Bang sep dingin hoih hiam? What is the right thing to do?
Agelh~ Khansuan T. Guite
[Michael Sandel Lecture at Harvard Univeristy pan lak khiat]
Scenario One
Thu khatna:
Nang pen meileng hawl khat nahi hi. Tua meileng pen nai (1) in tai (100) val a kihawl ahi hi. Na pai-na ding meileng lampi tungah nasem mi (5) na om a, tua meileng pen a brake kisia ahih manin hawl suak le cin tua nasem mi (5) teng taih lum khin ding cih na thei hi. Tua laitak in na khua dak leh na tak lam pang ah meileng lampi khat na om a, tua lam ah na sem mi (1) om hi. Tua meileng pen a brake a hoihloh hangin a hawlna (steeling wheel) hoih in na hei thei hi. Meileng pen na tak lam ah hei khia in na sem mi (1) gawi lum in mi dang (5) te hon khia zaw ding maw? Bang pen sep huai zaw hiam? Koi pen na sem zaw ding a? (Hih mun ah mi (5) te nuntakna hot khiat ding mi a tam zaw in hoih sa hi)
Thu nihna:
Thu nihna ah, nang pen meileng hawl na hi nawn kei hi. Meileng pen meileng lampi tungah hong pai in, nang in lei (bridge) tungah ding in meileng tai lai a en nahi hi. Meileng tai-na ding lampi ah na sem mi (5) om, tua meileng pen tai suak leh, a brake hoihlo ahih manin nasem mi (5) te phu kha in gawilum ding cih na mu hi. Nang pen a hawl nahih loh hangin na ci mawh mahmah hi. Tualaitak in na dinna lei tung na kiang ah mi thau mahmah khat a ding na mu hi. Tua mi thau pa pen tawm khat sawn le ci’n lei tung pan in kia ding a, meileng lampi tusuk in meileng khawl ding cih na thei a, na sem mi (5) te nuntakna hon khia zo ding cih zong na thei hi. Bang pen sep huai hiam? Nang hi le cin tua mi thau pa meileng gawi lup dingin lei tung pan sawn khia in na sem mi (5) te na hon khia ding hiam?
(Hih mun ah mi thau pa sawn khiat ding a tam zaw in hoih sa lo hi. Thu khat na ah mi (5) te nuntakna hot khiat ding hoih na sa mai thei a, ahi zongin thu nihna ah mi thau pa lei tung pan sawn khia in a nuntakna sup ding man na sa kei mai thei hi.)
Hih thu nihte etna leh teh kakna tung pan-in mi khat i nuntakna sup thuak in, mi a tam zaw nuntakna hot khiat ding hoih sak zawkna pen koi ci dan suak ta hiam?
Scenario Two
Thu khatna
Nang pen Emergency Room a na sem Siavuan (Doctor) khat nahi hi. Nang sep hun lai takin cina mi (6) emergency room ah honglut uhhi. A maute pen Meileng kibut na hangin liamna na sia mahmah nei uhhi. Tua sung pan in mi (5) pen natna a dam om zaw deuh a, mi (1) pen nak na siat mahmah hi. Tua a nasia mahmah mi (1) na bawl sungin a dang mi (5) teng pen na si man ding uh hi. Tua a midang (5) teng va bawl le cin lah tua a nasia mahmah mi (1) pen na si man ding hi. (Siavuan khat hih na tawh, mi (5) bawl masa zaw ding maw, a na sia mahmah mi (1) bawl zaw ding? – Mi a tamzaw in a gim mahmah mi (1) sangin mi (5) te bawl masak ding hoih sa zaw)
Thu nihna:
Tu’n nang pen Transplant Siavuan khat nahi hi. Na ci na mite sungah mi (5) pen a cidam na dingun a pum tung nate khek kul uh hi. Khat pen a lungtang, khat pen a tuap, khat pen a kal, khat pen a sin, khat pen a la khek sak ki sam uhhi. Tua lai tak in pumpi nate a piakhia (donor) ding mi na nei kei a, a maute’ sih en ding bek na hi ta hi. Tualaitak in a ci dam mi khat siavuan kilak mawkmawk dingin hong pai hi. A ma ih mut kal in a tunga pumpi na kisamte a ma tung pan la khia in, tua ci na mi (5) teng pia le cin, mi (5) teng hon khia in, a ci dam kim lai mi khat a si ding ahi hi. (Mi bang zah in tua a ci dam mi khat sih suah in a cina mi (5) teng hon khia zaw ding maw? – Mi a tam zaw in a ci dam kim lai nuntakna khoih sak sangin a ci na mi (5) teng awlmawh lo zaw hi.)
Mi pawlkhat’ sia leh pha theihna thu guipi (moral principles) leh a hoih pen ding nasep na khensatna pen na sepna leh bawlna pan a piang thu a hoih leh nasep hoih, a siat leh nasep sia ci-in koih uh hi. A tawpna ah mi (1) a sih hangin a dang mi (5) nung ta peuh leh nasep hoih in kisang hi.
Hih sia leh pha theihna thuguipi nam pen a piangthu tung pan etna tawh thu hoih leh hoihlo khensat mite (Consequentialist) te’ san dan ahi hi. Nasepna pan a gah a hoih nak leh sia leh pha theihna tawh a hoih lam a lakna i cih pen nasepna gah a hoih leh gamtat hoih in kituat hi.
Ahi zongin mi pawlkhat in nasep gah ahoihman a, gamtat hoihna a san pen hamsa sa uhhi. A tunga meileng tawh mi khat gawi lum in mi (5) hon khiat ding, zato a mi khat si sak dingin mi (5) nuntak sak ding, – khialhna neilo mi khat that in midang (5) hot khiat ding pen a kigualh dan (categorically) in khial limlim hi ci uhhi. Tua bang thu ngaihsun mite pen Categorical Moral Reasoning ci’n ki gen a, nasepna khat peuh ah a gah hoih leh hoihlo tawh kisai lo in, nasepna ah gamtat hoih leh gamtat hoihlo tawh en zaw hi.
Hih gamtat hoih, sia le pha theihna man hi cih khensatna ding thu, ngaihsut pi mipil sung pan in na sepna gah tawh en in a pha a sia cih khensatna pen Utilitarianism thu ngaihsutna a gel khia pen Jeremy Bentham, kum zalom 18 sunga Mangkang thungaih sun pi khat ahi hi.
