BANGHANG IN JUDAS ISCARIOT IN ZEISU LEHHEEK HIAM?
(Good Friday message tom)
Agelh ~ Jeffrey Pau Do Lian
Judas Iscariot pen Zeisu mahmah in atel nungzui 12 telak ah khat ahi hi. Amahpen Simon Isacriot tapa pawlpi sumkem ahi hi. Laisiangtho sungah teltak genkei mahleh sumkem ahihman in sum iplah khat hiding in mipilten’ ngaihsun hi ahang pen sum ippitawh puaden kici hi. Judas Iscariot in Zeisu “Rabbi” sia cihbek in sam a, “Topa” cihkammal zang ngeilo hi. Zeisu pen Messiah hilo cih upna nei hikha ding hi. Amah pen sumzong neisim pian a sumduh ahih lam pen Mary in Zeisu’ paknam tui azuut ciang, hih atamman paknam tui denari300 pen, zuak zawleng’ naci ngei hi.
Amin, Judas Iscariot cihpen Semitic kammal pan “sqr” hiding in ki-ummawh a akhiatna, “to lie” zuaukhem cihna hi. Bektham lo in amah pen Judas member/nam kipawlna “dagger wielders” kici migilo kipawlna ah a om khat ahi hi. Judas pen Rom ukpite in Judea dong a-uk alangpang mipawl khat tawh kipawl ahi hi. Judas pen a piangthak man in Zeisu nung azui hi lo ahih lam kimuh theih na om hi. Ahizongin Judas in banghang a Zeisu zui hiam cih lunglut huai hi. Amah pen Rom ukpite langpang ahih man in Zeisu in superpower nei ahihlam thei gige a tua tetawh Rom tezo ding cih lam etna nei ahi hi. Zeisu in nalam dang tampi abawl mu ahih man in tua nalamdang te tawh Rom zodingin tuaciang Zeisu tawh Rom leh Judea gamte ukding ngimna nei na higige hi. Judas pen pawlpi sumkem tebangin sumlen denkhat zong ahi hi.
Zeisu in cidamsak na, mitaw, khelbai etc damsak theihna vang (power) nei ahihteh Pilate leh Herod tekiangah silver 30 tawh heekpak leng kenlah silver 30 ngah dingin Zeisu lah hongsuakta khia veve ding cih ngaihsun na nei hi. Tua hi a, Peter te inn ah nitak anne ding a om ahihlam uh galkap mangte kiangah thu atung tak teh Zeisu thu situh a, athu (case) liansemsem in singlamteh tungah thahding ciang hongtun teh Judas kisik lua mahmah in tua a silver 30 te biakinn ah paikhia in amah leh amah kigui awk hi. (Matthew 27:5) Tua silver 30 apiak kik zenzen pen ama upmawh in Zeisu hongthahsak kei kik khak uhleh acihi phial mah leh ziakai luata hi. Zeisu alehheek lam kisik mahmah taleh Zeisu in Topa hi ci a kisik in Pasian kiangah akam genna khatzong kimu lo hi.
Bangzah ta in Judas adingin lungkham huai hiam? Laisiangtho in, Mark 14:21 “A kigelhsa mah bangin Mihing Tapa ahihleh si ding a, ahi zongin a lehhek pa’ thuakna nasia mahmah ding hi. Tua mipa a piang ngei hetlo hileh ama adingin hoihzaw tham ding hi” a ci hi. Manglai in “lehhek” betray kici a, akhiatna diktak pen, ‘piakhia’ deliver cih hizaw hi. Cih nopna ah Judas in Zeisu pen Jewish migilo makaite kiangah pia khia hicihna ahi hi. Judas in akisik nading hun omna pi in akisik loh pen adah huai penpen ahi hi.
Judas Iscariot tungpan bangsin na ihngah hiam? Sum, thuneih nopna, leh lungkhauhna kimu hi. Sumdeih lua ahihna pen Laisiangtho ah kilang mahmah hi. Thuneihnop na nei hi. Zeisu in Romte khutsungpan in Israel mite honghon khia dingin tua hileh keitawh ukkhawm dingcih lam etna nei hi. Zeisu in Rom te (taksatawh) zolo in thatding honghih takciang alam etna khempeuh guaksuak in lam etbei in om hi. Bek thamlo Zeisu sih na hangin aman phattuam nangah khalo hi. Banghang hiamcih leh piangthak lo hi. Toni Good Friday Pasian in Tuuno kigo ding tawntungpan ageelsa himah leh Judas Iscariot ihih lohding thupi mahmah hi cih tawh tuazah kihan thawn hi ni.
