BATHSHEBA
Kumpipa’ lunggulhna
manlo a nial ngamlo numei
2 Sam 11:2,3;12:24; I Kum 1:11-13;2:3-19; 1 Khang 3:5
Agelh ~ Rev. Dr John Thang Hum leh
Dim Lun Zam
Bathsheba min “kam khapna pan a kingah tanu” cih nopna hi. Kanan numei Ahithofel ta, Eliam te suan hi napi Pasian athei innkuan sungpan hong piangkhia hi. A pasal pen David tungah a citak mahmah galkap mangpa, Hit minam, Uriah ahi hi.
David ze-etna lel
Uriah pen Isrel galkap mang ahi hi. Hih hun sungin Isrel minamte in gal nakdo mahmah uh hi. Uriah makaihna tawh galkap khempeuh galmai ah nasia takin mapang uh hi. David ahihleh a kumpi inn sungah lungmuang takin a om hithiat hi.
Nikhat innpua lam varenda ah a khuadak leh Bathsheba kisil a mu hi. A kisil na mun pen bangmah in dal lo hi khangel ding hi. David in tua Bathsheba kisil amuh ciangin a mit khah thei nawnlo hi. Mit phialo hial in en tentan hi. Ze-etna pen eima sungpan hong pai a, tua in hong zolna I zuih ciangin mawhna piang hi. Mawhna hong gai a, a kicin ciangin hong suak a, tua mawhna thaman pen sihna hong suak hi (James 1:15). David in nial ding ahihlam theilo in, mawhna zolna zuikha ta hi.
Billy Graham in hih tawh kisai agen na ah, numei khat a khatveina va-et khak pen kipelh theilo a, anih veina i va-et kik leh mawhna ahi hi, cih gen hi. Joyce Meyer in zong ih lungsim sungah mawhnopna hong lut phetin setkan nih sungin ih nial keileh, tua mawhnopna in hong zopah hi cih gen hi.
David in amuh bek hilo in, om khoppih ding ciang dong a mitkha tawh bawlin ngaihsun hi. Nasem te a kansak ciangin, Hit mi, galkap mangpa Uriah zi ahihna theikhia hi. A inn ah sam sakin luppih ta hi. Bathsheba in hoih asak loh hangin anial ngamkei hi. Banghanghiam cihleh a pasal nasep apia pa, leh a kumpipa hi mawk ahihman hi. Nial himahle zong kilamdang loding muta hi. Tulai leitung paidan zong hibangdan tam thei mahmah hi. Nasepna pute in zawhthawh thu tawh a nasem numei te thagum hatna suangin a siatsak uh tam mahmah hi. Hi bang dan te Pasian vangliatna bek in hong huhthei hi. Joseph zong Izipt manglianpa Potifar innsung hong tung a, a tonu in zawhthawh sawm ahih hangin Joseph in a sungah nialzawhna ding upna gil nei ahih manin gitlohna in nazo khalo hi.
A pasal in sih lawh
Bathsheba in gai ahihlam atheih ciangin David thu zasak hi. David zong dawimangpa ngiankawi zangin amah kisel sawm hi. Amawhna a dawkloh na dingin a pasal, Uriah galsimna pan inn ah ciahin azi tawh a lupkhop ding sawl hi. Uriah utlo in nial hi. Nih vei thum vei asawl hangin Uriah a zi kiangah lum nuamlo hi. David tungah a thuman dan pen hi bangin gen hi, “Galkap te galmai ah haksatna a thuak laitak, kei kazi tawh nuamsa in ka om nuamkei hi,” cih ngiat hi.
David in ki zol zolo a theih ciangin ngiankawi khat tawh vat kik hi. Galkapmang dang khat kiangah, Uriah galmai haksapen na mun ah a puak ding leh kuamah in ahuh lo ding gen hi. Agen bang lianin ki hih a, Uriah galmai ah si hi. Hih thu, azi, Bathsheba in azak ciangin ni tampi sung an-ne-tui-dawn zolo in dah leh kap in aom hi. David in Bathsheba dahna teng aven khit ciangin Bathsheba azi dingin la hi.
“I kiim, I kiangah thu manlo khat hong om ciangin (mikhat in a manlo asep ciangin) amah sang a thahatzaw khatin ado kei leh tua hoihlohna pai suak ding a, mi tampi in suplawh ding hi”, ci-in Fuller Lai Siangtho sangpi ah sia asem Professor J. R Clinton in genngei hi. Tua bang lian mahin tu in David nasep asawn thal ding amah sang thahatzaw mi khat kisam hi. Kua hi ding hiam? David pen galkap minthang kumpi hi a, amah anial ngam ding, amah sang thahatzaw kuamah omlo hi. Ahi zongin amah sang thahat zaw khat in tung lam pan a sepna khempeuh na mu gige hi (2 Khang16:9). Pasian in kong a khak leh kuaman hong zolo a, kong ahon leh kua mah in khak kik zolo hi. Pasian in siatna a vattan ding mihing mah zang hi. Mihing tungah tha apiak leh tua miten sem zo hi. Noah in mi tampi lang khat a dingin Pasian thu teci pang a, azo hi. Elijah in baal kamsang za sagihte to a, a zo khin hi. David mahmah in Pasian thapiak na tawh Goliat that zo hi.
David Mawhna ki pholak
Pasian in David tawh kimu dingin a kamsangpa Nathan sawl hi. Nathan in David amuh ciangin thalnial pah buatbuat loin David lungsim la ding leh so sak ding tangthu khat tawh gen hi. “Tuu zakhat nei pa in, tuu khat bek anei pa’ neih sunsun laksak in tuu neipa na ngawn that hi,” ci-a a gen leh David in, ‘tua mipa in nakpi takin thuak ding hi,’ va ci gamgam hi. Kamsang pan zong, ‘tua mipa nang hi teh,’ va cita hi. Ta aneih hangin Pasian in atapa nuntakna alak ding gen hi. Agen bangin a tapa si a, David nak dah mahmah in an zong nelo in Pasian maipha a zongkik hi. Late 51 sungah mawhna abawl manin a sungah bangzah dahna a thuak khakna leh Pasian’ kha a sungpan alak khiat loh ding angetna gen hi. Pasian in mawh maisak Pasian ahihna Late 32 sungah gen hi.
David in Pasian lampi pan a pial khiat a, mawhna a bawl man in a inn sungah buaina in zui den hi. (2 Samule 12:11). A ma ta tektek khatin amah lang pan hi (13:4). Atate sungah phu kilak kikna hong om hi (15:9), Atate khat in lang pan hi (1 Kum 2).
Bathsheba muh kholhna leh kipiakna
Bathsheba in David neumuh phial kha ding hi. Ahi zong it kik thei hi. David tawh ata masa hong sih ciangin a lungkham dinga, ‘ka mailam ding bangciding aitam,’ zong cikha phial ding hi. Ahang pen ta pasal neikei leh a nuntakna uh mailam lungmuan omlo hi. Bathsheba pen atungah I gensa bang Pasian zahtak innkuan sung pan hongpai ih cih mah bangin, Pasian tung bek ah lamen ding hi. Pasian zahtak cih ciangin Pasian maipha zong, cihna zong ahi hi.
Tapa nih na Solomon hongneih ciangin alungmuang hi. David in zong a kumpi za Solomon in luahding kamciam pia hi. Bathsheba in tua kamciam alungsim ah koihin lenkip pah a, Solomon zong tua dingin makaih to pah hi. Taanglai in kumpi khat gualzawhna pen anute hang tampi kihel hi. Nu pil in tate a pattah siamna tawh kumpi gam kip hi. Solomon kumpi pan a kiat theih nading thu tuamtuam te pan Bathsheba in na honkhia hi. Bethsheba a khialhna munkhat ah hong dawk hi. Adonijah (Solomon sanggampa, nu ki bang lo) in David a kem Abishag numeino, azi dingin Bathsheba tung tawn in ngen hi. Hih pen mi ading deih sakna, u leh nau sung thukhualna, lungsim hoihna zong hithei kha ding hi. Ahi zongin alangte ngianvatna theilo hi. Solomon in pilna tawh khensiam thei a, anu palai sepna na nial hi.
Pasian in mawhna maisak bek thamlo in David leh Bathsheba mahmah Jesu Khris khang simna sungah na guang hi. Hih pen Pasian in kisik kikna tawh azuante athupha piakna hong lah nopna hi. Solomon in anu’ pattahna te mah siksan in lai agelh kikna ki mu hi. “Naupang khat a neulai in lampi man tawnsak lecin a gol ciangin lampial nawnlo ding hi.” ci-in na gelh hi (Pau 21:6). Tangthu kan te in, Paunak 31, “A Pahtakhuai, numei gina thu” zong Bathsheba in agelh hi, ci-in gen hi.
Thukhupna
Bathsheba nuntakna ah, ih lak theihding thuhoih tampi hong musak hi. Amasa in a nupa un, a nasepna, a topa (kumpi David) tungah thuman mahmah ahihna uh i mu hi. A pasal, Uriah in kumpipa tungah thumanna leh cihtakna a lak galkapmang hi. Koi pan mu ihhiam cihleh, David in innlam ah sam a, azi tawh omkhop ding agen ciangin, galkap dangte galmai, samai ah a om laitak amah azi tawh nuamsak hithiat ding ngaihsun zolo hi. Hih pen thukhualna, cihtakna leh ci leh sa deihna ki khal zawhna ahi hi. Khat veivei ciang thu-umlo mite peuh thu-um a kici te sang nasepna te ah acitak zaw I muthei hi.
Bathsheba in a pasal asih ciangin na asak luatna lak hi. Hih in a pasal a itna leh ama tungah a cihtakna lahna ahi hi. Nitum nalam gamte diakah, ki thuman nawn lo lua ahih manin hi bang dan om nawnlo hi.
Kamsiatna tawh Bathsheba ki zawhthawh bawl kha ahi zongin, amai lamding ngaihsut siam in manawt ding bek ngaihsun pah hi. David zong amawhna maisak thei in it thei hi. Midangte a deihsakna zong kimu hi. A diakdiakin a tapa Solomon a pattah ziate nakpi tak etteh huai mahmah hi.
Dotna:
Bathsheba Pasian thu um innsung pan hong piang ahihna bang ci ki theih hiam?
A pasal tungah a cihtakna bangci ki lat hiam?
Nu hoih ahihna bang ci ki theih hiam?
Midang ading adeih sakna bangci ki muh hiam?
Jesu Khris khang tangthu ah Bathsheba bangci ki hel hiam?
Bathsheba in Paunak bang mun gelh ding ki um hiam?
