Control: Ki-ukzawhna
Agelh ~ ZSkhai, Maryland
Galati 3
“Kiukzolo” hong kicih ding i uutloh thu khat ahi hi. Zu nakdawn lua te “ki-ukzolo/kithengzolo” kici hi. A lungkham lua thei tawntungte zong lungsim “ki-ukzolo” kici hi. Na khat peuhpeuh a uang zatluate zong tua bang mah ahi hi; Gentehnain, khamtheih guihtheihte, anneek-tuidawn, kimawlna, nulepa omkhopna, nasep-silbawlna…cihte banah adang tampi omlai ding hi.
Ahi zongin, enpha dih ni e. Tua ahih leh “ki-ukcip tawntung” ding cihnopna ahia le? Tua pen i tup ding maw? Nasempu (Boss) ka theih khat [ci taktak leng tuabang mi tampi om ding hi] mi ukcipgawp thei khat om hi. Ama khutnuai ah a semkhate in a pu uh nehpiik maw? thuak keeikaai maw? Ahih keileh nasep dang khat aom phetin taisan pahlian maw, cih bangin om hi. Pate pawlkhat in zong tate ‘upcip gawp’ nuam thei hi. Zawhthawh bawl, lausak gawp, tawnbawl thei in hehsak thei uh hi.
‘Ki-ukzawhna’ icih ciangin ‘ki-ukcipgawp’ pah ding cihna hi lo hi. A cidam huai leh a nuam nuntakna i neihtheihna dingin ei leh ei ‘ki-ukzawh’ ding kisam mahmah hi. Hun man zawhna dingin I hun zatzia i ukzawh ding kisam hi. Vai khat peuhah kigingkhol leh kigingsa in i om theihna dingin i geelnate i ukzawh ding kisam hi. Thungai siam khat ihihna dingin i lungsimte leh i lei i ukzawh hamtang kuul hi. Nasep khat peuh i zawh theihna dingin a kip khensatna tawh a nelhsiahsiah-a sottoto thei lungsim i ukzawh kuul hi.
Ei mimal mahmah zong kiptakin kiukzawh ding kisam hi, cihnopna hi-a, ahi zongin midangte ukcip gawpkawm lo ding hi hang. Tua ahileh, ei hong ki-etteh ding maw leh? Khazih, etteh huai zaw ding hi. Khazih in a kisuplawh thei hanciamna, mimal lung-apgawpna, ngongtatna tawh ngahsawmna lampite zang lo-in, ama ngimna taangtun hi. A hun cinlian ciangin, Singlamteh vazuan hi. Hong tau-in “Kizo zo Hi” ci hi. A zo takpi leh a zo siangkhin ahi hi.
A tamzaw in Amah a um hiam? Na ciamnuihna maw leh? Mi atam zawin, tuni mah bangin, thudon lo-in om uh hi. Thatang zawhthu tawh mite tusakin amah thudon sak thei dingin aman a hih thei ding ahiam? Nak hihtheih lua ding hi! Agen thu khat naphawk lai hiam? “Ka Pa kiangah ngen theilo ding hongsa na hi uh hiam? Thakhat thu-in vantung mi tulthen tampi ka zattheih dingin hong sawlthei ding hi” (Matt 26:53). Kei hi leng vantung mi 72, 000 hong kem dingin sampah ding hi veng, nang hilecin zong sammah lo ding maw? “Amah leh amah a ki-ukzawh man-in mite tungah thuneihna zat ding panin kikhal zo ahi hi.”
Christian nuntakna tomgen leng ‘Lungsim Galdona’ kici thei hi: Khazih leh ei-aa Kidona ahi hi. Nisim i nuntakna ah “Kua in ukna nei hiam?” cih i kidot loh phamawh thu ahi hi.
Christian nupa khat kiang panin laikhak khat ka ngah a, tua sungah hong nuisak hiiuhiau gualkhat om hi: “Abeisa kum 38 sung tawntung kei leh ka zi Topa in hong kemcing himah taleh, tuuma kum 2 ½ sung ahihleh Ama ‘ukna sungah’ ka om uh hi.”
Honggen in, Topa in bangtan hong kemcing hiam? Kisiang gen ni maw… Aman nang hong ukkha hiam? Tuhun ciangin hih thu telkhialh ding pen baih mahmah hi. Ei leh ei i ‘ki-uk’ khaak ding baih zaw thei lai hi.
“Ki-ukzawh” ding na hanciam luatna hang in, ‘Uk theihloh’ in om kha kei in.
Ref:
[Day by Day with Charles Swindoll, Laibu pan a kila ahi hi; Chancellor, Dallas Theological Seminary & Founder & Senior Pastor of Stonebriar Community Church, Texas].
I nisim nuntakna ah Khazih ki-uksak lehang, mimal nuntakna, innkuan sung nuntakna, ulenau sung leh pawlsung khuasungah ki-itna, ki-lemna, kithutuahna om semsem in Pasian thupha sang semsem ding hi hang. Zeisu Khazih a ki-uksak ciat nuntakna tawh a nungta ciat dingin laisim mimal ciat Topa’n thupha hong pia ta hen!
Laibu Saal / Zomi eLibrary
