BILHAH
Kikep lohna tawh
apasal maipha angahlo numei
Pian 29:29;30:3,4,5,7; 35:22, 37:2; 46:25; 1Khang 4:29;7:13
Agelh ~ Rev. Dr John Thang Hum leh
Dim Lun Zam
Bilhah pen Jacob in a it mahmah a zi, Rachael’ nasem nu ahi hi. Jacob pano Laban in Rachael tawh a ki teen ciangin a nasem ding a apiak khop ahi hi. Kum tampi sung Rachael in ta aneih theihloh ciangin Rachael in azi kik dinga Jacob a piak ahi hi. Tua hun lai a Hamurabi thukham in, zi pi tawh ta aneih kei leh a nasem numei pia in ta neisak uh hi. Ta aneih leh a zipi suan leh khak dan in ki ngaihsut sak hi.
Bilhah pen sila hina pi, sila te lak ah, a suakta sila nam in ki bawl hi. Ahi zongin thupitsak luatloh pawlin kikoih hi. Bilhah in Jacob tawh tapa nih- Dan leh Napthali nei hi. Hih Dan leh Naptali minamte tampi pha uh hi. Mi thahat Samson zong Dan minam ahi hi (Thukhente 13:2).
Jacob omloh kal in a tapa-uu pen Reuben in Bilhah na mawhpih hi (Pian 35:32). Hih thu in Israel sungah maizumna piangsak hi. Hih mawhna hangin Jacob in Reuben inn luahzaa pia nawnlo in Joseph (tate) pia hi (Pian 35:22; 49:4; 1 Khang 5:1).
Hih tawh kisai in Jews te tangthu kigelhna khatah hibangdanin gen hi. Bilhah in a puanbuk sungah zu kham sa leh puan silhlo sa in om hi. Tua pen Reuben in a muh ciangin va omkhop pih hi. Jacob in hihthu a theih ciangin azi Bilhah luppih nawnlo hi. Reuben ki nak sik mahmah ahih manin, a sih kuan ciangin atate tungah a khialna nakpi pulak a, tua bang gamtatna ahih loh ding uh vaikhak phapha hi, ci-in gen hi.
Korin pawlpi sungah hi bang thu khat (a nukik tawh om khawm) napiang ngei hi. Paul in agen na ah, hibangdan thu pen thu-umlo mite lak nangawn ah apiang ngeilo thu ahi hi. Hi bang thu hangin amaute dah in kisikkik huai mahmah hi napi, tua cilo in kiphatsak pih zawsop uh hi. Hi bang dan mite pen a kha in gupna angah na dingin a pumpi Satan khut sungah bawlsiatna a thuak ding a, piak mah abangin gen hi. Pawlpi sungah hi bang dan thu a omleh Pawlpi makai ten nakpi tak thungen a vaihawmna neih ding ki sam hi. Hi bang dan mawhna in, mimal, innsung leh pawlsung maizum na hong piang sak thei hi.
Thukhupna
Mawhna pen khat leh khat kikhil dimdiam hi. Zu nek na leh angkawmna, mithahna cih te ki zomto hi. Mawhna i bawl khak ciangin nung gu zong ompah hi. Ahi zongin Pasian itna tawh kidim Pasian ahih manin, kisikkik in thum leng hong maisak a, tua ban ah mawhna hanga thuak ding daan pan zong hong kipelhsak thei lai hi.
Inn sung leh pawlpi sungah numei tawh mawhna, milim biakna cih te in nung gu nei a, ki thuak kik thei hi. Tua ahih manin inn sungah pa leh nu leh pawlpi makai ten tavuan lian pi I nei hi. Bilhah nuntakna, Reuben gamtatna te in ih pelh ding thute hong theisak hi. Paunak ah, mipil in amai a piang ding te mukhol in pelh hi, ci hi.
Dotna
Bilhah bang ci bangin Jacob zi hong suak thei hiam?
Bang hangin Jacob in luppih nuam nawnlo hiam?
I Korin 5 sungah hibangdan agamta mi Paul in bang ci theihtheih a, bang ci thukhen hiam?
Pawl in tua bang ahih theihnang thu neihna bangci neih hiam?
