ABISHAG Kumpi David a khoi numei
(1 Kum 1:3,4; 2:13-15)
Agelh ~ Rev. Dr. John Thang Hum leh
Dim Lun Zam
Abisag pen Shunem numei hi in, amin “pa vak kawikawi” cih khiatna nei hi. Kua man’ thei kha khollo ding hi napi nasep thupi mahmah khat sem kha hi.
Nasep ngahna
Kumpi David a kum hong tam semsem a, puan tampi a silh hangin a khualum zo nonlo hi. Amah a kemte in a khualum sak thei na ding numeino khat azon sak ding ngaihsutna pia hi. Kumpi David zong hoihsapah a, tua bang ahih thei ding a kizen leh nungak bit a gam sungah azon sak ciangin Shunamite numeino khat va mu khia uh hi.
Abishag in kumpi pa khualum suah dingin luppih den hi. Ahi zongin nupa bangin omkhawm lo uh hi. Hih in kumpipa lungkim sak mahmah hi. Nupa bangin a om khop loh hangun Abishag pen kumpi pa thulamtawn (tazavuan) zi suak a, kumpi pa neihsa gamh te zong luah ding khuan ki pia hi.
Kumpi innsungah nasep ngah theih na dingin Tender kisam hi leh a pil mahmah, atei mahmah te ki zong ding a, mi 100 lak ah khat bang bek ki la kiau ding hi. Ahi zong hih kumpi pa don ding nasep pen pilna bulphuh a kisiau namte hilo in, itna nei, mi lungduai leh citak mi kizong ahihi.
Abisag in lungduai tak in David kisapna khempeuh huh hi. Cimtak lo in, itna lak in phunlo in nasep ding khempeuh zo hi.
Adonijah in a zi ding in ngen
Kumpi pa sih khit ciangin Haggith tawh aneih tapa, Adonijah in, Batsheba (Solomon’nu) tungtawn in, Abishag a tenpih ding ngen hi. Abishag pen amel hoih in ngaih bang mahmah a, pasal te iplah mahmah khat ahihi.
Adonijah pen kumpi za deih a, kumpi tokhom la ding a, kithawi ngei hi. Solomon in hihpa pen a etcik mahmah khat na hihi. Tu’n Adonijah hong pai in, Bathsheba tung tawn in Abishag hong nget ciangin, Solomon in a ngian thei ahih man in, anu tai pah a, Adonijah zong ka mawk koih kei ding, ci hi. Solomon lungkim lohna Adonijah in a zak ciangin lau a, biakinn sungah tai in, saki va pom hi. Tua mun mah galkap mang pa in sat lum hi.
Thukhupna
Paunak Lai siangtho ah, “Nasep siammi kua hiam? Kumpi na zong sem ding hi”, na ci hi, (Pau 22:29). Hih siamna pen laitan leh degree te hilo in itna bulphuh a nasem cihna hi. Abishag a nungsang ah bang ci, pasal nei maw, pasal neilo in om suak maw ki gen lo hi. Bangbang hi leh, kumpipa lungkim nading a nasepna leh, a donna te nasep thupi mahmah khat ahihi.
Ih nu leh I pa te hong khangham ding a, a lung hong leeng in, a ngaihsut hong tam ding hi. Hi bang hun ciangin ta ten theithei leh ut huai mahmah hi. Nu leh pa thumang a lungkim sak, nu teek, pa teek don te thupha ngah cih lai siangtho sungah I sim hi. David pen a tate, a tanu te in donlo hi. Ahang pen zi guk nei a, kuazaw it pen cih zong omlo in, ahi zong Bathsheba tungah, na tapa in kumpi za luah ding cih kamciam ahih man in Solomon in kumpi za luah hi. Tua ahih man azi teng lak pan Solomon’ nu, Bathsheba tawh a kinai pen suak hi. Ahi zong kumpi pa a teek ciangin a zi leh amo te in don nonlo ki thei hi.
Hi teng khempeuh ih genna pen, kumpi pa thu gen nuam ih hi kei zaw a, Abishag nasepna thupi gen nuam ih hi zaw hi.
Dotna:
Abishag kua mi hi a, bangci dan inn kuan pan hong pai hiam?
Kumpi pa ading bang sep sak hiam?
Kumpi pa sih khit ciangin bangci om hiam?
Banghang in Adonijah in tenpih nuam hiam?
__________________________________________________________
Source:
LAI SIANGTHO IN A CIAPTEH NUMEI PIL LEH THAHATTE (Laibu)
Laigelh Rev. Dr. John Thang Hum (Ph.D) in Laibu Saal / Zomi eLibrary ading in phalna ahong piak ahi hi.
