BANGHANG JESUH LEITUNGAH HONG PAI-3
Agelh ~ Kap Za Khai
……AZom
151. Vangliatna tawh pahtawina ngah nading: Hih thu hangin Pasian in a lianpenin amah koih a, min lian ding khempeuh sangin a min lianzaw-in koih hi. Tua ahih manin vantung, leitung, leinuai-a om mi khempeuh in Jesuh pahtawi in khukdin ding uh a, Jesuh Khrih in Topa ahi hi, ci-in taangko-in Pa Pasian a min thangsak ding uh hi. (Fil.2:9-; Mang.5:12; Heb.2:9)
152. Vantung a Pa Pasian a lungdamsak dingin: Khrih in eite a hong it manin Pasian in eite mawhna hong maisak theih nadingin a namtui biakna-in Pasian kiangah a kipiak mah bangin note zong itna tawh na gamta un. (Efe. 5:2)
153. Ze-etna pan hong huh dingin: Ama pumpi mahmah in ze-etna leh gimna thuak ahih manin tuhun ciangin tua bang a thuakte a hong huh thei hi. (Heb. 2:18)
154. A kikhel lo i siampi dingin: Tua ahih manin eite in Pasian’ omna vantung a va tung khinsa, Siampi Lianpen ahi Pasian’ Tapa Jesuh neikhin ihih manin i sansa upna thu kiptakin len ni. (Heb. 4:14-15; 7:24; 1 Tim. 2:5-6)
155. A manpha pen thu hong theisak dingin: Mi khatpeuh in hih leitung khempeuh a ngah hangin a nuntakna bulpi (kha) suplawh leh bang phattuamna om ahi hiam? Ama nuntakna bang tawh leikik thei nawn ding ahi hiam? (Mk. 8:36-37)
156. A nungta tawntung Pasian hong lak dingin: “…Pasian pen misite Pasian hi loin mihingte’ Pasian hi.” (Mk. 12:27)
157. Ama hehpihna bucing den ahihna hong lak dingin: Ahi zongin Topa in kei kiangah, “Na tha a nem ciangin keima vangliatna hat mahmah ahih manin nangma kisapna pen keima hehpihna hi bek hi,” ci-in hong dawng hi. Tua ahih manin keima sungah Khrih vangliatna hong omtheih nadingin lungdam takin ka thaneemna ka kisialhpih semsem hi. (2 Kor. 12:9)
158. Ama hong leikhinsate i hihna hong lak dingin: Note pen Pasian in a hong leisa na hih manun na pumpi uh Pasian’ minthan nadingin na zang un. (1 Kor. 6:20; 7:23)
159. Ama innkuan hong suaksak dingin: Note tungah Pasian in a hong piak a Kha Siangtho in note na lau nadingun sila-in a hong bawl hi lo a, Kha Siangtho in Pasian tate a hong suaksak ahi zaw hi. Tua Kha Siangtho mah in Pasian pen, Pa aw, Pa aw, hong ci theisak hi. (Rom 8:15)
160. Ama na i sep nading: Topa na Pasian uh na zahtak ding uh hi. Ama na bek na sem ding uh a, ama min tawh na kiciam ding uh hi. (Thuhilhkikna 6:13)
161. Ama nungzui dingin hongsam ahihna i theih nadingin: Jesuh in amau tegel kiangah, “Kei hong zui un; nga mat bangin mi tampi a huaite kong suaksak ding hi,” a ci hi. (Mk. 1:17)
162. Amah bangin a sem thei ihihna hong theisak dingin: A mantakin ka hong genin ah, kei hong umte in keima sep nate mah sem ding hi. Pa kiangah kei ciah ding ka hih manin keima sep sangin zong a lianzaw sem lai ding uh hi. (Jn.14:12)
163. Amah bek diktanna le sianthona cih hong theihsak nading: Ahi zongin Pasian in Jesuh Khrih hangin note tungah nuntakna hong pia a, tua Jesuh Khrih pen eite’ pilna, Pasian tawh i kipawl theihna, Pasian’ mi siangtho suakin, hotkhiatna i ngah theihna ahi hi. (1 Kor. 1:30)
164. Amah bek hauhna ahihna hong theisak dingin: A na ka sep i Topa in ama hauhna tawh kizui-in Khrih Jesuh hangin note’ kitangsapna khempeuh hong pia ding hi. (Fil. 4:19)
165. Amah bek tuu cing hoih ahihna hong theisak dingin: “Kei, tuucing hoih ka hi hi. Tuucing hoih in a tuute sihpih ngam hi.” (Jn. 10:11)
166. Amah bek tuu kong ahihna hong lak dingin: Tua ahih manin Jesuh in amaute kiangah thu genkik leuleu a, “A mantakin ci lehang, kei pen tuute’ paina kongpi ka hi hi.” (Jn. 10:7)
167. Amah bek ukna nei ahihna i theih nading: Vantungah ukna aana vangliatna a neite khempeuh tungah Khrih in ukna aana nei lai a, hih leitung bekah hi loin a hong tung ding leitungah zong amah a lianpen ahi hi. (Efe. 1:21)
168. Biakpiak zia hong hilh dingin: Pasian pen Kha ahi hi; amah a biate in tua Kha’ lamlahna le thuman taktak tawh a bia ding uh hi, a ci hi. (Jn. 4:24)
169. Damna khempeuh hong pia dingin: Mittawte in khua mukik a, khebaite pai thei kikin, miphakte damkik a, bilngongte in khua za kikin, misite hingkik a, mizawngte tungah Lungdamna Thu a kihilhnate va gen un. (Matt. 11:5)
170. Deidanna nei lo Pasian hong lak dingin: “… amah in mihoihte le misiate tungah a kibangin ni taangsak khawm a, a gamtat phate le a gamtat siate tungah zong a kibang mahin guah zusak khawm hi.” (Matt. 5:45)
171. Ei le ei i kipanpih theih nadingin: Khatlekhat maitai takin zinleleeng na kido un. Pasian’ piak na a zatsiamte bangin Pasian’ kiang panin na ngah uh nate midangte’ phattuam nadingin na zang un. (1 Pet. 4:9-10)
172. Eite lamah palai hong sepsak dingin: Ahi zongin mi khatpeuh a khialh ciangin eite adingin Pa Pasian kiangah a hong thumsak dingin a thuman Jesuh Khrih i nei hi. (1 Jn. 2:1b)
173. Eite minthan nading: Tawlkhat na thuak khit uh ciangin, Khrih tawh na kipawlna hangun tawntung minthanna a ngah dingin note a hong sam, hehpihna kicingin a nei Pasian in note a cingtaakin hong bawl ding a, kipna, thahatna, bulkip kician hong pia ding hi. (1 Pet. 5:10)
174. Eite sungah hong omkhawm dingin: Banghang hiam cih leh keima minin minih le thum bek nangawn a kikhopna peuhpeuhah kei ka om hi, a ci hi. (Matt. 18:20)
175. Eite tawh hong omkhawm dingin: Nungak khat gai-in tapa khat nei ding a, ama min dingin Emmanuel kiphuak ding hi, ci hi. Emmanuel a khiatna in, eite tawh Pasian hong omkhawm hi, a cihna ahi hi. (Matt. 1:23)
176. Eite zong ama ai-awh ihihna hong theisak nading: Tua ahih ciangin note pai unla, midang khempeuh, keima nungzui mi suaksakin, Pa min, Tapa min, le Kha Siangtho min tawh tui sungah na phum un. Tua ciangin note tungah ka hong gen thute khempeuh a zuih nadingun na hilh un. (Matt.28:19, 20)
177. Eite’ ai-awhpa ahihna hong lak nading: Eite’ mawhna hangin a si dingin Jesuh kipia a, Pasian tawh eite i kipawl theih nadingin kihingkiksak hi. (Rom. 4:25)
178. Eite’ limpha dingin: Khrih mahmah in zong note adingin thuakin, ama khekhap na zuih theih nadingun etteh ding lim hong nusiat ahih manin hih bangin a thuak ding mahin Pasian in note a hong sam ahi hi. (1 Pet. 2:21)
179. Haksatna sungah Pasian tung lungdam theih nading: Ahi zongin Khristian hihna hangin gimna na thuak uh leh kuamah in maizum ngaihsut kei unla, Khrih min hangin na thuak manun Pasian tungah na lungdam un. (1Pet. 4:16)
180. Hihna bangbangah i lungkim theih nading: Bangbang in om taleng a lungkim thei dingin a kisinsa ka hih manin hih bang ka hong gen ciangin ka kitangsapna a hong pulak nuam ka hi kei hi (Fil. 4:11). Sum deihluatna tawh na kipelh nadingun na nuntakna uhah kikem unla, na neihzah uh tawh lungkim un. Pasian in, “Note ka hong nusia ngei kei ding a, ka hong tamasak ngei kei ding hi,” hong ci hi. (Heb. 13:5)
181. Hunbup Pasian ahihna hong theisak dingin: A beisa hun, tuhun, le mailam hunah zong a om tawntung ding a Vanglian Topa Pasian in, “Kei pen na khempeuh’ a Kipatna leh a Tawpna ka hi hi,” a ci hi. (Mang.1:8)
182. I kiniamkhiat theih nadingin: Pasian in ama hoihsak hun ciangin note hong laptoh theih nadingin a thahat Pasian’ khutnuai-ah kiniamkhiatin na om un. (1 Pet. 5:6)
183. I kisialhna amah bek ahihna i theih nading: Ahi zongin keimah in ahih leh, singlamteh tungah i Topa Jesuh a sihna thu bek ka kisialhpih ding hi. (Gal.6:14a)
184. I lungkhamnate hong dawn dingin: Pasian in note hong kem ahih manin na lungkhamnate khempeuh uh ama kiang tunpih un. (1 Pet. 5:7)
185. I lungtang hong puahphasak hi: Note sungah lungtang thak leh lungsim thak kong guan ding a, na suang lungtang uh hong lakkhiatsakin mihing lungtang kong guan ding hi. (Eze. 36:26)
186. I tuak ding ni adingin i kigin den nading: Na khempeuh a bei nading hun hong naita hi. Nomau pumpi ki-uktawm thei-in pilvang unla, hoihtakin thu a ngen thei-in om ta un. (1 Pet. 4:7)
187. Jesuh’ thu i man nading: Pa Pasian in ama ngimnasa bangin note hong teel a, note in Jesuh Khrih’ thu mangin, ama sisan tawh sianthona a ngah dingin a Kha Siangtho tawh note mi siangtho in a hong bawl hi. Note tungah hehpihna leh nopsakna thupha hong tam tun semsem ta hen. (1 Pet. 1:2).
188. Kha Siangtho i ngah nadingin: Tua ahih manin thuman hong lak ding Kha Siangtho hong tunciangin thu khempeuh amanin hong hilh ding hi. (Johan 16:13)
189. Kha Siangtho letsong i ngah nading: Mi khempeuh adingin phattuamna a om theih nadingin Kha Siangtho’ hong ompihna a nam tuamtuamin hong kilang hi. Kha Siangtho in mi khat tungah thuthuk pilna hong guan a, tua Kha Siangtho mah in adang khat tungah thugen siamna hong guan hi. Adang khat tungah upna hong guan a, adang khat tungah cina damsak theihna hong guan hi. Adang khat tungah na lamdang bawl theihna, adang khat tungah Pasian’ thu hilh ding siamna, adang khat tungah Kha Siangtho piak siamna ahi leh ahi lo khentheih nading siamna, adang khat tungah pau lamdang pau theihna, adang khat tungah tua pau lamdang tuamtuam paunate a khiatna gentheihna hong pai hi. Hih siamna a tuamtuamte hong pia pen Kha Siangtho a kibang khat bek mah hi a, mi a tuamtuamte tungah ama hoihsak bangin a hong piak ahi hi. (1 Kor. 12:7-11)
190. Kha Siangtho tawh i kidim nading: Zu in mi siasak thei ahih manin zu ne kei unla, Kha Siangtho tawh a kidimin omzaw un. (Efe. 5:18)
191. Kha Siangtho teenna i hihna hong theisak dingin: Na pumpi uh, Pasian in a hong piak, note’ sungah a teng Kha Siangtho’ biakinn ahih lamtak thei lo na hi uh hiam? Note’ pumpi, nomau’ neihsa hi lo a, Pasian a’ ahi hi. (1 Kor. 6:19)
192. Khrih’ pilna ngah nading: Ahi zongin Pasian in a hong sap ei Jew mite le Gentail mite adingin Khrih pen Pasian’ vangliatna leh Pasian’ pilna ahi hi (1 Kor. 1:24). Ahi zongin Pasian in Jesuh Khrih hangin note tungah nuntakna hong pia a, tua Jesuh Khrih pen eite’ pilna, Pasian tawh i kipawl theihna, Pasian’ mi siangtho suakin, hotkhiatna i ngah theihna ahi hi. (1 Kor. 1:30)
193. Khuavak le lamlakpa ahihna hong lak dingin: “… Kei pen leitung khuavak ka hi hi. Kei hong zuite in khuavak nuntakna nei ding uh a, khuamial gamtatna nei lo ding uh hi,” a ci hi. (Jn. 8:12)
194. Kideidanna om nawnloh nading: Tua ahih manin Jew mi leh Gentail mi, sila le sila ahi lo, numei le pasal cih bangin kideidanna om nawn lo a, note khempeuh Khrih tawh na kipawlna hangun pawlkhat hi-in, a kibangkim na hi uh hi. (Gal. 3:28)
195. Hinkiksakna ngahte ihihna theih nading: Banghang hiam cih leh Adam tawh a kizop manin mi khempeuh si a, tua mah bangin Khrih tawh a kizom khempeuh zong kihingkiksak ding hi. (1 Kor. 15:22)
196. Kilawmtatna neih nading: Nasemte in a tote’ nasepna bangmah thei lo ahih manin note pen nasemte ka hong ci nawn kei ding hi. Ka Pa’ tung panin ka zak thu khempeuh note kiangah hong genkhin kahih manin note, lawm, ka hong cizaw ding hi. (Johan 15:15)
197. Kilemna hong bawlsak pa ahihna hong lak dingin: … Pasian in mite’ mawhnate ngaihsun nawn lo in, Khrih hangin leitung mi khempeuh le amah a kilemin hong bawl a, tua kilemna thu a gen dingin kote hong seh hi. (2 Kor.5:19)
198. Kipatna le a tawpna ahihna hong lak dingin: “Lau kei in; kei pen a kipatna le a tawpna ka hi a, a nungta mipa zong ka hi hi.” (Mang. 1:17)
199. Kithumanna neih theih nading: A kuamah peuh in hong ukte’ thu na mang ciat un. (Rom. 13:1a; Titus 3:1-2)
200. Kumpi ahihna hong theisak dingin: “Pasian in Topa’ tangin a hong pai kumpipa, thupha pia tahen. Vantungah nopna om hen la, Pasian’ min thang ta hen,” ci-in a awng uh hi. (Lk. 19:38)
201. Lametna i neih nading: Tua hi a, amah a beel eite in eite mai-ah hong kikoih lametna thu kiptakin i letcip nadingin i tha hong nuamsak hi. (Heb. 6:18b; 1 Pet.1: 3-4)
202. Lampi thak hong honsak dingin: Ama pumpi mahmah ahi dalna puan tawnin nuntakna lampi-ah i pai theih nadingin amah in lampi thak hong honsak hi. (Heb. 10:20)
203. Lungsim khuavak i ngah nading: Khuamial sung panin khuavak taang hen, a ci Pasian mah in Jesuh maitang a taangsak Pasian vangliatna thu theih nading khuavak ka ngah theih nadingun kote lungsim sungah khuavak hong taangsak hi. (2 Kor. 4:6)
204. Mawhmaina i ngah nading: A mawhna a khialhna uh ah amaute ka hehpih ding a, tua bangte phawkin ka nei nawn kei ding hi, na ci hi. (Heb.8:12)
205. Mawhna pan hong honkhia dingin: Amah in tapa khat hong nei ding a, tua tapa in ama mite a mawhna uh panin honkhia ding ahih manin ama min dingin Jesuh na phuak ding hi, ci-in thu a gen hi. (Matt. 1:21)
206. Mi gina i hih theih nading: Pasian in note hong itin, hong teelin, ama mi siangthote hikhin na hih manun note pen hehpihna nei-in, migi-in, kiniamkhiatin, dikin, na lungduai ding uh hi. (Kol. 3:12; 1 Tim. 6:11)
207. Mi siangtho i hih nading: Ama mai-ah eite pen paubaanna a nei lo, mi siangthote ahi ding le Khrih hangin ama mite ahi dingin leitung a pianma pek nangawnin Pasian in a hong teelsa ih hi. (Efe. 1:4; Kol. 3:12)
208. Mi tampi tanin a si dingin: Mihing Tapa zong nasem nei dingin hong pai hi loin mi dangte ading na semin, mi tampi tat nading a si dingin a hong pai ahih mah bangin note zong a tuaci ding na hi uh hi, a ci hi. (Matt. 20:28)
209. Mithak nam pawl ihihna hong lak dingin: Vun ki-atna leh ki-at lohna a thupi om tuan lo a, mi thak nam pawl hih ding bek a thupi ahi hi. (Gal. 6:15)
210. Na hoih/gamtat hoih i neih nading: Eite a hong bawlpa pen Pasian hi a, Jesuh Khrih tawh i kipawl ciangin i nuntakna-ah gamtat hoih a nei dingin a hong bawl ihi hi. Hih pen eite’ omzia dingin a na ngaihsut kholhsa ahi hi. (Efe. 2:10)
211. Na khempeuh in amah lamet nading: Pasian’ bawlsa khempeuh in Pasian’ tate a hong kilahkhiat hun ding lawp mahmahin a ngak uh hi. (Rom. 8:19)
212. Na khempeuhte’ lutang ahihna hong lak dingin: Pasian in Khrih’ khenuai-ah na khempeuh koih a, thu khempeuhah pawlpi’ lutang dingin Khrih a bawl hi. (Efe. 1:22)
213. Na sem den Pasian ahihna hong lak dingin: “…Ka Pa in tuni dongin na sem tawntung ahih manin kei zong ka sep ding mah ahi hi.” (Jn. 5:17)
214. Nasep hanciam mi i hih nading: Thadah kei unla, nakpitakin na sem un. Lawp mahmahna lungsim tawh Topa’ na sem un. (Rom.12:11)
215. Nuntakna an le tui hong pia dingin: Tua ciangin Jesuh in, “Kei pen nuntakna an ka hi hi. Ka kiangah hong paite gilkial ngei nawn lo ding a, kei hong umte dangtak ngei nawn lo ding hi.” (Jn. 6:35)
216. Nuntakna hong pia dingin: I mawhna hangin kha thu tawh kisai-in misi ihih laitakin Khrih tawh eite hong nungtasak hi. (Efe. 2:5)
217. Nuntakna kicing neih nading: Khrih tawh na kipawlna hangun nuntakna kicing na nei uh hi. (Kol. 2:10a)
218. Nuntakna lukhu i ngah nading: Na sih dongun kei tungah hong citak un. Tua hileh nuntakna lukhu ka hong pia ding hi. (Mang. 2:10)
219. Nuntakna singgah i nek theih nading: A gualzo mite tungah, Pasian’ Huan sunga om nuntakna singgahte a nek theih na dingun thu ka pia ding hi. (Mang. 2:7b)
220. Nuntakna tui pia dingin: “..ahi zongin keima piak ding tui a dawn khempeuh dangtak kik nawn lo ding uh hi. Tua ka piak tui a dawnte sungah nuntakna tuinak piang ding a, a nungtasak paisuak ding hi,” a ci hi. (Jn. 4:14)
221. Pa in eite mun hong tuahsak khitna i theih nading: Amah in khuamial vangliatna panin eite hong honkhiain, a lung muanhuaina mun, a it a Tapa’ ukna sungah hong koih a, tua a Tapa in eite hong khahkhia a, i mawhna hong kimaisak khinta hi. (Kol. 1:13)
222. Pasian deihna i theih nading: “…Lungdam tawntungin, thu ngen niloh unla, bangbang hong piang taleh na lungdamna uh Pasian tungah ko tawntung un. Khrih Jesuh tawh kipawlin na nuntakna sung uhah hih bangzia-in na om ding uh Pasian in a hong deih ahi hi.” (1 Thess. 5:14-18)
223. Pasian’ thuman hong hilh dingin: Tua ciangin Pilat in, “Tua ahihleh nang kumpi hi lo na hi hiam?” a cih leh Jesuh in, “Kumpi hi, nangmah in na hong ci hi. Hih thuman a genkhia dingin mi hong suakin leitungah a hong pai ka hi hi. Hih thuman tawh a kizom mi peuhmah in keima thugen hong zui uh hi,” a cih ciangin Pilat in, “Thuman na cih bang ahi hiam?” ci-in a dong hi. (Jn. 18:37,38)
224. Pasian kepna i ngah den nading: Leitung panin amaute na lakkhiat ding a hong ngetsak ka hi kei a, a Gilopa’ bawlsiat nading panin na kep ding a hong ngen ka hi hi (Jn. 17:15).
225. Pasian minthan nading: Midangte in gamtatna hoihte uh a muh ciangin vantungah a om, na Pa uh min a phat theih nadingun mite mai-ah na gamtat hoihna uh khuavak bangin na kilangsak un (Matt. 5:16). Ahi zongin Jesuh in tua thu a zak ciangin, “Hih natna pen sihna ding natna hi lo a, Pasian’ Tapa in Pasian’ pianzia a neihna mite in a theih nading, leh Pasian a phattheih nadingin a na ahi hi,” a ci hi. (Jn. 11:4)
226. Pasian om takpina teci i theih nading: Inn khempeuh a lam na om ciat sam a, ahi zongin na khempeuh a piangsak pa pen Pasian ahi hi. (Heb. 3:4)
227. Pasian’ itna i theih semsem nading: Pasian pen ki-itna ahih manin itna a neilo mite in Pasian thei lo uh hi. (1 Jn. 4:8; Jn. 3:16; I Jn. 4:10-11, 16)
228. Pasian’ pianziate i neih nadingin: Amah in piak dingin a hong ciam a manpha mahmah nate hih bangzia-in hong pia a, hih ama hong piak nate hangin leitungah a om siatna a piangsak thei duhluatna le deihluatnate panin na suakta uh a, Pasian’ pianziate na nei uh hi. (2 Pet. 1:4)
229. Pasian’ thusim hong lakkhia dingin: Pasian in mi khempeuh adingin a koihcing hih a thupi a deihhuai a thusim pen ama mite tungah pholak ding a sawm ahi hi. Tua thusim in: Khrih tawh a kipawlte in Pasian tawh minthanna ngah khawm ding hi, cihna ah hi. (Kol. 1:27)
230. Piangsakpa ahihna hong lak dingin: …eite adingin Pasian khat bek, Pa khat bek a om hi. Ama adingin i nuntakna pa, na khempeuh a piangsak pa ahi hi. Eite tungah nuntakna a hong pia, na khempeuh a piangsak Topa Jesuh Khrih khat bek a om hi. (1 Kor.8:6)
231. Pumkhat i suak theih nading: Pa aw, amaute khempeuh pumkhat a suah theih nadingun ka hong ngetsak hi. Nangmah in kei na hong sawlna thu leitung mite in a uptheih nadingun ei tegel pawlkhat ihih mah bangin amaute zong eite tawh pawl khat hong hi tahen. Nang leh kei pumphat ihih mah bangin amaute zong pumkhat a suah theih nadingun keima tungah na hong piak pianzia mah amaute tungah ka pia hi. (Jn. 17:21-22)
232. Sang pen Pasian’ Tapa ahihna i theih nading: Simon Peter in, “Nang pen a nungta Pasian’ Tapa, Khrih na hi hi,” ci-in a dawng hi. (Matt. 16:16; Mk. 5:7)
233. Satan i do zawh nading: Note pilvangin khua phawk un. Na gal uh ahi Dawimangpa, humpinelkai bangin a nek theih ding zongin vak kawikawi hi. Leitungah thu um dang khempeuh in zong note’ thuak mah bangin a thuak ahihna thu thei unla, na upna uhah kipin Dawimangpa na nial un. (1 Pet. 5:8-9; Efe. 6:10-18)
234. Siampizaa i ngah nading: Tua ahih ciangin sanggamte aw, Jesuh hong sihna hangin Siangtho Pen Munah ut utin lut theih nading thu i neita hi. Ama pumpi mahmah ahi dalna puan tawnin nuntakna lampi-ah i pai theih nadingin amahin lampi thak hong honsak hi. (Heb. 10:19, 20)
235. Sihna gam gualzo pa ahihna hong theisak dingin: “Kei ka si ngei hi. Ahi zongin tu-in hong en in, a nungta tawntung ka hi hi. Sihna le misite omna gam keima khutnuai ahi uh hi.” (Mang. 1:18)
236. Suahtakna i ngah nading: Khrih in eite hong khahkhiat khitna hangin mi suaktate hi khinta ihih manin tua suahtakna thu-ah kipin om unla, sila va suakkik nawn kei un. (Gal. 5:1)
237. Tapa cil ahihna hong lak dingin: Khrih pen a kimu thei lo Pasian’ lim hi a, a kipiangsak khempeuh lakah tapa upa pen ahi hi. (Kol. 1:15)
238. Tapa za hong ngahsak pa ahihna hong lak ding: Tua bang hitaseleh ama thu ngai-in amah a um mite khempeuh tungah Pasian’ tate suah theih nading thu a pia hi. (Jn. 1: 12; Efe. 2:19)
239. Tawntung inn neite ihihna i theih nading: … mihingte bawl ahi lo, Pasian in a kip tawntung dingin kote adingin a hong bawlsak inn, vantungah a nei ka hihna uh ka thei uh hi. (2 Kor. 5:1)
240. Thawhkikna le nuntakna ahihna hong theisak dingin: Tua ciangin Jesuh in, “Keimah in a sisa mite thosakin a hingsak thei pa ka hi hi. Kei hong um mi peuhmah a sih hangin nungta ding hi.” (Jn. 11:25)
241. Theihsiamna tawh piaksiam nadingin: Man piak kul loin hih vangliatna na ngah uh bangin hih vangliatna na zatna uhah zong man va ngen kei un. (Matt. 10:8)
242. Thu ngaihsutna ah khangham nading: Sanggamte aw, na thu ngaihsutnate uh ah naupang bang kei un. Gitlohna lamah naupang bang unla, ahi zongin thu ngaihsutna-ah a khangham hita un. (1 Kor. 14:20)
243. Thukhen ding pa amah bek ahihna theih nading: Topa hong pai ciangin a tawpna thukhenna hong om ding a, amah in thu simte hong pholakin, mihingte in a lungsim sung uhah a ipcip uh thute hong telkheh ding hi. Tua ciangin mi khempeuh in amau’ ngah dingin a kilawm phatna, Pasian’ kiang panin a ngah ciat ding uh hi. (1 Kor. 4:5b)
244. Topa ahihna hong lak dingin: Jesuh Khrih in Topa ahi hi, ci-in taangko-in Pa Pasian a min thangsak ding uh hi. (Fil. 2:11)
245. Vangliatna hong pia dingin: A gualzo, a tawp dongin keima deihna bangin a gamta zo mite tungah, keimah in ka Pa tung panin ka ngah vangliatnate mah ka pia ding hi. Minam dangte tungah ukna a neih nading uh aana ka pia ding a, leibeel satkhap bangin sik ciangkhut tawh minam dangte satgawp ding uh hi (Mang, 2:26-27). Ahi zongin Topa in kei kiangah, “Na tha a nem ciangin keima vangliatna hat mahmah ahih manin nangma ki sapna pen keima hehpihna hi bek hi,” ci-in hong dawng hi. (2 Kor. 12:9a)
246. Ze-etna pan hong huh dingin: Ama pumpi mahmah in ze-etna leh gimna thuak ahih manin tuhun ciangin tua bang a thuakte a hong huh thei hi. (Heb. 2:18)
Jesuh Khrih leitungah hong paina pen a bucing in gen ding hileng, “eite ii na khempeuh ading,” cileng kikhial lo ding hi. Mi bangin hong suakin ama lungdamna thu hong taangko ding, na lamdangte hong bawl ding, sihna thuak ding, sihna pan thokik ding, vangliatna tawh vantungah kahto kik ding, amah umin a nung a zuite tungah ama nasep mabaan zomsak ding, Kha Siangtho ngahsak ding, thu-ummite thu-upna sungah zungthukkha semsem in Khrih’ picinna dongah kalsuan zawh nading cih teng huamkim hi. Tua bek tham lo, i kha nuntakna ading bek tham loin i leitung nuntakna dongah, a pualam thu bek tham loin i sunglam thu dongah, i khepeek panin i luzaang tung dongah, i hihna khempeuh adingin Jesuh Khrih hong pai ahi hi.
Laibu Saal /Zomi eLibrary
www.zomielibrary.com
