Bawlung Siam Zidane le Khedap Thu
Agelh ~ En Khat Thang
" I once cried because I had no shoes to play football with my friends, but one day I saw a man who had no feet, and I realized how rich I am." - Zinedine Zidane
Leitung ah bawlung siam mahmah a minthang Mr. Zidane kammal ahi hi. "Ka neu lai-in ka lawmte tawh bawlung ka suih khopna ding bawlung khedap nei lo-in ka kap ngei hi. Ahi zongin pasal khe tawng khat ka muh ni khatin, kei le kei a hau ka hih lamtak ka kiphawk thei pan hi."
Khat veivei, eite in zong i deih, i lunggulh khat peuh i neih zawh pak loh teh ei neih bang a nei zo lo zong a om ahih lamtak phawkin, i neih bangbang tawh a lungkim zo i hih ding thupi hi. Deih genin pan leng mihingte kihuaiham toto lel dinga, mong nei lo deih beh, deih behna tawh lungkhamna a kiguanguan i hi ding hi.
A dang khat leuleu ah, hanciamna a thupit lam i gen nuam hi. Zidane in a neu lai-in, khedap nei zo keng ci-in bawlung sui lo-in om hi leh, leitungah minthang vangvang het lo ding hi. Na khat peuhpeuh uk in sep ding bawl ding i kipat sawm ciangin tua nei lo, hih kisam, tawm vei ngak lai phot ning, ka lawm dingte mahmah piang sa keng,.. cih bangin paulap i zon tohtoh sawm leh a piang zo lo ding vive hong hi dingin matutna kician i nei zo ngei kei ding hi.
Siam nopna, theih nopna, ngah nopna lungsim phu velvel i neih masak nak leh 50% pen a kigual zo khin ahi hi. Lunggulhna kician i neih nak leh, a lampi ding hong kihong toto dinga, ni khat ni teh pelmawhin gualzawhna ahi ciang khat i ngah hamtang ding hi.
Khangnote Sang i kah leh, lai ong nop man, degree ngah nop man bek tawh laisin lo-in, theihnopna, deihna takpi tawh sin ding kisam hi. Tua hi leh, i sinte kizang thei pan bek ding a, i sunmangte hong tangtung zo pan ding hi.
Ka zak ngei Lai Siangtho lam siamte thugen, Kumpi David in Pasian a dingin Biak Innpi lam nopna lungsim a neih in 50% zo sak khin hi, kici hi. A ma khang ah Pasian in a lamsak loh hangin, a tapa Solomon in a Pa David gelsa teng a zom to hi lel hi, kici hi.
Lunggulhna + hanciamna + lampi maan = Gualzawhna hi a, tua gualzawhna sungah Pasian mun i piak ciangin lungdamna piang bek tham lo, midangte a dingin thupha i suak ding hi.
Laibu Saal / Zomi eLibrary
