ANNA
Ci leh sa nopsakna nusia in a
Khantawn Pasian maitang azong numei
Luka 2:36-38
Agelh ~ Rev. Dr John Thang Hum leh
Dim Lun Zam
Anna min khiatna pen “maipha” (or) “hehpihna” cihna hi. Anna pen LST lui a Hannah min tawh ki bang hi. Israel minam, Asa beh sung pan a Phanuel or (Panuel) tanu hi. Phanuel khiatna pen “Pasian mai, (or) Pasian hong kilat zia” cihna hi. Anna a kamsia a, a pasal in kum sagih bek nuntak pih hi. A pasal nusiat, a meigon hunpan kisim pen kum 84 pha ci-in ki ciamteh hi. Ahih theihna ding thukhat ah ama kum 14 a phak in pasal nei henla, kum sagih khit teh a pasal si hileh hih Topa Jesu a mit tawh a muh hun in kum 105 pha theiding in ki um mawh hi. Atuat dan 14+7+84= 105. Hih pen ahi thei ding thu ahi hi.
Pasian lungtang khempeuh tawh zong
A pasal sih khit a kipan sun leh zan in biakinn pelhlo in, thu ngenngen hi. Hih zahtaka thungen a biakinn ah a omcip nading, thu tuamtuam om hi. Amasa in a lungsim tamkham a, tua pen Pasian bek in damsak thei cih tel ahih man hi. Pasian in Israel te kiangah “note pasal kahi hi,” (Isai 54:5), acih bangin Anna in Pasian a pasal in neita hi. Tanglai mipil Paskel in, “mihing sungah a awngthawl mun khat om a, tua mun pen Pasian bekin dim thei hi. Pasian in a dip mateng mihing ten lungkimna ngah ngeilo hi” ci-in gen hi. Tua ban ah amailam ding thupi mahmah khat zong mukhol ahih manin, kamsangnu zong kici hi.
Khris a mittang tawh mu kha
Jesu Khris a suahzawh nigiat acin ciangin Judah mite ngeina bangin naungek Jerusalem biakinnpi ah aap dingin anu leh apa te’n hong paipih hi. Tua lai ah khangham Simeon leh Anna in, a lamet uh gumpa amau mahmah in amit tawh amuhna na gen hi (Luke 2:25; 36-38). Tua laiah Anna in kamsan na neipah hi. A kamsan na ah, Jerusalem khuapi suahtakna dinga hong kipia cih bulphuh hi. Jerusalem cih ciangin Judah te taang-a-ding, Judah minamte tatkhiat nading genna ahi hi. Hih pen kamsanna kici hi.
Anna in Pasian tawh lawmta bang a, kinai ahih manin Pasian in kamsang pilna pia in, agenkhia ahi hi. Pasian in amah tawh kinai a omte, ama’ lungtang leh a thusim, minautang in atheih zawhlohte pia hi. Amos 3:7 na-ah, Pasian in a kamsangte tungah ama’ thusim genlo in bangmah ahih kei ci hi. Khris in zong, “note sila kong ci kei ding hi, lawm kong ci ding hi, banghang hiam cihleh sila in a topa sepna a theikei a, lawm bekin theithei hi,” cih gen hi (Johan 15:5).
Tuhun in zong hibangdan mi ih mu kawikawi hi. Pasian tawh kinai mite in Pasian thusim theithei uh hi. Mite’ muhna ah thunget hatte i ci ziau hi. Thunget hat nading ahang tuamtuam om hi. Abulpi pen Pasian’ it te in Pasian tawh ki ho nuamsa uh hi. Ahi zongin thungetna ding hong tawsawn bel omngiat hi. Korea khristian te thunget hat mahmah te in kithei hi. Korea pastor khatin a genna ah, Korea mite thunget hatna ahang khat pen, launa hang zong kihel hi. Korea saklam (Komunist) te in khanglamte kap ding bekbek gen den a, tua zong kilau ahih manin thungetna ki neiden hi ci hi. Korea khristiante zingsang nai 4 sat khin peuh leh thungen khin uh cih ki gen hi. Pasian in amah tawh kinai mite a thusim gen hi.
Thungetna mikhat in agen na-ah, ni dangin zong thungen mah ingh. Ahi zong tuahun te pen deih leh sap ngetna hun hi. Tu in thu kanget leh deihna ngen ka hi nawnkei a, amah tawh kiholim nuamsa ka hizaw hi, ci hi. Anna zong a tungin ahih leh a pasal sihna hangin dahin Pasian zong hiding himah taleh atawpna ah Pasian tawh holim nuamsa in, anuntak sung tua ding a kipia zong hi thei ding hi. Biakinn sungah tengcip cih ciangin alupna pua in, tua tengah anhuan cihna hipah samlo hi. Mundang nasep zonglo in, pasal neih kik ding ngaihsun lo in, biakinn sungah a kisam bang semkawm in, Pasian thu lungngai in, a minam aa ding thungetsak in, phatna leh biakna neiden cihna hi. (1 Samuel 10:5; 1 Khang tangthu 25:1-3).
Antanna nei den
Lungsim siangtho sak in antanna anei den khat ahi hi. Antanna zatdan tuamtuam om a, bangci dan lian cih hong gen loh hangin an taktak mah zong tang ding a, pumpi gimsak thei, lungsim nawngkai na apia thei nate zong tang kawm ding hi. Tuhun in antanna i zat ciangin an taktak mahzong i tan banah, tv etna, ei ut dangdang sepna, tadensa leh laibu dang simna, kampau na, mi tawh ki thuahna, khuasung vak a vanlei nate zong tanna ahi hi.
Anna pen Laisiangtho zong a tel mahmah leh Laisingtho’ genna lametna nei khat zong ahi hi. Laisiangtho thei cianlo mikhat kamsang asep ding Pasian’ phalna omlo hi. Messiah hong pai ding a lametna zong Laisiangtho a telcian man ahi hi. Laisiangtho simlo, sinlo, telcianlo khat pen Pasian in makai in zang theilo hi.
Thukhupna
Anna nuntakna a ettehhuai mahmah khat ahi hi. A pasal asih khit ciangin leitung nopsakna te sin kawikawi ding ngaihsun lo in, Pasian maipha zong dingin tangtak pai ngiungeu hi. Rom 12:1-2 sungah agen bangin, leitung tawh kipawlna nusia in lungsim thaksuak sakden a, Pasian’ maipha azong numei ahi hi. Sawltak Paul in, Timothy kiangah pawlpi in meigong vaakna ah, meigong taktak leh a taktaklo a khen ding, meigong taktak i cihte pen pasal deih nawnlo ding, Pasian biakna lamah nuam asa hi ding, kum 60 tungsiah meigong bek alak ding gen hi (1 Tim 5:9).
Annna in Pasian tawh a kinai na hangin Pasian thusim, kamsan theihna zong aneihna pen thangah huai mahmah hi. A minam Israel te a itna zong I mu hi. A thupi pen ah Pasian biakna sungah nopsakna in hauhna lianpi piangsak ci-a Timothy 6 na ah agen bangin hauhna lianpi nei ahihna hong lak hi.
Dotna
Anna Pasian thu-um innkuan pan hong khang khia cih bangci ki theih hiam?
Anna in a pasal sih khit ciang bang hang pasal dang neih kik loh ding khen sat hiam? 3.Amah banghang kamsang ki ci hiam?
Antan zia nam tuamtuam te lak ah Anna in bang cidan antanna zangh hiam?
