Aman Kiam Semsem Mihing Pumpi
Agelh ~ En Khat Thang
Mihingte i man neihna pen ni khat khit ni khat kiam hanhan hi. Pumpi cilesa hoih semsem man nei semsem cih bang om thei lo hi. Ni dang lai in mel hoih a minthang vangvang actress khat kiphawk thakna a ngah sak thupiang khat om ngei hi. Nungak mel hoih nu pen a lawm ngaih pa tawh hong kitengin kamsiatna tawh a sawt lo-in a pasal in sih san citciat hi.
A mel hoih lua mahmah lai ahih manin, a it, a ngai tampi om lak ah a minthang actor mel hoih pilna nei banah sumlepai hau khat in hong ten pih tapeuh in ci-in Kham hai (Gold cup) khat tawi-in va ngen hi. Nuthawi mel hoih nu in sang zo lo-in na nawlh hi. Tangvalpa zong lungkia lo-in va paikik a, Ngun hai (silver cup) khat tawh a tenpih nading in va ngen leuleu hi. Nuthawinu zong kei ka mel hoih mahmah lai lel hong deih tampi om ci-in nawlh leuleu hi.
Tangvalpa zong lungkia tuan lo-in a thum veina sumngo hai (brass cup) khat va tawi-in hong tenpih in va ci leuleu hi. Nuthawinu in a nget masak lai sangin, a man tawm semsem tawh a kuan tangvalpa hong tawng gawp hi. “Nong pai cilin Gold cup na ngawn kong san loh bang dinga, a tawm man semsemin hong kuan na hi hiam? Nong sim mawh bawl hi, zum thei lo na hiam? hibang zinget kua hoh ngah ding na?” a cih leh; Tangval pa in “nuthawi aw, kei pen pilna nei hing. Na pumpi a man kiam semsem tawh kizui a hong ngen ka hi hi. Nang pen ni khat khit ni khat na teek semsem zaw a, na moi semsem thei kei hi. Tua ahih teh, kong tawi vante zong a masa sangin, a nunungte in man anei lo semsem ahi hi. Tua mah bangin nang pumpi zong ni khat khit ni khat siat lam ma nawhin a man kiam semsem zaw hi,” a cih leh nuthawinu zong thakhatin a om dan hong kikhel zo phialin, kiphawk thakna khat hong nei thei hi.
Tangvalpa in gen beh lai in, “na kihoih sakna huhau in na lungsim kiphasak lua kha a, thu hoih thupha na ngaihsut khak loh ding, na hoih, na pha nasep khak loh ding kong dahpih hi” ci-in ciah san hi.
Tangvalpa thugen mah bangin nuthawinu bek hi lo, laisim nanglekei zong ni khat khit ni khat kiham semsemin, nisim a i thuak gentheih haksatna, khualul nisa kapna, lungkham sinkhamnate in hong zawm sakin pumpi man a kiam semsem mihingte i hih lam kiphawk huai hi. I kizat theihna hong kiam semsem dinga, i pil, i siamna, i mel hoihnate hong kiakia ding hi. Tomkal nuntak sungin lungsim pha tawh kimlepam, a etlawm sak i suah zawh nading ut huai ka sa hi.
Pasian thu um eite in a kisia thei i pumpi Pasian minthanna ding i zat khak leh tawntung i kha nuntakna man khangin no suah semsem ding cih lametna nei i hih manin Pasian a dingin hanciam huai mahmah cih zong behlap nuam hang.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
