BANG IN HONG KHAK A HIA?
Agelh ~ Khoi Lam Thang
Tangval cil nungak cilte ki-itna pen lawpna leh lunggulhna in makaih in, sialepha ngaihsutkakna in nungzuih hiathiat hi. Tua bang hun pen "nawi lunghan hun" kici hi. Tawl khat kikholh holimna bek tawh kiten ding ciang kikhensat ngam tanghial hi. A nungsang ciang hong piang ding haksatnate batlak sawm selo hi. Nungakte ciahpih ngam na lung sim, tangvalte zuih ngamna lung sim piang hi.
Tua cilesa lunggulhna in khangnote zawhthawh thu tawh hong uk khak ciangin "Bangin hong khak a hia?" cih ding baihlam mahmah hi. "Nong it takpi leh...." cih kammal tawh thangsiah in suahtakna kizangkhial thei hi. Utna hat lua leh khensatna man thei lo hi. Khangmoi lai-te in lawmngaihthu ah nih vei thum vei ngaihsun kikkik leh khiallo zaw hi. Khensat buatbuat kei in. Dot theih upate, pastorte kikuppih in.
Tua banah khangmoi lua zi neih pasal neih zong a nungsang ciangin haksatna tuak thei zaw hamtang uh hi. Pilna hauhna zon theih na ding hun manpha teng innkuan vai-ah bei ahih manin a nungsang ciangin buaina tuamtuam kitalsik thei hi.
I picin semsem ciangin sialepha ngaihsutna hat deuhdeuh hi. Lawm vai bang deuhdeuh kikhensat ngam lo semsem hi. Tua manin kum 40 gual nungak tangval kitaipih cih khawng kiza ngei khol lo hi? Sialepha ngaihsutna thahat in, lawpna le lunggulhna a thanem hun tungta hi. Sialepha khentel theihna in makaih in, lawpna le lunggulhna in nung zui hiathiat hi. Zi neih pasal neih ding khawng kin ngaihsut khollo a, a ngaihsut khaksun ciang nangawn in bangci nuntak ding, bang ne ding … cih teng tawh dinkhawl kik zel hi. "Nungakpite" leh "tangvalkhaatte" in KHENSAT NGAMLOH BUAINA lel pen uh hi. Kumtamsa na hih leh khensat ngam lel in.
Na it ma in teel masa in.
Na teel khit ciang it inla,
Na it khit ciang teel nawn ke' n.
(Rev. Job Thawngno)
Source:
SIHNA IN HONG KHEN MA TENG (Laibu)
Agelh: Khoi Lam Thang
Laigelh siapa in Laibu Saal / Zomi eLibrary ading in phalna ahong piak ahi hi.
cinpuzomi@gmail.com
