ATALIAH
Mithat leh Gam sung toknawi a minthang numei
2Kumpi 8:26,11; 2 Khang22;23:13-21,24:7
Agelh ~ Rev. Dr John Thang Hum leh
Dim Lun Zam
Ataliah min pen “Pasian in lak khiatsak” (or) “Jehovah Pasian’ gim piak nu” cih na hi. Israel Kumpi Omri’ tu, kumpi gilo Ahab leh azi Jezebel tanu hi in Judah kumpi Jehoram tawh kiteng hi. Hihte innkuan tangthu sang a, apoizaw mihing tangthu ah omlo ding hi. Hih numei in gitlohna innkuan sungpan hong piang ahih mah bangin gitlohna mah luah suk hi.
Israel gampen khen nih suak a, saklam gam Israel kici in khanglam gam, Judah kici hi. Ataliah pen saklam Israel gam kumpi Ahab leh a gilo Jezabel te tanu ahi hi. Apu pen Omri hi a, hih Ataliah pianna pu ahi a, apa Ahab leh Jezabel te ahi zongin mi gina lo te ahi uh hi. (Jezabel thu mai ah hoih tak sim in). Tua ahih manin Ataliah in gitlohna, hazatna, gamh hoihlo, a pu leh, anu leh a pa tung pan luah suk hi.
Jehoram tawh ki ten na
Jehoram pen Jehoshaphat kumpi pa (Judah, khanglam gam kumpi) tapa 7 te lak ah a upen ahi hi. Hih hun sung saklam gam (Israel) kumpi leh Khanglam gam (Judah) kumpite kilemna bawl ding ahahkat hunsung ahih manin Jehoshaphat in a tapa Jehoram leh saklam kumpi’ tanu Ataliah ki tengsak hi. Jehoram kumpi in hong kahtoh ciangin a kumpi tokhom kipsak ding ngaihsutna in, a sanggam dang teng that khin hi. Jehoram in a sanggam teng a thahmangna ama’ lungsim pan hong piang hiam? Ahih kei leh apua lampan a holhthawh om a, a tua cih hiam? Hih pen ama’ sungpan hong piang hilo in azi Ataliah in a nungpan holhthawhna hang ahi hi. Ataliah in hibang lungsim sia anu leh apa (Ahab leh azi Jezebel) te tungpan a luahsuk ahi hi.
Jehoshaphat, Judah (Khanglam) kumpi pa in nainganzi luanzia a tuat khialhna om hi. Ama tokhom a kipsak pen Pasian hi napi in kumpi dang tawh kilem na ding pen ci leh sa ziatawh na hahkat kha hi. A tapa’zi ding kumpi hoihlo khat I tanu a va laksak pen khialhna lian mahmah khat ahi hi. Lai Siangtho in thu-umlo mite tawh ki bangin hakkol puakkhop lohding hong limgen mahmah hi (2 Kor 6:14). Pasian in ami Israel te kiangah milim biate aten pih loh ding gen hi (Pai 34:16; Thuhilhkik 7:3;Ezra 9:12).
Solomon in a kiim a om kumpi dangte maipha angah nop man in a tanu te uh azi dingin la a, azi te in milim biakna lamah kai ahih manin Pasian lungkim lo hi. Pasian in David tawh a kamciamna susia nuamlo ahih manin Solomon zong a kumpi tokhom ah kip sak a, a tapa hun ciangin a gam phelnih suak hi. Solomon in anung ciangin a gamtatna a kisik kikna zong gen hi.
Jezabel (Ataliah’ nu) in Pasian kamsang te bangzah mudah in that hiam? Hih Ahab leh azi Jezabel hangin mi tampi in sih lawh hi. Singkung gah hoih apian na ding zunghoih ding kisam a, hih Ahab leh azi pen ata leh a tute tungah gah hoihloh a pian na ding zung hoihlo na hi uh hi. Jehoram in Ataliah, a pianna zung a hoihlo, hazatna tawh midang te susia innsung pan a khangkhia khat zi-in aneih khak manin ama’ sanggam teng nangawn in sihlawh hi. Jehoram in kumgiat sung kumpi asep khit ciangin a dam theilo gilpi canser tawh si hi. Jehoram kumpi gam zong a kiim pan Arab mite leh Cushite leh Palestine te pai in aneihsa, kham leh ngun, azi leh atate khempeuh zong laksak mang hi. Atate lak ah aneu pen Ahaziah bek suakta hi.
Jehoram asih ciangin a tapa, Ahaziah in kumpi semto leuleu a, kumkhat bek sawt hi. Kumpi a sep in kum 22 pha hi. Ahaziah kumpi asep sungin anung pan in nakpheh khaukaih a, a nakai pen anu, Attaliah mah nahi hi. Ataliah in a gen bangbang Ahaziah in sem hi (2Khang 22:3). Ahaziah in saklam Israel kumpi Joram tawh ki pawl in galsim hi. Galsim na pan Joram hong liam a, a en dingin Ahaziah vapai hi. Tua apaina pan Jehu, Pasian in Ahab innkuan sung sumai ding asawl pa tawh ki tuak ahih manin Jehu in na that leuleu hi.
Ataliah sihna
Attaliah in a tapa sih atheih ciangin Judah kumpi innkuan khempeuh thahmang ding ngaihsun hi. Hih thu athei Jehosheba, kumpi Jehoram tanu in Aheziah tapa Joash na selsim hi. Joash pen biakinnpi sungah kum 6 sung kisel hi. Kum 7 na ciangin Jehoiada, siampi ukpa in Judah gam sungteng zin kawikawi in mite thuzawh in pawl kai a, “kumpi pa tapa Joash in Judah kumpi gam a-uk kul ding hi; Bang hang hiam cih leh Pasian in David tungah a akam ciamsa hi,” ci-in gen hi. Tua teng asep khit ciangin Joash kumpi ding sathau nilh a, Levi mite zong biakinn leh kongpi cing ding seh in, kumpipa a cing ding mi zong koih hi.
Tua teng aman khit ciangin siampi Jehoiada in kumpi pa Joash paikhiat pih in kumpi lukhu khu sak in kumpipa theih ding leh zuih ding kiciamna laizial zong pia hi. Mipi te in ‘kumpi pa cidam in khansau hen’ ci-a, a-ot ziahziah laitak in Ataliah vasuak phei hi. Mipi te in pengkul mut a, lungdam in a omna amuh ciangin, “Sawmsimna, sawmsimna” ci-in awng in a puante balkek ziahziah hi. Siampi pa in tua nu biakinn sungah a thahloh ding galkap te thupia hi (biakinn ninsak nuamlo hi). Tua nu man in a pualam ah a that uh hi (2 Kg 11:13-16; 2 Chr. 23:12-15). Siampipa in maban asep ding teng khat khit khat sem toto hi. Kumpi Joash in zong biakna, ki-uk na teng puahpha to mang hi. Attaliah a ki thahkhit ciangin khuapi sungah om mikhempeuh nak lungdam mahmah uh hi. Solomon in hih thu nagen hi. “Midik te thu neihna a khan ciangin khua sungah lungdamna om a, mi gilo te a kisuk siat ciangin lungdamna tawh kidim hi,” (Paunak 11:10). Attliah in akoih baal milim biakpiakna khempeuh zong susia mang hi. Jehoida in thukham sungah sep ding biakpiakna leh thupiak khempeuh khat khit khat sit loin in sem toto hi.
Attaliah in hih bang ngaihsutna hoihlo kua tung pan ngah hiam? Api Jezebel tungpan a luahsuk hi. Hoihna a kiluah suk theih bangin siatna leh gitlohna zong kiluah suk thei hi. Khangno Timothy in zong api leh anu tung pan Pasian theihna luah suk hi. Lai Siangtho in, ‘midik in atate tungah gamh hoih luah ding pia hi’, ci hi. Ahi zong Attaliah in apu leh api tung pan gam hoihlo luah kha hi. A pasal zong zogawp a, siatna sung tun hi. Pasian in David tungah akamciamna kumpi tokhom kizom ding acih pen haza in susia nuam hi.
Pasian’ kamciam kumpi gui suksiat nopna, Pasian’ mite suksiat nopna tuni dongin ki zom hi. Herod in Topa Jesu suksiat ding ngaihsun hi. Ahi zong Pasian in na kem hi. Pawlpi zong a susia nuam om hi. Suksiat zia pen nam tuamtuam om hi. Pawlpi susia adang Jezebel thu zong mailam ah I sin lai ding hi.
Milim biakna Pasian in a mudah penpen ahi hi. Israel mite Kanan gam sung alut ding ciangin a vaikhak masak lianpen milim biak loh ding ahi hi. Tua ahih manin milim biakna leh milim biak ding aphuang mite Pasian in thukkik tektek hi.
Hi bang dan siatna pawlpi sungah hong om ciangin mihon in thuak hi. Amau hangsan tak leh dingtang a, a langpang ngam mi khat a om mateng tua siatna hong paipai ding hi. Siampi Jehoiada bangin hangsan taka a dingngam ding mi kisam hi.
Thukhupna
Hih Attaliah numei in ih ngaihsut ding thu honggen hi. Lampi man tawnlo a, min leh vaang, mun deihna in siatna hong tun hi, cih ih mu hi. Ih ngaihsutna a tamzaw ih pianna nu leh pa, i sanggam te tungpan ih luahsuk ahi hi. Hoihna ahi a, hoihlohna ahi zongin ki luahsuk hamtang hi. Sia leh pha khentel theihna nei a, ahoihlo te deihloh ding ei tungah thu om hi. Min leh vaang deihna, midangte siat ding ngaihsutna leh ngimna te Pasian in koihkhong lo hi. A tawpna ah thuak veve cih I mu hi.
Dotna:
Attaliah innkuan thu, na tel bang gen in.
Siampi Jehoiada in bang ngimna nei hiam?
Milim biakna tuamtuam natheih te gelh in.
Attalaih in bang hangin Jehoram tawh kiteng thei hiam?
Attaliah in a lungsim puakzia hoihlo te koipan ngah hiam?
Attaliah lunggulhna bang hi pen hiam?
6. Joash nau ngek bang cidan in suakta hiam?
