Bunghawm Khat le Niangtui Hai Nih
Agelh ~ En Khat Thang
Mihingte i nuntakna sungah nasep silbawlna, gentheih haksatna le gualnopna, dahna thu tuamtuamte tawh nisim kibuai den hi. Ni khat nai 24 pen kicingsak lah liangin i buai hun teh "Bunghawm khat le niangtui hai nih" thu i phawk den dingin kisam hi.
Ni khat, sang naupangte philosophy a hilh professor pa a class sungah van pawl khat tawh kigingsa in na om hi. Sangnaupangte a kim ciangin, Siapa in pau mello-in ah, Bunghawm khat hong lakhia aa, tua sungah golf tang hon khat thunsuk hi. Golf tangte bunghawm a dim ciang, Siapa'n “a dim nai hia?” ci-in naupangte dong hi. Sang naupangte in “dim mah ei”, ci-in dawng ngeingai pah uh hi.
Siapa in, suangsi hai khat tua golf tang lakah sun beh in, a sinlitlit pian leh suangsite lut sukin bung hong dim leuleu hi. A ngei mah bangin sang naupangte kiangah “a dim hia?” a cih leh “dim mah Sia aw” ci-in thukim ciat uh hi.
Siapa'n a ban zomin, sehnel hai khat suangsi kawmlak ah sungsuk leuleu hi. Petpet ah, sehnel teng in bungsung mun awng khempeuh hong dimto sak hi. Siapa'n hong dong leuleu in, “sang naupangte aw, a dim tatak hiam?” a cih leh, kituak takin “dim mah hi Sia aw,” ci-in dawng khawm uh hi. Siapa khawl nai tuan lo-in, niangtui hai nih bawl tadih in, bung sungah hong sun beh leuleu mawk hi. Sang naupangte nui ngeingai uh hi.
“Khaileh!” ci-in a nui zuahzuah teng hong daih teh siapa in, “a kuamaciat in hi bunghawm pen na nuntakna bang un na tel theih dinguh ka deih hi. Golf tangte pen na nuntakna ah a thupi diak ahi, na Pasian, na innkuanpih NulePa, zi-le-tate, na cidamna le na uk diak khatin ngaihsun un, a dangna khempeuh om lo-in, hi a thupi diakteng nei peuh lecin na nuntakna uh a dim hi lel hi. Suangsite pen ahih leh, a dang i nasep tuamtuam, inn le lo, mawtaw cih bangte in bulh ding hi a, sehnelte leuleu ahih leh a dang nengneng a thupi lualote ahi hi. Hih sehnel pen bung sungah kithun masa hileh golf tang le suangsite kita nawnlo ding hi.”
Siapa in a thugen zomin, “I nuntaknate tua mah bang hi a, i hun le thatangte a thupi masalo nengnengte tawh i beisak leh, a thupi zawtham na dangte a ding mun awng om nawn lo dinghi. Tua ahih manin, na nuntakna nopsakna ding nate thupi sak masa in. Na zi na tate tawh hun nuam zatsiam in. Na cidamna ding kin bawl masa in. A om lo theilo thupi nate ahi golf tang bangte kin masa in. A kisam diakte lenkip masa in, a dang neuneute pen sehnel hi sak in.” a cih laitak, sang naupang numei khat in a khut lamin, “Sia aw, niangtui hai nih e leh, bang a deihna aa?” ci-in a dot leh, Siapa nui kawmsa in, “lungdam ei!, hi nong dot theih” ci kawmin;
“Hih niangtui hai nih pen, na nuntakna bangzah takin vai thupi tuamtuamte tawh na buai tateu zongin, na lawm it khat tawh niangtui na dawn khop hun ding, na kikhawlh khop hun ding om teitei hi,” cih teng Professor pa in hilh hi.
Manlah kawmkalpi mah a itna niangtui hawmkhawma holim khop zel pen manpha se hi. Kiholimna pan, kimeltheihna khanga, kimeltheihna pan ki-itna piang hi. Ki-itna omna ah kilemna kipan hi. Kilemna om peuh leh kimapang khawm thei hi. Mapan khopna ah gualzawhna om hamtang hi.
Tua banah tangthu sunga bung hawm pen i nuntakna limlak hi a, tua i nuntakna bunghawm sungah golf tang banga thupi pen ahi Pasian i koih masak ding hong phawk sak hi. Pasian koih masa kha loin, sehnel, suangsi bang ahi leitung na tuamtuamte peuh i guan masak leh i nuntakna ah Pasian ta zo nawn lo dingin lawhcinna kician ngah lo-in, i kitasem den ding hi. Hi thu Topa Zeisu in tel lua mahmah ahih manin Mathew 6:33 ah “Pasian Gam le a ma dikna zong masa un, tua hipeuh leh a dang nate hong kipiak beh ding hi” cih thu hong hilh ahi hi. Pasian masak peuh leng leitung huahna, gualzawhna, lungdamna cihte in hong nung zuih dinga, thupha khempeuh tawh a kidim nuntakna i ngah thei ding hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
