ABIGAIL
A innkuan ki suksiat nading pan
a honkhia numei pil
(1 Sam 25:3; 14-42; 27:3; 30:5; 2 Sam 2:2; 2 Sam 3:3)
Agelh ~ Rev. Dr John Thang Hum leh
Dim Lun Zam
Hih anuaia ah i gen ding Abigail pen Lai Siangtho in a gen numei pil te lak ah khat ahihi.
A pianna
Abigail Maon sehnel gam pan hi a, a nu leh a pa, a innkuan pih dangte ki gen na omlo hi. A min pen “Pa’lungdam na” cihna hi. Maon mun pen Engedi nisuahna khanglam tai 15 na pawl ah om hi. Amel hoih a thu ngaihsut dan siam leh numei kizen mahmah khat ahihi. Thu agen ciangin ki niamkhiat kammal zangin siang tak, awzol tak leh mite lungsim la thei dingin thu gen thei hi. A nu leh a pa, a inn kuanpihte thu ki genna omlo hi
Pasal neihna
Abigail tua khua a mihau Nabal tawh kiteng hi. Hih hunlai in hauhna pen ganhing tampi neihna tawh kiteh hi. Nabal in Kalaoh tampi leh keel tulkhat, tuu tulkhat nei in tumul meet nasep leh zuak tawh anungta mi khat ahi hi. Kalaoh pen sehnel gam tembaw kici a, khat bek in zong tampi man hi. Hauhna pen Pasian piak in ki ngaihsun a, ki angtan pih mahmah hi. Ahi zongin Israel te sungah mihau tampi tak in thumanlo in zong a hau om a, Pasian phawkkik lo zong om hi. Abigail in mihau khat tawh a ten khak manin lungnuam hiam, lunggim zaw hiam cih anuai ah i gen ding hi.
Nabal hai na
Hih a pasal Nabal pen mi lungtom khat, thu sau a ngaihsun khollo khat ahihi. Kumpi Saul pawl ahih zah khat in Pasian’ zia sangin mihing’ zia tawh kalsuan zaw pawl ahi hi. A lungtom nam ahihna, a kiten ma in theikhin phial kha ding hi.
Hih hun sung pen Saul in David thah ding azon laitak hi a, David leh a nungzuite gamlak leh suang kuahawm lakah a buk kawikawi hun ahihi. Tua hun sungin hih Nabal te omna zong nawk kha uh hi. Hih hun sungin David pawlte in Nabal ganhingte zong gilo-guta te luh nading pan huut sak hi. Hun khat ciangin Nabal tuumul met ding hong kuan hi. Hih thu David in a zak ciangin Nabal kiangah a mite sawl a, Paisan pawi bawl na ding a ganhingte ngen sak hi. Hih a kimisak Nabal in, “David na cih uh kuami hiam? Tulai a topa kiangpan a taaimang mi tampi om hi,” na cih san hithiat hi. Tua bang acih na in Nabal pen Saul mi khat ahih man ahi hi.
David in hihthu a zakkik ciangin nak heh mahmah a, a galkapte mi 400 sawl in, Nabal avat maai ding gen hi. Tua thuteng Nabal nasemte khatin azi Abigail tungah vapuak sawn hi. Abigail in thakhat thu in anasemte sam in nektheih leh dawn ding tuamtuam tawh David va delh pah vingveng hi. Lampi ah David tawh a kituak ciangin, amai ah bok sukin nakpitak thuumna nei in an leh tuilim apuak teng zong a pia hi. Abigail in a pasal khialhna teng thuum-a, “kei tungah hong tung zaw hen, ka topa aw, heh kei in, ka pasal hai lua hi” ci-in gen hi. .
Nabal haina kigenna
Nabal min limlim pen ‘mihai’ cihna ahi hi. Samuel 25: 3 na-ah, amathu hi bangin gen hi. “A ki uk zolo mi leh a gamtat sia khat ahi hi. Ahauhna suangin, mi thusimlo, lungtom, pau phangphang zukham thei, ngawngkhauh khat ahi hi.” Saul nungzui khat ahih mah bang in David haza in langpan aa, Pasian zahtaklo, leitung nopsakna bek ah a kidiah cip mi ahi hi.
Abigail in a pilna leh a teina tawh, a innkuan bup kithah nading pan in honkhia hi. “Ka pasal mihai hi; amathu peuhmah thusim ken” ci-in gen hi. Mi pawlkhat in, ‘a pasal simmawh bawl si e, tua bangdan agen’, ci kha ding hi. Hinapi, khat na-ah, Abigail in thuman agen ding hun tungta hi. Kum tampi a thuak pen, tu tatak ciang tuak kha ngawngaw ahih manin ip theih hi nawnlo hi. Hih hun pen thuman ipip hun hi nawnlo in, genkhiat hun hi ta hi. Tua ban ah ahi bang genna tawh a innkuan te hotkhiat ding a thupi pen hun ahi hi.
Abigail sunglam leh pualam hoihna aneih te zangh
Abigail in a melhoihna bek hilo, kamsiamna, ki niamkhiatna leh a talen, khut siamna te zang hi. Kamsiam pong bek hilo in, kam pauzia ding teel hi Alungsim siangtho ahih manin na khatpeuh sep ding leh sep loh ding khen sat pahpah thei hi. Tua bek thamlo, David pen Pasian in a teel, Judah kumpi ding aa, a ki kipsak pa ahihna zong gen hi. Tulai pau leeng kamsang, gen kholhna hi a Kha Siangtho kidimna lah khiatna khat ahi hi.
Kumpi leh tungsiah mite tawh a kimuh ding ciangin, khuttawi (letsong) ken’ ding pen mipil te ngaihsut theih khat hi. Ahizong bang keng ding cih pen pilna khat na hi zel hi. Hi hun lianin David mai muhna ding sum leh paai, kham leh ngun te ki zang theilo ding cih thei hi. Lasa siamte kengin amai ah la vasak sakna in David buaina veng saklo ding cih zong thei hi. David a gilkial ding a, a sinso ding, zekai leh hun laplo ding ahihna tel mahmah hi. Tua ahih manin manlang takin nektheih dawntheih bawl mengmeng in nawhtai mahmah hi.
Siatna ding pan suahtakna
David kiangah Abigail ki niamkhiatna tawh a thuumna hangin a hehna hong bei hi. Nabal leh a neihsa teng vatmai ding ngaihsutna nei nawnlo hi. A tomin gen leeng, Abigail thuumna hangin atung ding siatna khempeuh pan Nabal innkuan suakta hi.
Nabal sihna
Abigail in David tawh kimuhna pan a ciah ciangin, Nabal leh a inn ah om mite (nasemte) in pawi na bawl in zukham ankham in, lu mel, taw mel na phawklo uh hi. Abigail in a pasal zukham amuh ciangin thupiang teng bangmah genlo hi. Hih pen Abigail pilna ahi hi.
A zing sang kik, Nabal apengnawng na pan a tei ciangin thupiang teng agen leh, Nabal thakhat thu in lungam in pukvat hi. Zato lamte cih dan in lungtang natna ngah vat hi. Tua hun aa ki pan khua phawk nawnlo in a nisawm khitciang Nabal si hi.
David’ zi a suahna
David in Nabal sihna leh thupiang teng atheih ciangin Abigail a hehpih tha suak a, a zi ding in ngen sak hi. Abigail in zong khensat haksa salo in David tawh ki teeng hi. Pasal nungta laipi a, pasal dang ngaihna pen mawhna hi a, pasal si khin a, pasal dang neihna pen mawhna hilo hi. Pasal thukham sungpan suakta khin hi, cih Paul in thukham khut nuai pan suahtakna tua bangin hong gen teh hi (Rom 7:3). Abigail in David tawh, tapa Chileab nei hi (2 Samuel 3:3; I Khang 3:1).
Abigail in aneihsa teng David khut sungah ap hiam? midang tungah pia hiam? cih mi pawl khat lung hih mawhna om hi. Atom in gen leng, Abigail in aneihsa teng tawh, amah leh a innkuan (nasem) teng David tungah ki aap hi. Abigail in David tawh a kiten khit ciangin a lungnuam in thupha zong ngahzaw takpi hi. David aa dingin aneihsa deih gawh a tenpih hilo ahih hang, thupha lianpi hong suak hi.
Thukhupna
Tulai hun in numei khenkhatte in pualam hoihna nei napi, sunglam ah picin na neilo uh hi. Mel hoihna zangh na pi un kuamah gum zolo uh hi. Melhoihna ciang lel in ama a ding bek kimang thei a, midangte’ phattuamna pialo hi. Sunglam picin na in midang te zong gum thei hi.
Paunak sung ah, “Numei pilte in innsung nuntakna khangsak aa, numei haite in innsung susia hi” (14:1), ci hi. “Mipil in haksatna ding mukhol in pelh a, mihai in bing phut a, haksatna tuak hi,” (Pau 22:3). Abigial in pasal ding ateel khialh hangin Pasian azahtakna leh a pilna zangin a innkuan siatna ding pan in honkhia hi. Hih pen tulai khangthak te (numei leh pasal) a kua ma peuhin atheih huai mahmah thu ahi hi.
Dotna
Abigail Pasian it mi khat ahihna bangci ki theih hiam?
Abigail tungah bang ci nam hoihna teng ki mu hiam?
Nabal haina bangci ki lat hiam?
Abigail in bang hun ciangin a pasal haina pulak hiam?
Nang Abigail hi le cin Nabal na tenpih ding hiam? Ahang gen in.
Asia leh apha manlangtak khensat theihna ding bang kisam hiam?
Kam nem in hehna mit sak thei hi, bang hang hiam? (Pau 15:1)
Abigail in David bangci mi hi ding cih gen hiam?
