Australia Vangleng Galkap Chaplain/Pastor - Fight Lieutenant Rev Dr Suan Muan Thang.
Mangpau in Chaplain pen Zo Pau in Kha Lam makai/thudot cih ahi hi. Gam khangto masa UK, Europe, Australia, NewZealand, USA, Canada ten Galkap sung leh Parliament zum tuamtuam ah kha lam/biakna lam thu dot/makai na nei ciat uh hi. Biakna kipawlna lianpi (denomination) te representative ding a Kumpi sap ahi hi. Chaplain/Pastor te pen Panmun (Rank), khasum leh a kisam dangte zong Panmun (Rank) tungtawn in pia hi. Chaplain ten thautawi in galkap lo hi. Siampi nasep, lamlak leh lai hilh sem hi.
Dr Suan Muan Thang pen Tonzang huam Luangel khua suak Rev. Dai Za Kap leh Nu Tual Za Cing sung pan tapa masa pen a hihi. Pianpih u nau 11 lak ah nga bek dam lai sungpan a upa pen hi. A pianna Nu Tual Za Cing in 2001 in Manila ah Doctorate a sin laitak in nusia hi. A pa Rev Dai Za Kap leh Nu Mang Ngaih Lian tungtawn in sanggam 3 Pasian in piak beh hi. Australia ah a sanggam 2, USA tangval 1 leh Kawlgam ah 4 om uh hi. Dr Muan Thang leh a zi Soney in tanu 3 nei uh hi.
Biakna lam ah Master leh Doctorate pen Philippines ah sin hi. Leitung pilna lam ah Master of Social Work leh Ph.D in psychology and counseling sin leuleu hi.
Kum tampi Makaihna lam, Lungsim ngaihsutna, Kha lam cidamna tawh ki sai research leh clinical a sep kawm in pawlpi ah sem hi. Kumpi kipawlna zum tuamtuam, NGOs, University, Pawlpi tuamtuam leh gam tuamtuam ah lai hilhna nei zelzel hi.
Kum 2016 in Federal Advisory Board in Australia Baptist pawlpi leh Protestant Churches pawlpi sungpan a ding Australia kumpi tungah Chaplain Nominate pia hi.
Kum 2017 February teh Protestant Churches Chaplaincy Board in interview bawlna ah teel cing hi.
Kum 2017 May kha sung in Australian Federal Religious Advisory Committee in interview a bawl khit ciang Australian Federal Religious Advisory board in san na nei uh hi.
Kum 2017 October 31 kha in Australian Defense Force Officer Selection Board in interview a neih khit ciang in Australian Defense Force in Chaplain ding in saang hi.
Kum 2018 February kha 23 zingsan nai 9 in Australia Vangleng Galkap sungah Chaplain ding in Laisiangtho tawi in ki ciam na a bawl khit ciangin kipsak uh hi. Tua hun thupi bawlna sungah a ma pianpih sanggamnu Dim Sian Kim leh apasal Pum Sian Mang, Siama Ning Lung Cing, Pa Mungpi, Pa Pau Mang, Nu Man Lawh, Rev. Pau, Nu Huai leh Pa Thangpi ki hel thei uh hi.
Tua kipsakna laipi ah Panmun ding pen :
Offer of Appointment-Direct Entry-Chaplain - Mr SuanMuanThang
Nasep Hun - Permanent Air Force ( Ut tan sep theih hi. Ahih hang in a tawm pen kum nih sep kul hi. Kum khat khit ciang a tawp leh zong a sih dong in volunteer advisor member hi ding hi).
Specialization - Chaplain- Khalam thudot/Makai
Rank (Zaa) - Flight Lieutenant (FLTLT)
Kipat hun - February 23, 2018
Responsibilities (Sep ding tavuan)
• Galkap mangte lamlak ding, galkap sungah kha lam ah makai ding
• Biakna, Gamthu leh Ngeina lam ah ki sam bang in thuhilhna leh lai hilhna pia ding
• Sihna , natna leh haksak hun ah tha pia ding
• Gamtatna leh ki thu tuakna lam ah thu hilh ding
• A hun zui in kha lam leh lungsim lam ah ki sam bangbang ah galkapte makaih/panpih thei ding.
• Lungsim, Kha, Pumpi ki sap zui in Galpate lamlak ding
Australia Galkap sungah Kha lam thudot/makai fulltime a sem masa pen Father Ken Morrison ahi hi. Roman Catholic pawlpi pan hi a, September 5, 1939 in sep ki pan hi. August 31, 1940 in Presbyterian kipawlna pan in Rev Davidson sem hi. Galpi ven khit ciangin a kisap zui-in Kumpi ten chaplain/Pastor la toto uh hi.
