BILLY GRAHAM NUNTAKNA PANIN PILNA.

Agelh ~ ​​ Tg. Samuel Nas

Pasian mizat minthang Billy Graham in tawntung khawlmun nuam ong na zuatsan ta cih thu I za khin tek ding hi. Amah a it a ngai te adingin a dahhuai mahmah thu ahih laitak in ama adingin a lungdamhuai pen ni hi ding hi.

Van mite in thupi takin na dawn ding uh a, citak tak leh muanhuai takin ana a sepsak I Topa kiang pan "A citak ka nasempa" cih thupha sang in, a it a zi Ruth tawh kum tampi khit ciang kimukik ding cih khawng keima om muanin ngaihsun in ka mit kha sin a, "Nuam sin teh" cih bek ka gen thei hi.

AMAH MUANHUAI

Dr. Billy kum 99 sung a nuntakna kammal khat in kigen ding hi leh, "Muanhuai" cih hi ding hi. Pasian tungah muanhuai a, sum le pai vai leh numei vai ah zong muanhuai hi. Kum 80 sung dektak phial Pasian na a sepna sungah, sum vai hi in numei vai ah hi ta leh gen bang hetlo in muanhuai paisuak a, etteh taak mahmah hi.

AMAH KINIAMKHIAT

Lokho mi khat lel (farmboy) ahihna leh Pasian laptoh mi ahihna, Pasian in zang ahih manin mi hampha ahihna leh Pasian in zanglo in lamsang lo hi leh hi ciang tung lo ding ahihna kitel sinsen a, kiphasak ngeilo hi. Kiniamkhiat tawntung hi.

Ama min tawh library a kibawl Billy Graham Library a kihon ni in zong lungdam mahmah a, ahizongin lungkimlohna khat nei hi. "Billy Graham cih mun tam ah kidawk lua" ci hi. Amah kidawk lua in, Jesu mel a liah khak ding lau hi. Amah kilang lo in Jesu kilang zaw leh cih lunggulhna nei hi. Khatvei vei Pasian nasem kici napi a Jesu sanga zong a minthang nuam zaw phial, mimal minphatna khawng a deih mahmah lel kei bangte pawl adingin sin ding lesson hoih mahmah khat hong nusiat hi.

PASIAN MAH LUNGKIM SAK NUAM PEN

Na sih khit ciang mite in bang ci'n hong kigen leh na ut hiam? cih dotna pen amah in a dawnna ah, "Mi khat in ka tungtang hoihtak in ong gen leh cih lunggulh ing. Tua mi khat pen Pasian hi. Ama maitang ka muh ni in, 'A hoih leh a muanhuai ka nasempa' hong cih ding lunggulh pen ing." ci hi.

A KISIKNA PAWLKHAT

A tangthu a gelhna 'Just As I Am' cih laibu sungah a kisikna pawlkhat na gen hi. Pilna in i neih theih khak leh ci-in a gen dandanin kong teikhia hi.

"Ka hun paisa ka nuntakna ka lungngaih kik ciang ka lungdamna ding tampi om a, ka kisikna zong tampi tak om hi. Ka lawhsapna tampi tak omin ka thei a, ka bawlphat nop​​ tampi tak om hi. Hi thei hi leh ka thugen ka khiam ding a, ka laisim ka khan ding hi. Ka innkuanpihte tawh zong a tamzaw hun ka zang ding hi.

Tuma kum sawm thum kum sawm li lai khawng a ka hun zatzia, ka manlah theihzia khawng ka ngaihsutkik ciang lamdang ka sa hi. Ni tawmcik sungin gam khat leh gam khat kawmin thu kigen kawikawi hi. Tua pen a kisam pen mah hiam? Hong kicialnate khempeuh pilvang takin ngaihsun in ka na sang hiam? Pilvang khin zolo deuh in kithei ing. Ka innkuanpihte tawh hun ka zatkhop loh ni pen tun a mangsuak hi ta hi. Ka khualzinna tampi tak pen a kisam mahmah ahih laitakin a kisam hetlo zong tampi na om hi.

Hunpha ngahkik thei hi leng, kha thu ah ka khantohna ding, Pasian tawh kinai zaw sem in Jesu ka bat semsem nading hanciam ning. Thungetna in hun tamzaw ka zang ding hi, kei ading bek hilo in midangte ading zong. Lai Siangtho a tamzaw sem simin ka lungngai ding a, sermon kisakkholhna ding beka a sim hilo in, a thute ka nuntakpih takpi theih nadingin ka sim zaw ding hi. Keimah bang dinmun ah a dingte adingin Lai Siangtho pen sermon kisakkholhna lungsim bekbek tawh sim ding baihlam mahmah a, a thute kei ading bang phattuamna om cihte kingaihsun nawnlo kha thei hi.

Tua leh, Pasian mite tawh kikholhkhopna zong thupi ngaihsut zaw sem ning. Thu hong hilh ding, tha hong pia ding leh tai ka kulna munah hong tai thei ding ka thu up pihte tawh hun tam zaw sem zang ning.

A tawpna ah, ka kisik hetlo thu khat in ahihleh kum tampi paisa a ka thukhensatna, hong sam pa sapna dawnga Lungdamna Thu tangko dinga ka kipiakkhiatna pen hi."

A MAILAM LIMCI

A sihma pekin hih thu na gen khin zo a, tuni in ei adingin manpha diak hi.

"Hun khat ciang Billy Graham si cih thu na za ding hi. Mal khat zong na um kha kei in. Tua hun ciang kei pen tu-a sangin nungta zaw kan lai ding hing. Ka tenna mun a kilaih hi bek ding a, Pasian kiang a tung ta hi ding hing."

MANGPHA MAW SIA

Na suahni in mi thupi hi ci-in thupi takin ong kimuak kei mah leh leitung na nusiat ni in bel thang vangvang cei Sia. Na nuntakna in ka nuntakna uh ah thu tampi hong gen hi. Leitung kiu khat pan nangmah itna thu ken zong hong pulak ing. Mangpha maw Sia.

Dt. 22/02/2018