Ei Mahmah A Kipan Laisim Phot Ni Ee
Agelh~Kap Za Khai (Photoh)
Thupatna
Zomite sungah laisim ding leh laigelh ding thute kigen simin laisim ut lo hi ven, laigelh talent nei keng veng aw, laimi kihi lo lua hi ven ci-in paulap tampi kiza den hi. Zomite’ ngaihsutna bang hileh Pasian in laisim ding mi atuam vilvel in bawl ding, laibu gelh ding mi atuam vilvel in piangkhiasak ding, lai tawh kisai thupha piakna ngahlo tengin lai thudon loin om hihiat lel ding cihdan hileh kilawm hi. Tua bang i ngaihsut khialhnate nusiat hun mahmah ta hi.
Laisim Ngeina Neih Sawm In
Laisim pen laisim uuk lote ihihna tawh kimangngilh den ahih manin phawk peuh cianga sim ding cih bangin ngaihsun het loin nisim in laimai khatta peuhmah pelh loin sim theihna dingin ngeina bangin i sep zawh dong hanciam tek ding thupi hi. I kipat cil kum lang, kum khat dong pen haksa mahmah kha dinga, ahi zongin hong sawtsawt ciangin kizuizo suak veve ding hi. Lungkia lo leh citak takin zop tohtoh ding kisam hi. Laisim pen nisim tatzia leh ngeina bangin neizo suak lehang, nisim in theihna tuamtuam, ciimna tuamtuam, pilna tuamtuam ei leh ei a kibehlaplap hi pah hi. Ngeina tampi lak pan laisim pen ngeina bangin neih zawhna zong ngeina manpha mahmah khat ahi hi.
Ei Mahmah in Laisim Photphot Ni
I tate leh tanute in laisim nuam lo ci-a i phunphun sangin ei mahmah in limpha lakin laisim tinten phot leng, tua hileh i tate in zong laisim ding hong ngaihsun pan ding uh hi. Gam khangtote ah nulepate pen a tate uh sangin laisim zawlai uh hi. Jewte bang a tate neutung panin a nulepate in laibusaal tawh pantah pah uh hi. Amau gam ah khutdawh ngente nangawn in laisim uh a, ei gamah bel mipi makaite a kipan uliante in laisim lo pah uh hi. Laisim ngeilo nulepate leh gam makaite omna gam sungah kua in laisim nuam mah ding hiam?
Ei mahmah in laisim photphot in lai ii hoihna, a thupitna, a vangliatna, a thahatna theikhia photphot in zangkhia thei phot lehang i tate in zong eima’ sul hong zui lel ding uh hi a, ei nulepate’n zong i kin loh, i thusim loh na khat pen tate tungah hahsawl cih pen a lem hetlo thu ahi hi. Ei mahmah in zong laisim masak ding kisam hi. I pil masak ding kisam hi. Thumuh theih masak ding kisam hi.
Paul in Korinth khua Khristiante kiangah “Gitlohna lamah naupang bang semsem in, thu ngaihsutna lamah a khangham hih semsem un (1 Kor. 14:20)” a cih bangin eite zong tua bang ihih theihna dingin Paul’ thuhilhna lungngaih ding kisamta hi. Mimal tuakkhak thute (Experience) in zong thu ngaihsutna hong khangcingsak thei mah a, ahi zongin mimal muhna bek hi thei hi. Ahi zongin Laisimna tawh thungaihsutna lamah khangham semsemna tawh gawm lehang hong limci semsem ding ahi hi. Mimal tuahkhak thute leh laisimna tawh thu ngaihsut khangcing sak lehang sep khialh tawm semsem in sep pha tam semsem thei ding hi. Ei mahmah in thadah masa loin laisim kipat limlim phot ding kisam ta hi.
Pasian in Laisim Ding Mi Sehtuam Nei Lo
Lai Siangtho sunga Kha Siangtho letsongte en lehang mimal zui-a a tuam vilvel a piak hizaw a (1Kor. 12: 27-30), Kha Siangtho’ gah ahihleh Khristian khempeuh neih ding cih kimuthei hi (Gal. 5: 22-26). Mimal tunga a tuam vilvel a kipia Kha Siangtho letsong sungah laisim ding letsong kipiak tuamna om lo ahih manin tua in mi khempeuh i sep ding nasep hi cih lahna hi pah hi. Laisim ding uk leh ukloh kisai loin i seploh a phamawh thute lakah a kihel nasep hi cih phawk ding kisam hi. A pau thei khempeuh in lai theih kul a, lai thei khempeuh in laisim kul hi. Laisim khempeuh in zong pilna ciimna neih kul hi. Tua hileh tenna mun leh gam hong khangto baihzaw ding hi. Pasian in laisim ding mi sehtuam nei hetlo ahih manin lai uk keng e, cici nawn loin khuak leh lungsim pilna khantoh semsemna dingin laisim hahkat ta ni.
Thukhupna
I sep ngeilo khat tate’ sep dingin sawl lehang hong mang hetlo ding hi. Laisim ding zong ei mahmah in sim masa in amau zong sim theih dingin pattah ding kisam hi. Ngeina khat peuhpeuh neih ding pen limtak pattah a kul ahi hi. Tua adingin ei mahmah in zong i kipiak kul masa hi. I tate, i khangnote laisim ngeina hoih i neihsak nop leh ei mahmah in limpha lakin i sim masak ding thupi a, i sim bangin i zuih pah ding kisam hi. Tua ii thuhoih thupha tungtawnin i tate leh i khangnote in zong laisim ii hoihna hong thei in laisim hong zui ding uh ahi hi. Tua manin ei mahmah panin kipan ta ni.
Laibu saal / Zomi eLibrary
