna thu leh ka upna a hang ka theih nadingin pilna hong pia in,” ci-in thungen den hi.[50]
Jesuh in a nungzuite kiangah “Note in kei kua hi hong ci na hi uh hiam?” ci-in a dong hi (Matt.16:15). Hih hun laitak in a nungzuite nangawn in Jesuh pen “Kua” hi cih thei siset nai kei leh kilawm hi. Jesuh nung zuizui in, a thuhilhnate zaza in, a nalamdang bawlte mumu mah taleh a nungzuite in Jesuh theiteel zo taktak lo uh hi. Ahi zongin Simon Peter in, “Nang pen a nungta Pasian’ Tapa, Khrih na hi hi (Matt. 16:16),” ci-in a dawngkik ciangin Jesuh in tua theihteelna pen vantung pan hong pai ahihna (16:17) na pulaak hi. Cihnopna ah Khristian nuntakna cih pen i up pa Jesuh Khrih tawh kitheih sinsenna, kiteel sinsenna, kizop sinsenna, muhkhiat sinsenna (Personal relationship and personal discovery) tungah kingah cihna hi.
I upna pen theihteelna sungah a lut semsem ding kisam hi. Augustines in “Ka theihna in hong umsak lo a, ahi zongin ka upna in hong teelsak semsem hi,” ci hi.[51] Theihna neih khitciangin um ding cihna hi lo a, i up manin i upna leh ahang thei semsem sawm ding cihna hi. Upna in a tangzai theihteelna hongkal den hi. Jesuh’ thungetna lungngai khawm ni.
“Nang bek a man Pasian na hihna thu le nangmah na hong sawl Jesuh Khrih hong theihna pen amau adingin nuntak tawntung ngah nading lampi ahi hi (Johan 17:3)”
Hih Lai Siangtho sungah tawntung nuntakna ngah nadingin thusim om hi. Tua in Jesuh Khrih tungtawn in Khrih mahmah leh Pa Pasian theihna in tawntung nuntakna ngah nading lampi hi ci hi. Tawntung nuntakna in Khrih sungah Pa Pasian tawh aituam kitheihna, kizopna, kipawlkhopna kisam hi. A tungah i gensa mah bangin Khrih tawh i kipawl theih nadingin upna kisam hi.[52] Ahi zongin tua i upna pen theihteelna sungah alut semsem upna i hihsak ding thupi hi.
Lai Siangtho sungah, “Ahih hangin Pasian’ nung a zui (Heb. yāḏa) mite ahih uhleh thahatin a gualzo ding uh hi (Dan. 11:32).” Hih sungah “Pasian’ nung a zui” cihna sangin yāḏa cih pen Pasian a thei cihna hizaw hi. Pasian i theih ciang bekin thahatna tawh i kidim dingin gualzawhna i ngah pan ding hi. Pasian i theih kei leh thakiam zawngkhal in i siatlawh ding hi. Pasian i theihloh ciangin ama kiangpan hong luang thupha zong kitheithei lo ding a, gualzawhna, mavanna, daupauna, khamuanna zong kinei ngeilo ding hi. Pasian i theih kei leh ze-etna tuak hun ciangin kiguallel baih phadeuh hi.[53] Lai Siangtho sunga Pasian a theiteel mite tawm enleng;
Moses: Pasian in Moses hopih in tel hi. Sawlbawk kuang sung pan amah a hopih pa Moses in Pasian ahihna theihcianna a ngah hi. Tua hangin Israel mite a makaihna hun sungteng ah haksatna tampi a tuakkhak hangin lungkia ngeilo, thanem ngeilo, lau ngeilo hi. Banghang hiam cih leh Moses in amah a tel Pasian a theihteel man ahi hi (Pai. 3:1-6; 33:11; Heb. 3:5; 11:23-29).
David: Pasian in David pen a tuucingna panin samin kumpi inn dongah lamto hi. David in Pasian pen a tuucingna panin a theiteel sitset khin hi. Amahmah in, “Topa pen tuu bangin kei hong cingpa hi” ci-in la na phuakngait ahi hi (Late 23). Filistia mi golpa Goliath a thahna ah zong, “Namsau, teipi, le teikhawh tawh kei kiangah nang nong kuan hi. Ahih hangin kei pen Israel galkapte’ Pasian, a Vanglian TOPA, nangmah in na to mipa’ min tawh nang kiangah kong kuan hi (1 Sam. 17:45),” ci-in ama nuntakna sungah Pasian tawh kalsuan ahihna kimu thei hi. David in Pasian a theihteel mahmahna hangin a nuntak hun sung tengin Pasian in amah lamto in thupha pia hi.
Stefen: Sawl. 7:55-56 sungah, “Pasian’ minthanna vang le Pasian taklamah Jesuh a ding mu ahih manin, “En un! Vantung kihong a, Pasian’ taklamah Mihing Tapa a ding ka mu hi,” a ci hi.” Stefen in a uppa a theihcian manin sihna nangawn lungdam takin a thuakngam ahi hi. A galte mawhna nangawn zong a maisak ahi hi (Sawl. 7:60).
Paul: Pawlpi masa hun lai-in Tapidawte a bawlsia pa ahi Paul pen Pasian in Damaskas khua zuatna lampi tung panin khel hi. Tua laitak in Paul in amah a tuksakpa tungah, “Topa aw, kua na hi hiam?” cih leh, “Topa aw, bangci gamtat ding ka hi hiam?” ci-in dotna nih na dong uh hi (Sawl. 22:8-10). Gamtatna bulphuh Judah biakna panin Hehpihna bulphuh Jesuh Khrih itna sungah Paul (Saul) a kikhel vat takciangin Jesuh Khrih tungah a lungsim takpi tawh a dotkhiat dotna ahi hi. Ama dotna enleng amasa in Paul in amah lei-ah a tuksakpa thei nuam hi. A nihna ah tuapa’ hilhna bangin zuinuam ahihna kimu thei hi. Tuahkhak thu panin theihcianna ah lut semsemna kimu thei hi.
“Topa aw, kua na hi hiam?” cih in “Jesuh Khrih tawh kimimal theihna (Personal relationship)” ah lutna hi. Khristian cih pen Khrih kammal bek tungah dinna hilo a, Khrih mahmah (Person) tungah kingakna hizaw ahihna hong lak hi. I dinna le i up pa theihna hi. Peter bangin “Nang pen a nungta Pasian Tapa, Khrih na hi hi (Matt 16:16),” le Paul bangin “Ahi zongin ka uppa ka thei (2 Tim 1:12)” ci thei ngiatna hi. Banghang hiam cih leh tawntung nuntakna cih pen “Nang bek a man Pasian na hihna thu le nangmah in na hong sawl Jesuh Khrih hong theihna pen amaute adingin nuntak tawntung ngah nading lampi ahi hi (John 17:3)” ci hi. Hih in a mi tangthu (biography) theihna sangin a mi ngiat (Person) tawh kithei, kizom thupizaw ahihna hong theisak hi.
“Topa aw, bangci gamtat ding ka hi hiam?” cih in a mi (Khrih) tawh kitheihna bek tawh khawlcip loin i theih bangin Khrih tawh kizomsuakna, kipawl ngiatngiatna, tonkhopna cih hi. Upna in nungtasak (Jame 2:26) ahi bangin nungta na pi-in um kei leng mawhna hi (Rom 14:23). “Bangci gamta ding” in koi bangin kalsuan ding, koi bangin ama thu teelcian ding, koi bangin nuntak kalsuan ding, koi bangin nasep silbawl ding, koi bangin ngaihsun in khentat cih a neng a tawng dongin huam hi. Topa’ deihna theihna in ama hong lakna hang bek ahi hi (Late 119:18). Theihna, neihna le nuntakkhiatnate kiunau hi. Revd Dr Do Sian Thang’ pilkam in “Faith means becoming!” ci hi. Moses, David, Stefen le Paul-te bek tham loin upna sungah a zungthukkha semsem mi thupi tampi Lai Siangtho sungah kimu thei hi. Upna in theihteelna i neih semsem ding hong kaal a, upna sungah theihcianna a nei semsem nuntakna in Khrih adingin a nungta ngiat nuntakna hipah ding ahi hi. Paul in “Ahi zongin ka up pa ka thei hi (2 Tim. 1:12),” a cih ngaitna in Pasian a theihteelna hong pulakkhiatna le teci pangna hi a, hih hangin a nuntakna kikhelna lianpi a piang hi.
41 Clair Crissey and Bonnie Famer, God/Man Alive (Nashville, Tennessee: Convention Press, 1975), 50.
42 Stanly J. Grenz, 406.
43 William Webster, Salvation, the Bible and Roman Catholicism (East Peoria, IL, USA: Versa Press, Inc., 1990, reprinted 2009), 117.
44 William Webster, Salvation, the Bible and Roman Catholicism, 118.
45 M. G. Easton, Faith: Eastons Bible Dictionary, 3rd edition (Albang, USA: Ages Software, 1996/7), 424.
46 Geoffrey W. Bromiley, Theological Dictionary of the New Testament, eds. Gerhard Kittel and Gerhard Friedrich, 854, 855.
47 Paul E. Little, Know What You Believe, 158, 159.
48 U Tha Kyaw, The Apostle Paul (Yangon: MBC Literature & Publication, 1998), 326, 327.
49 Clarence H. Beson and Robert J. Morgan, Exploring Theology: A Guide for Systematic Theology & Apologetics (Hyderabad: Authentic Books, 2009), 141.
50 Rev. Dr. Chin Do Kham’ (54) Celebrate His Life Video Albem Cover, Myanmar Living Water: Canaan Land Family. His two sets of prayers are (1) “Lord, give me the passion of an evangelist to win souls, give me the heart of a pastor to love your people unconditionally, and give me the brain of a scholar so that I will know what I believe and why I believe.” (2) “Lord, make me a man of faith like Abraham, make me a man of vision like Paul and make me a man of prayer like Daniel.”
51 Augustines, Confession and Enchiridion, ed. Albert C. Outler, (Philadelphia: Westminster, 1955), 338.
52 The Life Application: New Testament, 278.
53 Naingdi Aung Yi, “Making True Disciples”: Discovery Book (3), P- 6.
Zop lai ding…………………………
