DELILAH
(A pasal khem in
Sum metbawlna in anei numei)
Thukhente 16:4-21; Paunak 5
Agelh ~ Rev. Dr. John Thang Hum leh
Dim Lun Zam
Delilah pen Philistine minam Sorek khua ah numei kizuak khat ahi hi. Amin khiatna pen zawngkhal sak (or) zunglotkhia (or) bei mangsak cihna hi.
Israel mite a makaih thukhente lak ah a nunung pen ahi Samson in Delilah tawh ki ngai hi. Samson pen Pasian in Israel te’ gal Philistine te asusia ngiat dinga apiansak ahi hi. Tua mah bangin ahun simin Philistine mite thatin a-inn, a-lo zong suksiat sak hi. Philistine ten Samson suksiat zawh ding bek ngaihsutna nei uh hi. Delilah tawh aki ngaih ma-in Timnah kici numei khat tawh kingai masa hi. Ahi zong Timnah pen apa in midang khat na piaksak hi.
Samson in Pasian piak thahatna nei in, tua thahatna thusim khat nei hi. Philistine ten tua thahatna thusim thei nuam ahih manin a theihzawh nading hanciam hi. Tuathu a theihkhiat theih nading lampi khatbek oma, tua pen alawm ngaih Delilah tung bek pan theihkhiat ding ahi hi. Tua ahih manin a galte in azi pawlbawl in, sumguk pia a, Samson thahatna thusim kansak hi. Hih asum guk piak uh pen, sumngo 1,100 ahi hi. Topa Jesu 30 tawh kizuak a, hih sangin Samson mat nading sumguk piak tamzaw hi. Sum in ki-itna sia sak a, thuman lampi heikhia zo hi. Delilah zong sum hizahtak tam kikhaam mawk ahih ciangin mite deihna asep loh phamawh hi.
Samson in zong amasa lamin athu aman takin gen ngeilo hi. A tawpna ciangin Delilah in, “hong it taktak hileteh na thuman hong gen ding hi teh,” cih kammal zangh hi. Samson ading hihthu haksa mahmah hi. Azi pen a-it mahmah a, atenpih ahi hi. A langkhatah a thahatna pen Pasian leh amah kikal ah thupiak leh thusim hi a, gen khiat hetloh ding thu ahi hi.
Zolna kamkhum pen pasal ten thuakhak asak mahmah thu ahih lam Delilah in tel mahmah hi. Samson in a thatang a hat gemgam hangin a sunglam mulaigil neilo hi. Pasian tawh a kiciamna len kipzo nawnlo in, genkhia ta mai hi. Solomon in apilna agelhkhiat lai in, hih Samson thu nak phawk mahmah hi kha ding hi. “Numei paktat te’ kampau pen khuaizu bangin khum mahmah in, athugen te anel dakdak hangin a tawpna ah lungkhamna leh natna hong guan ding hi,” na ci hi. (Pau5:3-4). Hi bangdan tawh pasal bangzah awk khin a, anuntakna uh kisia hiam.
Samson pen Pasian ading aki tuamkoih Nazarite mi hi a, zu nelo ding, numei kiang pailo ding, sammet lo ding, misi lawnglo ding, cih kiciamna anei mi ahi hi. Ahizongin tu-in Delilah in zu nesak hi. Zu akhamsak khit ciangin asam zong met sak hi. Sam amet khit ciangin aphot leh a thahat nateng na beita a, tua panin agal ten a deih bangin bawl hi. A mittang khelkhiat sakin angawina ah ganhing zat bangin zang ta hi. Tu in agal Philistine te gualzo kisa mahmah uh a, a pasian uh tungah lungdamkoh pawi bawl uh hi. Tua pawi bawlna ah philistine mi tulthum te tungah phulak kikna nei in, tua ni-in, pawi en ding a pai mite khempeuh si khin hi.
Thukhupna:
Pasian zat mikhat asiat nading baih mahmah hi. Kum tampi sung asepsa teng nai khat sung thu in maimang ziau thei hi. Dawimangpa in mikhat asuksiat nading agamlapi pan melmate zang ngeilo a, kinaipih, kithuah pihte mah zang hi.
Delilah in apasal summet bawlna in nei hi. Kamzol leh khemna khitui zang hi. Itna taktak omlo in hukna leh sum deihna ama sungah om hi. Tulai in zong pasal hoih tampite pilna leh Pasian thukham a sungah neilo uh ahih manin aneihsa bek adeih numei hoihlo te khemna sungah awk in, anuntakna nangawn uh suplawh uh hi. Milim bia in, zudawn, sane in mangthang uh hi. Hih Delilah nuntakna in tuhun pasal te ading thuhilhna hoih khat ahi hi. Delilah in a pasal abawlsiat, dah na leh kisik kikna aneih lam zong ki gen nawnlo hi. Atawpna ah sum in ahotkhiat zawh bangmah omlo hi. Ama’ nuntakna, apasal leh a mipih Philistine mi tulthum in sih pih veve hi. Delilah in tuin numei tampi tungah thuhilhna hong nei hi. Ih bilkha in ngai leeng, amah pau lai hi. Kei ngaihsut bangin na ngaihsun kei un, kei sep bang hong zui kei un hong ci hi.
Ki neih khem itna, kamzol leh khitui te zuauthu hi thei ahih lam theihna ding; ki itna man omlo kitenna in supna leh a tawpna ah sihna hong tun veve cih hih tangthu pan in I thei hi. Mikhat’ nuntakna suksiat nading hanciamna in a tawpna ah, mitampi in sup lawh zaw thei hi. Sum bulphuh ki-itna pen a lauhuai mahmah ahi hi.
Dotna:
Delialah muanhuai lohna bang ci ki theih kholh thei dingin na um hiam?
A pasal tungah a gamtatna te na et ciangin bangdan na mu hiam?
Sum deih luatna in bang hong ngah sak cih hih tangthu pan bangci ki lak thei ding hiam?
