Dawi Gilo Kizo Sak Kei In
Agelh ~ En Khat Thang
Ni dang lai-in, lokho innkuan khat om hi. Tua innkuante ki-it liailiai in nuntak nuam sa uh hi. Hi banga nuam asa innkuante Satan in a muh ciangin "hite innkuan in kei hong phawk kei vial ve uh ee, bawlsia dih ni" ci-in a sawltakte sawl hi.
Kha nin khatna in zong lokhopa leitangte a sak dingin bawl sak hi. Lokhopa pau lo phun lo-in, tawlnga zelin a nasep hanciamin zom teitei hi. Kha nin in "hipa lungtom sak zo kei veng ee," ci-in taisan hi.
Satan in a sawltak nihna khat sawlkik zel hi. Lokhopa sun gilkialin sun-an ne ding hong kithawi leh, a sun-an le a tui bungteng na kiguk sak hi. Lokhopa in "aw kei sang a gilkial zaw mi om ahi ve maw, poi kei ei na gil vah uh hen" cih san ziau in, a nasep zom veve hi. Kha nin nihna zong guallel kisa zelin tai khiat san hi.
Satan in zong kha nin a khautpai zaw a tuam a khat sawl leuleu hi. Kha nin thumna pa zong lokhopa' lawm hoih bangin hong kibawl khem a, "lawm aw, kumkik ciangin kialpi hong tung ding kici hi, kiging khol in aw" ci-in deih sak gen hi. Lokhopa in zong buhtang, nekledawn theih tuamtuam tampi hong khol pah hi. Kialpi hong tung takpi ahih manin, a an kaihkhopte zuakin, lokhopa mihaupi hong suak ta hi. Sum hong nei pian ahih manin, a lo khawh hong khawlin sum met hong bawl hi. Zu le khamtheih zatui hoih lote hong zuak ta hi. A huahna kibeh lapin hong khangto lua mahmah pak hi.
Kha nin zong a Pu Satan kiangah pai-in, "tun lokhopa bawlsia zo ta ing ei" va ci hi. Nitak khat tua mihaupa in pawi hong bawl hi. Zulesa, nekledawn tampi tak a sabuai dimin nasemte in hong koih sak hi. A zu lim penpen hai khat tawi a hong pai a nasemnu khat a khe suikha in hong kituk citciat hi. Zu teng mihau pa puan tungah hong bua ahih manin, heh lua mahmahin "hi na ngawn tawi zo lo maw? deidai sop!" ci-in nasemnu tai gawp hi. Nasemnu in zong "Pu aw zingtung peka kipan nasep buai lua ka hih manin tudong an ne man nai lo hing, ka gilkial lua hi" a cih leh, a Pu in "nasep zo lopi an ne thei lo ding" ci-in pangbet thuah lai hi.
Satan in hi bang teng hong muh ciangin lungkim luata ahih manin, a sawltak kha nin kiangah "hipa bang va cih kiau na hia?" ci-in a dot leh kha nin in zong "lokhopa a kisap zah sangin a tamzaw a neih theihna ding ka hilh hiven, hong huaiham toto in, tun gitloh tawh kiphatsak tawh hong thuah hiveh aw, na muh dan hi mai ei" ci-in dawngkik hi.
Khualzin sum bawl tuahphate in lung ngai ni, gam dang tungte in zong i nuntakna lungngai pha ni. Khat teitei phawk thak i nei hiam?
Romans 12:21
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
